Anti-hormone 荷爾蒙治療 – 香港乳癌及乳病治療中心 Hong Kong Breast Cancer And Disease Centre

管腔A型管腔B型乳癌－不吸眼球的甘草

HK Breast — Mon, 10 Jul 2017 00:24:20 +0000

乳癌病人經常討論的乳癌類型必然圍繞三陰性乳癌、HER2型乳癌，因為他們吸眼球，但原來大部分病友有嘅乳癌類型，卻是像甘草演員般被人遺忘的「管腔型乳癌」⋯⋯ 睇一個演員做戲，我地會品評佢內外，一方面我地會睇佢有冇外貌，另一方面，我地又會在意佢有冇演技，演唔演活一個角色，交唔交到內心戲。原來乳癌細胞都好似演員咁有表有裡，一方面醫生會睇佢表面同咩藥夾，另一方面，醫生又會在意佢內心性格，骨子裡係咪一隻惡的乳癌，要嚴加防範。睇一個人外表容易，了解一個人內心很難。睇一隻乳癌表面同咩藥夾容易，了解佢的內心卻很難。以前後生入世未深，揀男朋友當然睇樣行先。以前醫生入世未深，醫乳癌當然睇樣行先。「乳癌都有樣睇？」當然，之前你見我成日提荷爾蒙受體（ER，PR）、標靶受體（HER2），呢D就係乳癌的外表，喺顯微鏡底下做特別漂染（immunohistochemical staining）就已經知道，正常化驗室都做到。荷爾蒙受體陽性，咪荷爾蒙受體陽性乳癌囉。 HER2型受體陽性，咪HER2型乳癌囉。荷爾蒙受體陰性，HER2型受體又陰性，咪三陰性乳癌囉。「係囉，咪就係咁簡單囉，又有幾複雜呀？」開頭我都認為作為病人，識到咁簡簡單單咪算囉，所以之前寫咗上面嗰三篇就算，直到有一日，有病人咁問我：「我係荷爾蒙受體陽性，同時HER2型受體又係陽性嘅乳癌，咁我係咩類型乳癌？三陽性乳癌？」事實上我真係見過D台灣網站咁樣叫，不過照譯黎講，英文我地又唔會叫Triple positive cancer，醫學界我地叫呢D做Luminal type（管腔型乳癌）。我諗係時候要寫一篇深入的進階文章去解釋清楚。「無端端又多咗個新名嘅？」呢個新名係源於我地對乳癌的內心世界了解多咗。以前後生入世未深，揀男朋友當然睇樣行先，到年紀大咗，見過情場騙子受過情傷之後，揀老公當然睇性格。以前醫生入世未深，醫乳癌當然睇受體行先，到了解多咗，見過乳癌的各種表現之後，醫乳癌當然睇性格。「點樣可以睇到乳癌性格？」要睇乳癌性格（intrinsic molecular subtype），技術上係複雜好多，要遂個基因排序（DNA Microarray），之後睇每個基因分佈，醫學界觀察到原來乳癌有7種人格，常見臨床重要的有5種，分別係管腔A型（Luminal A），管腔B非HER2型（Luminal B HER2 negative），管腔B HER2型（Luminal B HER2 positive），HER2型非管腔型（HER2 non luminal），同基底細胞型（Basal-like），臨床冇乜用的normal-like 同Claudin low type就唔多講，聽過下就算。「我又想驗下我隻乳癌係乜型人格⋯⋯」對唔住，因為技術複雜，好多野都發展中，暫時冇統一標準，所以冇商用的測試可用。「唓，浪費我睇咗咁耐原來冇得測試⋯⋯」唔好唓住，難道你認為我天生愛打字？當然唔會打咁多字去浪費你寶貴時間。我地冇得測試姐，有得估都得㗎。「估？？」原來我地實在受過太多情傷，去得太多speed dating相睇，睇佢眉頭眼額講多兩句，已經摸底成功。醫生只要根據ER、PR、Ki67、HER2、乳癌復發基因測試（例如OncotypeDx/Mammaprint/Endopredict/PAM50）呢五樣野，就可以大致摸到乳癌個底，從而作出治療的建議。跟住下面就會遂隻講講，拿，唔好話唔警告，悶野黎喇：管腔型乳癌（Luminal type）簡單黎講，管腔型乳癌（性格）即係荷爾蒙受體陽性乳癌（外表），原來佢佔據咗整體乳癌的七成，即係大部分人都係呢類，咁常見但咁少人講，以一套戲入面黎講，佢就係唔起眼的甘草演員。喺佢之下細分出三種性格：管腔A型（Luminal A）、管腔B非HER2型（Luminal B HER2 negative）、管腔B HER2型（Luminal B HER2 positive）。乳癌人格一：管腔A型乳癌要稱得上管腔A型乳癌，要滿足以下5個條件： 1）ER positive 2）PR positive 3）Ki67低 4）HER2 negative 5）乳癌復發基因測試要低危復發組別「佢有咩咁特別？」圖片來源：電影＜我是路人甲＞佢係侵蝕性乳癌之中最心地善良的一員，活躍度低（即係喺套戲出現一兩個鏡頭嘅路人甲，連名都冇，對白梗係冇），所以好多時做完手術，荷爾蒙治療已經足夠，好少可化療（除非期數好惡），唔需要標靶治療（因為HER2 negative），電唔電療就睇手術類型同結果。乳癌人格二：管腔B非HER2型（Luminal B HER2 negative）要稱得上管腔B非HER2型乳癌，要滿足以下3個條件： 1）ER positive 2）HER2 negative 3）起碼以下是但一樣中： a）Ki67高 b）PR...read more

