Risk Factors 乳癌成因 – 香港乳癌及乳病治療中心 Hong Kong Breast Cancer And Disease Centre

乳癌基因突變－宿命真的無法逆轉？

HK Breast — Tue, 22 May 2018 08:59:48 +0000

對於懷疑自己有遺傳性乳癌的病友，下一步最合理做法就係去驗乳癌基因，究竟應該去邊度驗？點樣驗？收費如何？驗到BRCA基因突變又點樣處理？難道宿命真的無法逆轉？⋯⋯ 去邊度驗乳癌基因？「我已經check過自己係合適驗BRCA基因突變，咁究竟應該去邊度驗？」可以去私家驗，又可以去公立驗。「我唔介意比錢，私家邊度有得驗？」去私家邊度驗呢個話題太敏感，問返自己乳腺科醫生，有經驗嘅佢地自然會教你。「唓，咁公立講得喇掛？」公立冇咁野火就可以講，原來香港得東華醫院（上環嗰間，唔好搞錯東華東院）一間公立醫院有得免費驗，資金來源要多謝香港遺傳性乳癌家族資料庫資助的「香港遺傳及高危乳癌普查計劃」。香港遺傳及高危乳癌普查計劃「香港遺傳及高危乳癌普查計劃？呢個係咩計劃黎？」計劃目的就係資助「遺傳性乳癌－我洗唔洗驗基因？」文中七類乳癌基因突變高危人士，去做一個全面性的乳癌基因評估，如果驗到真係BRCA或其他基因突變，會轉介東華醫院的高危診所作更密切的監察。「點樣先可以參加到呢個計劃？」首先，當然你要係前文中七類乳癌基因突變高危人士。其次，就係要係經濟有需要人士，有錢嘅麻煩自己去私家驗。「我諗全港冇咩人冇經濟需要⋯⋯」個計劃就好似財務公司咁，絕對明白大家嘅經濟需要，所以喺何謂經濟有需要人士的定義上，條界線都仲係好寛鬆嘅，就定係公立醫院病人度。「即係係公立就得？」係，唔洗入息審查的，只要有公立戶口就得（所以私家公立兩邊睇嗰D都得，純私家冇公立戶口就唔得喇）。「咁好簡單，我有公立戶口，不過唔係喺東華醫院跟，咁下一步應該點做？」好簡單，叫公立醫院醫生（私家唔得）寫封轉介信去東華醫院C5乳腺科，講明你係乳癌基因突變高危人士，想參加香港遺傳及高危乳癌普查計劃就得喇。「之後會點？」之後就係漫長的等待。「等乜野？」等姑娘聯絡你填一份幾十頁的問卷，等見心理學家作基因測試前評估，等抽血驗基因，等出報告，等見醫生講解報告。等呢一堆野講緊等幾年，冇聽錯冇睇錯，係等幾年。「嘩，等幾年我咩咗喇」冇辦法，免費加好野等如要等，唔等得只可以自費去私家驗。「咁私家驗幾錢度？」兩萬到兩萬幾度。「暫阻唔好理我去邊度驗，我反而想知如果我真係BRCA基因突變，我之後要點做？」咁就要分開兩大類人去睇，究竟你係已經有乳癌，定係仲係健康（只係因為屋企人有事，先至驗到自己有事）。 BRCA基因突變的乳癌患者之前講過乳癌治療有五大主力，佢地同一般乳癌患者都有D特別的地方要留意： 1）手術：有D證據話BRCA基因突變如果選擇乳房局部切除的話，係會易D復發（因爲本身乳房組織冇咗個教車師傅係好唔穩定），所以簡單D去睇，就係會傾向多D全乳切除。如果真係接受唔到全乳切除，執意要保留乳房，某程度上要做足其他輔助治療（切卵巢，食抗荷爾蒙藥，化療）先可以有得傾。除咗切除有事個邊之外，仲會考慮預防性咁割埋冇事嗰邊（contralateral prophylactic mastectomy），因為咁樣可以9成幾降低第時冇事嗰邊的乳癌風險，就好似明星安安祖蓮娜祖莉咁。圖片來源：People, TIME 2）化療：有D早期證據話carboplatin同BRCA基因突變的病友夾D，所以好多時醫生會揀Taxol-Carboplatin的組合。 3）標靶治療：冇分別。 4）電療：都冇分別，但因為傳統覺得乳房局部切除係會易D復發，所以變相會少D病友電療。 5）荷爾蒙治療：都係食Tamoxifen或者AI，不過多埋預防性切卵巢（prophylactic oophorectomy），一來希望預防卵巢癌，二來仲可以減低乳癌復發。醫好咗之後就係密切監察，主要比一般乳癌患者要額外每年照乳房磁力共振（呢次要用到最靈敏但唔準確的檢查，因為乳房本身真係易出事），同埋每年照盆腔超聲波（如果未切卵巢的話）。 BRCA基因突變的健康人士對於健康人士，主要方向都係由密切監察同預防式治療入手：密切監察（根據NCCN Guidelines for Genetic/Familial High-Risk Assessment: Breast and Ovarian, Version 1. 2018）： 1）女士： 18歲起：要多留意自己乳房變化 25歲起：每半年至一年揾乳腺科醫生檢查，每年照磁力共振「或」乳房造影（如果做唔到磁力共振時） 30歲至75歲：每半年至一年揾乳腺科醫生檢查，每年照磁力共振「及」乳房造影，考慮每年陰道超聲波同埋抽血驗卵巢癌指數CA125。 75歲以上：同醫生傾可唔可以放鬆返少少，唔洗監察得咁密。 2) 男士： 35歲起：每年揾乳腺科醫生檢查 45歲起：開始每年探肛檢查前列腺，同埋抽血驗前列腺癌指數PSA 預防式治療： 1）預防性全乳切除 2）預防性卵巢切除：BRCA1基因突變的病友就通常35－40歲度當完滿家庭時做，BRCA2基因突變的病友就可以拖到40－45歲先做（因為通常遲D先出事）。 3）抗荷爾蒙治療：未有病都可以食5年藥去減低風險。「清楚晒⋯⋯」當你清楚晒乳癌遺傳基因，應該去邊度驗、點樣驗、收費如何、驗到BRCA基因突變又點樣處理，哪怕乳癌基因突變，故事劇本好似一早寫好咗咁，但原來都仲可以選擇偏離劇本，好好咁演活呢個角色，仲係有條出路等待你去發掘，齊來逆轉宿命，加油！封面圖片來源：Vintagelife

