乳癌治療方法 - 我需要用咩方法醫?1

Posted by in Treatment 治療方法

「醫生同我講要做手術割乳房,先可以清除癌症,但係我真係唔想做手術,其實有冇其他方法醫乳癌?」

「吓?!要做化療?會唔會甩哂啲頭髮㗎?」

「電療辛唔辛苦?同化療有咩分別?」

乳癌治療方法 ﹣ 手術/化療/標靶治療/電療/荷爾蒙治療咁多樣,有咩分別?邊樣啱我?呢篇同你慢慢探討⋯⋯

乳癌治療策略

用返早兩篇「乳癌分期 ﹣ 我係早期定末期?」工業大廈大火(癌症)的比喻,以上咁多種治療就好似唔同嘅救火策略。

要針對性咁救熄場火(醫好癌症),我地一定要針對性咁對付起火的源頭樓層(癌症源頭),用手術將乳癌割咗去,就係將癌症連根拔起嘅方法。

雖然救熄源頭,第二個問題就要問:「咁蔓延咗去其他通道/樓層(淋巴/器官)啲火點算?」消防員就會用直升機喺大廈上面大包圍咁淋水(化療),務求令成座大廈(成個人)都得救,有火就滅火(擴散咗就滅癌細胞),冇火就降溫等佢唔好咁易死灰復燃(冇擴散就等癌症唔好咁易復發)。

除咗外圍大包圍淋水(化療),我地仲可以好針對性咁派啲消防員(標靶藥)入去火場,遂層遂層咁搵啲火種(癌細胞)出黎殲滅,務求做到裡應外合,鞏固外圍淋水(化療)嘅效果

如果真係二三級大火(二三期癌症),起火樓層都幾猛火,我地仲可以用其他方法去加強攻勢,例如噴泡/堆沙(電療),總之就局部加強起火樓層(胸口)嘅控制

好喇,終於都救熄火(醫好癌症),經此慘痛一役,大廈管理員(病人)日日都會巡查消防裝置(日日食抗荷爾蒙藥),以減低再起火(癌症復發)嘅機會,直至五至十年後先鬆懈落黎。

聽完故仔,回到現實,唔同嘅乳癌治療即係咩呢:

 

手術

 

乳癌治療方法

圖片來源:互聯網

乳癌治療方法

圖片來源:互聯網

即係切咗嗰腫瘤去,局部治療嘅一種,根治乳癌嘅主力/必要分子,記住記住我用「根治」呢個詞,冇咗佢,只係得其他治療嘅話,係根治唔到嘅。所以如果仲有得醫(非末期),手術一定要做,除非你唔想好返。

乳癌手術風險 - 安唔安全?高風險嗎?

乳癌手術 1 - 開刀我有咩可以揀?

乳癌手術 2 - 保留乳房手術 ,我做唔做得?

乳癌手術 3 - 保留乳房手術 ,我揀唔揀好?

乳癌手術 4 - 乳房重建手術 你要知

乳癌手術 5 - 前哨淋巴結活檢術?咩黎㗎

乳癌手術 6 - 專做乳房手術醫生的增值服務

義乳的秘密 - 重建乳房手術外的另一片天

 

化療

 

乳癌治療方法

圖片來源:互聯網

同手術相反,化療係全人治療(唔係局部治療),唔好聽到全人治療好開心,以為好似中醫師sell你嗰啲固本培元咁。佢啱啱相反,係啲毒藥全身咁走去追殺癌細胞,不過佢死時你都唔好過,最辛苦嘅治療,甩頭髮/嘔吐/發燒係常見既,就好似電視劇啲女主角咁。幾時要化療?當你係啲高危復發嘅病人(用黎鞏固治療效果),或者末期病人(用黎延長壽命)時就要。咁辛苦點解仲要做?苦口良藥,捱過咗(12-18星期),就好似電視劇啲女主角咁,因為悽慘,所以很美。

乳癌化療需知 - 我洗唔洗化療?

乳癌化療時間 - 手術前做?手術後做?

乳癌化療需唔需要 - 著數計算機火併乳癌基因測試

乳癌化療AC針TC針 - 乜藥黎㗎?

乳癌化療選擇 - 咁多組合點樣揀?

乳癌標靶治療 - 乳癌HER2型點樣揀?

乳癌雙標靶治療-HER2型乳癌的春天

乳癌化療費用 - 要用幾多錢?貴唔貴?

乳癌化療療程 - 吊針過程大公開

乳癌化療甩頭髮 - 點處理?幾時生返?

乳癌化療嘔吐 - 終極止嘔藥

乳癌化療副作用 - 辛唔辛苦?點處理?

乳癌化療期間之飲食 - 點補身?洗唔洗戒口?

 

標靶治療

乳癌治療方法

圖片來源:互聯網

標靶標靶,真係好似飛標靶咁,你要有個靶(目標:即HER2),先有得放飛標。標靶藥係啲好新好好嘅藥物,只會針對癌細胞,唔會你自己啲細胞都殺埋,不過都有副作用,會傷心臓。咁好咁新咪好正?咁好咁新,就唔止好正,仲有好貴,要吊成年(3星期一針)。另外佢都要加埋化療一齊用先發揮最大威力

乳癌化療AC針TC針 - 乜藥黎㗎?

乳癌標靶治療 - 乳癌HER2型點樣揀?

乳癌雙標靶治療-HER2型乳癌的春天

乳癌類型巡禮 - 與你細數HER2型乳癌的歴史

 

電療

乳癌治療方法

圖片來源:互聯網

局部治療嘅一種,叫得局部,就冇化療咁辛苦。過程就好似去美容院照太陽燈咁,局部囇,日日去(好似美容咁勤力),去三至六個禮拜,星期六日放假。因為曬得多,實會曬傷,開頭啲皮膚紅紅黑黑滾滾興興,好似燶咗咁,會甩皮,一年後皮膚就白返。

乳癌電療大解構-原來唔洗驚

 

荷爾蒙治療

乳癌治療方法

圖片來源:互聯網

食口服藥,日日食,食五至十年。藥性溫和,不過大有功效,用黎鞏固治療效果,即係完晒以上四樣治療先食,不過首要條件係同隻藥夾先得(ER+)。

乳癌荷爾蒙治療 - 點解我仲要食藥?

乳癌荷爾蒙藥-究竟食咩藥?

乳癌荷爾蒙藥-不同年紀嚴選最正確食法

有咗以上概念,你可以套返落我之前講過嘅兩個救火故事,再細心咀嚼一下先睇落去⋯⋯我會等你,放心⋯⋯

返黎拿?搞掂?明晒?

唔明嘅話,我下一篇會黎一個乳癌治療大方向嘅總結⋯⋯

乳癌治療時間 - 我需要用咩方法醫?2

 

相關醫學專欄:

乳癌治療方法 - 我需要如何去治療乳癌?

馬國權醫生

封面圖片來源:互聯網