The post 管腔A型管腔B型乳癌－不吸眼球的甘草 appeared first on 香港乳癌及乳病治療中心 Hong Kong Breast Cancer And Disease Centre.

荷爾蒙受體陽性乳癌－是福還是禍？

HK Breast — Wed, 07 Jun 2017 12:00:17 +0000

以前乳癌我地了解得冇咁深時，所有治療都好簡單，睇期數對號入座，就好似入咗一間冇咩選擇的茶餐廳咁：侍應：「你咩期呀？一期A餐，二期B餐，三期C餐，四期D餐。」慢慢當我地了解乳癌越來越多，成日會聽到「乳癌點止期數咁簡單」、「乳癌個人化治療」等等。咁究竟有幾個人化？有幾唔簡單？今次應讀者要求，寫下荷爾蒙受體陽性乳癌，究竟它是福還是禍？荷爾蒙受體陽性乳癌定義唔知你仲記唔記得，好耐以前講過，乳癌有三樣好重要的指標，就係雌激素受體（Estrogen Receptor，ER）、孕酮受體（Progesterone Receptor，PR）同HER2受體。頭兩樣就係你成日聽到嘅荷爾蒙受體。荷爾蒙受體陽性乳癌就係指以下三種情況（唔洗理會HER2 status）： 1）雌激素受體陽性（ER＋ve），孕酮受體陽性（PR＋ve） 2）雌激素受體陽性（ER＋ve），孕酮受體陰性（PR－ve） 3）雌激素受體陰性（ER－ve），孕酮受體陽性（PR＋ve）「我點先知我係咪雌激素受體陽性（ER＋ve）？或者孕酮受體陽性（PR＋ve）？」手術前，就睇粗針報告。（伸延閱讀：乳房抽針檢查－乳房檢查三步曲3）手術後，就睇手術病理報告。（伸延閱讀：病理報告的八大重點）報告裡面有一個分數，通常公立醫院就會出Allred Score（滿分8分），私家醫院就可能會出埋H score（滿分300分），大部份情況下，兩個是但睇一個就得。 Allred 0分或者2分（註：冇1分嘅），就係陰性（negative）。 Allred 3-8分（註：有D醫生當3分係踩界），就係陽性（positive）。 H score 個定義就模糊D，有D醫生當50分或以上就係陽性（positive），有D就要H score 100-300分先算。攞返個報告出黎，對一對分數，就知自己係唔係荷爾蒙受體陽性乳癌。「我正正就係荷爾蒙受體陽性乳癌呀，咁佢有咩咁特別？」啱你就可以睇埋落去，我會分開荷爾蒙治療篇，荷爾蒙標靶篇，同荷爾蒙化療篇去深入解釋吓佢嘅特性。如果你唔係荷爾蒙受體陽性乳癌，請移玉步去：三陰性乳癌－係咪真係咁惡？乳癌類型巡禮－與你細數HER2型乳癌的歴史荷爾蒙治療篇「我知吖，你之前講過要食藥吖麻～」聰明！不過之前冇睇開嘅病友，可以睇咗以下幾篇基礎文章溫下書先，我地先再進階D討論落去：乳癌荷爾蒙治療－點解我仲要食藥？乳癌荷爾蒙藥－究竟食咩藥？乳癌荷爾蒙藥－不同年紀嚴選最正確食法重點一：身體越多女性荷爾蒙刺激，荷爾蒙受體陽性乳癌就生長得越快。「咁點先可以對抗女性荷爾蒙刺激？」我地先要了一了解敵人係邊度，先可以先下手為強。收經前，女性荷爾蒙主要由卵巢製造。而收經後，女性荷爾蒙主要由脂肪轉化男性荷爾蒙而來。姑勿論女性荷爾蒙點黎，佢地最終都會痴落去乳癌細胞的荷爾蒙受體度，從而刺激乳癌細胞生長。「呢度我都跟到，咁同治療有咩關係？」第一樣要介紹嘅，就係最多人用嘅三苯氧胺Tamoxifen，佢就係針對荷爾蒙受體嘅藥，原理就好似音樂椅遊戲咁，睇吓邊個霸到將櫈先。原來Tamoxifen好厲害，佢一坐就坐咗落「荷爾蒙受體」呢張櫈度，咁就算有「女性荷爾蒙」黎到想搵櫈坐，sorry，冇位喎（就好似地鐵關愛座咁，不過呢次「女性荷爾蒙」當然唔值得關愛），咁自然刺激唔到癌細胞。「咁咪一天都光曬？」故事發展到呢度，好似D師奶劇咁，點會咁一帆風順。冇錯，現實中「女性荷爾蒙」有時都幾厲害，會比佢攝到埋黎（拿拿拿，我冇話過咩人呀，你自己歧視人咋）。「咁咪死火？」編劇黎到呢D位，當然係制造吓緊張氣氛但唔會比你死嘅，下一招就係源頭減廢。「咩叫源頭減廢？」既然霸未必夠你霸，我地一於斷你「女性荷爾蒙」米路。如果未收經，「女性荷爾蒙」來源係卵巢吖麻，我地一於對付卵巢，亦即你可能都聽過嘅「抑制卵巢」（ovarian suppression）。「實際點操作？」實際有三個方法，詳情暫且從簡，如果唔係收唔到筆： 1）每個月打停經針（例如zoladex） 2）做手術切咗卵巢（bilateral oopherectomy） 3）電死個卵巢（ovarian ablation）「但我已經收咗經，又點算？」收咗經嘅女士，「女性荷爾蒙」主要來自脂肪轉化，所以我地為咗針對呢個轉化過程，設計咗一類藥，就係芬香環轉化酶抑制劑Aromatase inhibitor （AI）。Al得三隻，non-steroidal AI兩隻anastrozole （Arimidex），letrozole（Femara），steroidal AI一隻exemastane（Aromasin）。「咁咪一天都光曬？」仲未可以開心住，現實中我地發現就算用曬以上法寶都好，都仲有D荷爾蒙受體陽性乳癌係唔受控制，為咗針對呢D漏網之魚，我地轉一轉思維，今次唔針對上游源頭，今次直接針對下游「荷爾蒙受體」呢張櫈，呢隻藥就係抗荷爾蒙針Faslodex（fulvestrant）。破壞埋你張櫈，等你女性荷爾蒙想坐都冇得坐。「原來咁多選擇～」所以除咗簡單咁用單一Tamoxifen／AI之外，第二線情況醫生可能會混合咁用，例如ovarian suppression ＋AI，或者AI＋Faslodex，千變萬化，不過萬變不離其宗，主要都係由上面四個方向著手。睇到呢度，應該都嘔。不過如果你仲頂得順，下面有好野益你，就係進階荷爾蒙標靶篇。荷爾蒙標靶篇「咩係荷爾蒙標靶？」之前講標靶治療，一路都係指針對HER2呢個靶的治療。（伸延閱讀：乳癌類型巡禮－與你細數HER2型乳癌的歴史）但原來近年醫學界已經發展出好多新希望，黎輔助荷爾蒙治療，就好似中醫的藥引概念咁，我地叫呢D做荷爾蒙標靶藥。喺某類病人用咗呢D荷爾蒙藥藥引，原來可以激活荷爾蒙藥未開發的潛能。「嘩，咪好正？」...read more

The post 荷爾蒙受體陽性乳癌－是福還是禍？ appeared first on 香港乳癌及乳病治療中心 Hong Kong Breast Cancer And Disease Centre.

乳癌荷爾蒙藥－不同年紀嚴選最正確食法

HK Breast — Wed, 07 Jun 2017 10:41:21 +0000

上回講到乳癌荷爾蒙藥食法都可以有幾種變化，可以食新藥，又可以食舊藥，甚至先舊後新，食幾耐可以5年又可以10年，仲未計副作用，頭都大埋，點揀呀？呢次就住唔同年紀嘅你，教你嚴選最正確食法⋯⋯ 乳癌荷爾蒙藥上一篇講過一個好重要概念：收經前冇得揀，收經後有得揀。咁作為病友嘅你好自然就會代自己個情況入去： 1）好後生充滿活力嘅你（我知道所有女性都好後生好有活力，呢度講緊實際年齡，唔係講肌齡。） 2）人到盛年，開始會留意吓「靜心」「太太口服液」嘅你 3）見慣世面，冇咩野嚇到你嘅耳順之年後生未收經嘅你上面提過未收經冇得揀食咩藥，只有舊藥Tamoxifen啱你。「舊藥Tamoxifen有咩副作用？」主要你要知嘅就係兩個罕有、但有可能攞命嘅副作用： 1）子宮內膜生癌：5000個有1個，早發現係有得醫嘅。 2）靜脈血管有血塊塞住：外國人多，中國人唔常見，終於可以大大聲講「我是／我愛中國人」而唔怕比人批鬥。其他相對小兒科嘅副作用包括：潮熱、經期亂、陰道分秘增加、畸胎。因為經期亂加畸胎加唔用得避孕藥呢3個因素，如果冇諗住要小朋友嘅話，避孕最好用安全套，唔好靠計安全期。雖然冇得揀一定要食舊藥，但你都可以選擇： 1）唔食藥 2）食5年 3）食10年「咦？可以唔食藥咁好？」一般情況醫生都唔會咁建議，始終後生所有乳癌治療都做足晒最好。「咁咩情況會揀唔食藥？」主要都係病友唔接受／驚罕有但可能致命嘅副作用，其實乳癌抗荷爾蒙藥嘅效用（救命）一定遠超過副作用（攞命），所以唔洗驚。另一方面，就係D想生BB嘅女性就會咁揀，因為怕舊藥Tamoxifen搞到畸胎。「咁如果我肯食藥，應該揀5年定10年好D呢？」傳統以前就不嬲就食開5年，所以你見好多病友／網頁／甚至唔熟嘅醫生都叫你食5年。但係2013年3月喺國際醫學權威期刊The Lancet，出咗篇劃時代嘅研究ATLAS Trial（http://www.ncbi.nlm.nih.gov/pubmed/23219286），證明到食10年舊藥係好過食5年。另一大型研究aTTom trial亦都有同一樣結論，所以係可見嘅將來，10年舊藥將會取締5年成為新標準，尤其係乳癌好惡嗰D病友。另外仲有一樣野要留意，就係食舊藥Tamoxifen時要戒口（SSRI嘅抗抑鬱藥／西柚，詳見乳癌食療及食物禁忌－戒食雞？戒豆漿？）中年更年期嘅你更年期即係就黎收經，收咗經，自然多一個選擇，可以揀新藥AI。「新藥AI有咩副作用？」有部分病友會覺得骨痛，尤其係第一個月同埋手指D細關節，之後食慣咗會好D。另外AI會導致骨質疏鬆。「我見有3隻AI（Femara／Aromasin／Arimidex），佢地有咩分別？」主要在於唔同生產商，個個都話自己好過人，你見3隻分庭抗禮，冇一隻做到「AI霸權」就知臨床冇大分別。有D病友總覺得人地嗰隻好D／冇咁骨痛，純粹「老公更係人地嘅好」心理作用居多。通常正廠藥大概$1300－$1800蚊度一個月，不過Femara過咗專利，有代用品副廠藥$140蚊一個月，想慳錢係一個好選擇。（2016年1月更新：Femara過了專利權已經再次大降價，副廠藥現價為＄1一粒，即最平頭兩年每月＄30）多咗一隻藥，咁選擇上除在上面「後生未收經嘅你」嗰3個之外，多咗一款轉藥／混合食法「先食舊藥Tamoxifen，直到停經，之後就轉AI，食夠5年為止」「咁邊個食法好？」臨床有證據證明轉藥／混合食法好過5年舊藥。正正因為呢個原因，所以公立醫院AI第三年開始免費。好多病人都問點解唔係一開始免費，因為香港政府諗縮數得黎，又想宣傳佢守護生命的故事。「咁轉藥食法好D定10年舊藥好D呢？」冇人知。因為10年舊藥係新食法，同轉藥食法冇臨床比拼研究，所以冇人答到你，不過一般聽落去都係5年轉藥食法吸引D啦，食少5年喎。已收經嘅你一開始已經收咗經嘅你，又多一個選擇，就係一開始就食新藥AI5年。「咁今次又邊個好D呢？」 5年新藥AI好過5年舊藥，主要少D復發，不過命仔冇再長D。 5年新藥對轉藥食法／10年舊藥，又係冇證據冇人知邊個好，不過5年新藥頭2年藥費要自己比錢（$1000×12個月x2年＝$24000），對於手頭唔係特別鬆嘅病人，錢係一個重要因素。（＄30×12個月x2年＝＄720），而家副廠藥價錢已經好親民，錢已經唔係一個重要因素。揀啱適合自己嘅計畫，乖乖咁日日keep住食，幾年好快過。已完成乳癌治療嘅你唔經唔覺我地一齊走過咗人生最黑暗嘅日子，由發覺自己有事，到搵乳癌醫生，做乳癌檢查三步曲，確診要接受治療，做人生第一次手術，谷鬼氣咁同保險公司周旋，好難捱咁捱過化療加標靶治療，當然唔會忘記日日返醫院攰到死嘅電療日子，同埋食足幾年嘅抗荷爾蒙藥。恭喜你！！你同屋企人終於可以過返D正常日子，而我www.breasthk.com呢度亦都冇爛尾。Breast HK? Best in Hong Kong！從而Bless Hong Kong。我地一齊Keep住呢份無私嘅互助精神啦，香港人～既然已經講晒乳癌治療五大主力，都係時候幫你由你嘅角度歸納一吓，我會開一個新嘅系列「乳癌治療攻略」：進一步幫你諗埋作戰大綱，一於看圖識字／按圖索驥，睇住自己第幾期，就知條路要點行落去，以後唔洗再怕「有乳癌怎麼辦？」乳癌零期治療攻略－原位癌有咩咁特別？乳癌一期治療攻略－早期都要做化療？乳癌二期治療攻略－做手術先？做化療先？乳癌三期治療攻略－醫好機會大唔大？乳癌四期治療攻略－末期仲有冇得醫？乳癌復發治療攻略－求生大作戰懷孕中乳癌治療攻略－腹中BB點算好？老人家乳癌治療攻略－唔做手術／治療得唔得？

The post 乳癌荷爾蒙藥－不同年紀嚴選最正確食法 appeared first on 香港乳癌及乳病治療中心 Hong Kong Breast Cancer And Disease Centre.

乳癌荷爾蒙藥－究竟食咩藥？

HK Breast — Wed, 07 Jun 2017 10:27:38 +0000

醫生叫我食5年抗荷爾蒙藥，但佢比兩隻藥我揀，咩新藥舊藥咁，咁究竟我應該食咩藥？食幾耐？幾多錢？唔會好似化療咁有副作用架？今次我地研究吓「乳癌荷爾蒙藥」呢個課題⋯⋯ 同乳癌手術一樣，未講有咩抗荷爾蒙藥比你揀之前，先要搞清楚你有冇資格揀。有冇資格揀？「吓？！資格？咩資格？我點先知自己合唔合資格？」因為唔係所有乳癌病人都要食藥，就算要食藥都唔係隻隻抗荷爾蒙藥都啱，所以要知道三樣野，先知有咩藥啱你洗。「咁邊三樣野？」第一樣野要知嘅當然係你隻乳癌係咪ER＋（陽性）。唔知咩係ER＋嘅朋友，返去睇返「乳癌治療時間－我需要用咩方法醫？2」「乳癌荷爾蒙治療－點解我仲要食藥？」。 1. ER＋定－？如果係ER＋（陽性），請睇落去。如果係ER－（陰性），唔洗睇落去，因為食藥冇幫助。「我係ER＋呀，咁第二樣野係？」第二樣就要知道你隻乳癌係原位癌定係有侵蝕性。 2. 原位癌定侵蝕性癌？原位癌冇得揀，只可以食舊藥Tamoxifen5年，因為冇臨床證據話新藥／10年舊藥喺原位癌有效。（2016年1月更新：而家已經有一D新證據話新藥（AI）喺原位癌都有效預防復發，尤其係收經後及60歲以下女士可能更見優勢。呢D係一D好新嘅野，詳細問返自己醫生。）「我係原位癌呀，但我個醫生叫我唔洗食藥喎，但你上面又話食5年舊藥，即係點呀？」喺原位癌個情況食唔食藥，係有2派學說，我地先睇吓食咗5年舊藥Tamoxifen，15年內有咩著數先：同一邊侵蝕性復發由9%降至6.6%。另一邊侵蝕性復發由5%降至3.3%。另一邊原位癌復發由2.8%降至1.6%。存活率冇分別，都係9成人有15年命以上。醫生話唔洗食藥，主要係佢將個重點放係存活率度，食咗藥15年都冇長命到，更係唔食啦。醫生話要食藥，主要係佢將個重點放係復發度，減少復發理應減少擴散，理應會長命D，雖然15年覆診未證明到有分別，可能再長期D會有分別呢。「咁Breast HK你建唔建議食呢？」我會睇你年紀同埋態度進唔進取。後生／進取，食。點都好過食埋D冇根據嘅健康產品／試埋D古靈精怪另類療法。年老／保守，唔食。另一方面，如果係侵蝕性乳癌，就一定係食好D，不過點食法就要睇第三樣野。「咁咩係第三樣野？」第三樣野就係你收咗經未？ 3. 你收咗經未？「收唔收經都關乳癌事？」仲記唔記得上篇講到你要控制男人，就要扣佢零用錢，咁第一個問題姊妹要問嘅就係「你D錢邊度黎？」醫生要控制乳癌，就要對抗女性荷爾蒙，咁第一個問題醫生要問嘅就係「你D女性荷爾蒙邊度黎？」未收經，女性荷爾蒙主要來自卵巢。收經後，卵巢收工，女性荷爾蒙主要來自脂肪。「我割咗子宮冇經期喇喎～」冇經期唔等如收經，例如有D人因為子宮肌瘤割咗子宮，但仲保留卵巢而又未到收經年齡（香港女性平均52歲收經），咁係乳癌角度就當仲未收經。乳癌荷爾蒙藥：舊藥 vs 新藥「咁我地知道女性荷爾蒙來源又點？同食咩藥有咩關係？」原來口服乳癌抗荷爾蒙藥只係得4隻，分為兩類： 1）Tamoxifen 他莫昔芬－同醫生溝通時識讀就照讀英文，唔識讀都唔好講「他莫昔芬」，我幾肯定醫生「他唔識分」，就咁叫「舊藥」醫生就明㗎喇。佢主要抑制女性荷爾蒙作用，所以咩年齡都用得。 2）Aromatase Inhibitor （AI）芳香環轉胺酶抑制劑［包括Femara（Letrozole），Aromasin（Exemestane），Arimidex（Anastrozole）］－又係識讀就照讀英文，唔識讀都唔好講「芳香環轉胺酶抑制劑」，我自己試讀一次都好似鬼上身咁唔知自己噏乜，就咁叫「新藥」或者「AI」醫生就明㗎喇。佢主要抑制脂肪製造女性荷爾蒙，所以收經後嘅女性先用得。（2016年1月更新：Femara過了專利權已經再次大降價，副廠藥現價為＄1一粒，即最平頭兩年每月＄30）未收經，冇得揀，只可以食舊藥Tamoxifen。收咗經，有得揀，可以揀食舊藥Tamoxifen或者新藥AI。「如果我有得揀，究竟新藥AI好D？定係舊藥Tamoxifen好D？」新藥好少少，主要係少D復發（8年復發率由13.4%降至10.7%），不過整體存活率冇分別。所以由治療角度，有得揀就揀新藥AI啦。如果冇得揀要食舊藥Tamoxifen，千祈唔好心灰，其實都係好野黎，先可以咁多年都屹立不倒，老字號嘛。「我見有病友先食舊藥Tamoxifen一排，再轉新藥AI嘅？」有以下幾個可能性： 1）更年期就收經：先食住舊藥Tamoxifen（通常2年），之後確定收咗經，就轉新藥AI食埋餘下年份，總共5年為止。 2）已收經想食新藥AI但唔想比錢：因為政府會全數資助尾3年新藥AI藥費，所以頭兩年就慳錢食住免費嘅舊藥Tamoxifen先。 3）已收經揀咗食舊藥Tamoxifen不過唔受得：例如敏感／有副作用。「嘩，又新藥又舊藥又先舊後新，仲加埋又5年又10年，頭都大喇，點揀呀？」就咁講有時都幾難明，等我得閒畫幾幅圖解釋過你聽，你就會明㗎喇。下次「乳癌荷爾蒙藥－不同年紀嚴選最正確食法」再見⋯⋯ 有唔明？係下面寫低佢，我會盡量解釋你聽⋯⋯ 封面圖片來源：互聯網

The post 乳癌荷爾蒙藥－究竟食咩藥？ appeared first on 香港乳癌及乳病治療中心 Hong Kong Breast Cancer And Disease Centre.

乳癌荷爾蒙治療－點解我仲要食藥？

HK Breast — Wed, 07 Jun 2017 10:24:17 +0000

我已經好乖咁做齊晒手術／化療／電療，點解醫生仲要我食藥？我見隔離位病友都唔洗嘅～「乳癌荷爾蒙治療」呢個方法效用大唔大？⋯⋯ 乳癌荷爾蒙治療 vs 抗荷爾蒙治療「明明聽人講女性荷爾蒙會刺激乳癌，點解仲要用『乳癌荷爾蒙治療』？唔怕荷爾蒙刺激佢咩？」聰明！正確黎講，係「抗」荷爾蒙治療先啱，但實在太多人講「乳癌荷爾蒙治療」喇，要同人溝通，當然要入鄉隨俗，講返同一樣語言先得。其實都唔洗理咩荷爾蒙又抗荷爾蒙，簡單D講，就係食藥，好似米雪咁講：「日日keep住食，藥箱都變成首飾箱」，當然唔係食佢推介嘅牌子。「咁D口服藥有咩用？」係用黎對抗女性荷爾蒙嘅。「點解要對抗女性荷爾蒙？」因為我地知道有D乳癌類型對女性荷爾蒙有反應，即係身體越多女性荷爾蒙，D乳癌細胞就會生得越快。食藥嘅目的，就係用佢黎對抗女性荷爾蒙嘅作用，等D乳癌細胞冇咗D刺激／源料，好似餓死佢地咁。乳癌對荷爾蒙嘅反應，就有如男人對錢嘅反應。圖片來源：互聯網因為我地知道有D男人對錢有反應，即係身體越多錢，D男人就會身痕得越快。唔比／扣起零用錢嘅目的，就係用黎對抗「有錢就身痕」嘅作用，等D男人冇咗D刺激／源料，好似餓死佢地咁。因此有經驗嘅姊妹都知道，唔好比太多零用錢男人，因為有錢男人就身痕。因此有經驗嘅醫生都知道，唔好比太多荷爾蒙乳癌細胞，因為有荷爾蒙乳癌細胞就身痕。咩人要食藥？「咁邊D乳癌類型先要食藥？」就係嗰D有荷爾蒙受體（Estrogen receptor (ER) ／ Progesterone receptor (PR)）嘅乳癌，即係你平時聽醫生講 ER＋（陽性）嗰D。呢類型嘅乳癌有荷爾蒙就身痕。「咁點解我隔離嗰病友唔洗食藥？」因為佢嘅乳癌對女性荷爾蒙冇反應，即係ER－（陰性），甚至三陰性乳癌。呢D乳癌就有如D衰男人，冇錢都身痕，你扣佢零用錢都冇用，所以係冇藥食。因此唔好理人洗唔洗食藥，最緊要問清楚醫生自己隻乳癌係ER陽性定陰性。「咁有藥食好D定冇藥食好D？」有藥食好D。有藥食，即係代表乳癌細胞有把柄被醫生捉住，有痛腳喺醫生手，咁醫生就可以易D控制佢。怕扣錢，即係代表男人有把柄被姊妹捉住，有痛腳喺姊妹手，咁姊妹們就可以易D控制佢。如果你個男人好壞，冇錢都身痕，你都幾難控制佢。如果你隻乳癌好惡（例如三陰性乳癌），冇荷爾蒙都身痕，你都幾難控制佢。「但我做完晒手術／化療／電療㗎喇喎，咩癌細胞都冇啦，仲講咩身痕唔身痕？」做完晒手術／化療／電療，「理論上」係冇晒癌細胞，不過我地見到有乳癌康復者幾年後先黎乳癌復發，就知道「實際上」好多你以為冇可能嘅野正正每日發生緊，所以做足D預防措施係好D。做足晒本份／入得廚房出得廳堂，「理論上」男人係冇晒身痕嘅理由，不過我地見到有「浪子回頭」幾年後又再出軌，就知道「實際上」好多你以為冇可能嘅野正正每日發生緊，所以做足D預防措施係好D。食藥有咩著數？「咁食藥呢D預防措施實際上有咩著數？」可以減低乳癌復發機會，命都長D。「復發機會減幾多？命長幾多？」如果食5年舊藥（Tamoxifen），15年內：復發率由46%降至33%。死亡率由33%降至24%。「嘩！乜咁高復發／死亡機會㗎咩？」呢個係一個整體平均數，會因你乳癌第幾期（乳癌分期 ﹣ 我係早期定末期？）／有冇用化療（乳癌化療需唔需要－著數計算機火併乳癌基因測試）／有冇打標靶（乳癌標靶治療－乳癌HER2型點樣揀？）／有冇電療（乳癌電療大解構－原來唔洗驚）／食咩抗荷爾蒙藥／食5年定10年而有所分別，所以唔好太在意實際數字，以上圖表只係想話比你聽2樣野： 1）如果醫生叫你食藥嘅話，最好跟足指示食，因為真係延年益壽。 2）唔洗戒口。食足5年舊藥Tamoxifen復發率／死亡率先降咁少／咁多，而日常進食所攝取嘅女性荷爾蒙只係佔非常非常非常之少嘅部分，就算任你好有恆心戒到好清，根本都幫唔到件事，仲戒口黎仲咩？（伸延閱讀：乳癌食療及食物禁忌－戒食雞？戒豆漿？）「你上面話5年舊藥，即係有新藥？係咪好D？」係有新舊藥之分，新藥好少少，不過唔係人人啱食。咁究竟你有冇得揀？新藥啱唔啱你食？食幾耐？貴唔貴？有咩副作用？下篇「乳癌荷爾蒙藥－究竟食咩藥？」為你解開疑團⋯⋯ 有唔明？係下面寫低佢，我會盡量解釋你聽⋯⋯ 封面圖片來源：御藥堂廣告截圖

The post 乳癌荷爾蒙治療－點解我仲要食藥？ appeared first on 香港乳癌及乳病治療中心 Hong Kong Breast Cancer And Disease Centre.

Anti-hormone 荷爾蒙治療 – 香港乳癌及乳病治療中心 Hong Kong Breast Cancer And Disease Centre

管腔A型管腔B型乳癌 － 不吸眼球的甘草

荷爾蒙受體陽性乳癌－是福還是禍？

乳癌荷爾蒙藥 － 不同年紀嚴選最正確食法

乳癌荷爾蒙藥 － 究竟食咩藥？

乳癌荷爾蒙治療 － 點解我仲要食藥？

管腔A型管腔B型乳癌－不吸眼球的甘草

乳癌荷爾蒙藥－不同年紀嚴選最正確食法

乳癌荷爾蒙藥－究竟食咩藥？

乳癌荷爾蒙治療－點解我仲要食藥？