The post 乳癌基因突變－宿命真的無法逆轉？ appeared first on 香港乳癌及乳病治療中心 Hong Kong Breast Cancer And Disease Centre.

遺傳性乳癌－我洗唔洗驗基因？

HK Breast — Sat, 14 Apr 2018 12:08:38 +0000

「死啦死啦，我有乳癌，會唔會遺傳比阿女？」「問唔問醫生好呢，阿媽有乳癌，我洗唔洗驗下？」一個個、心思思、囉囉攣的問題，隨著自己或家人確診乳癌而展開⋯⋯ 乳癌會遺傳嗎？「醫生醫生，我兩個女好細咋，我有乳癌會唔會遺傳比佢地？」一個最常見完成乳癌治療的後續問題。一個最簡單但會比人噓的答案「有機會」。「咩叫有機會？」有機會即係有可能會遺傳，有可能唔會遺傳比佢地。「XYZ（聲音經過處理）」雖然唔滿意，但實話實說，事實真的如此。原來醫學界認為95％的乳癌為偶發性（sporadic），即係唔關人事，唔好賴阿媽。5％為遺傳性乳癌，即係關父母事，唔好賴曬阿媽。（注：有10－15％乳癌病友有家人患乳癌，但唔係全部都係醫學界認為的遺傳性乳癌，小心留意佢地之間係有分別的。）「唔好賴曬阿媽？即係可能係遺傳自阿爸？」正確。你一出世，一半基因來自阿爸，一半基因來自阿媽。是但一個有乳癌基因突變都有機會遺傳比你，亦代表咗兩邊家族的病歷史同樣重要。乳癌相關基因「咁有咩基因係同乳癌相關的？」原來嗰5％的遺傳性乳癌，當中超過95％都係一個叫BRCA（其中有分BRCA1同BRCA2）的基因出咗問題。（其餘嗰D罕有基因突變如PTEN, TP53就暫且不談）「咁BRCA基因又係咩？出咗問題又點？」 BRCA基因詳細係咩唔洗理，D悶野wiki大把，識得睇呢度當然睇比喻。你可以睇成BRCA基因係一個教車師傅。「教車師傅？」圖片來源：蘋果日報即係當個學神學車出問題時，幫佢修正問題的救星。我地嘅身體每日都會生長，外在實在有太多東西會令呢個過程出錯，例如輻射、致癌物質等，就好似學神學車總會出錯，有機會超速有機會撞車。教車師傅坐係隔離嘅目的，就係當你超速時幫你剎車。 BRCA基因存在嘅目的，就係當你身體細胞不受控生長時幫你叫停。乳癌基因突變「明明地，咁咩係BRCA基因突變？」 BRCA基因突變，即係冇咗個教車師傅坐係學神隔離。圖片來源：蘋果日報雖然冇咗教車師傅唔代表學神一定撞車，不過都好易出事。雖然BRCA基因突變唔代表一定生癌，不過都好易出事。「即係BRCA基因突變後易D生癌？」 Bingo，唔止係易D生癌，仲係易D生某種癌症。「咁邊一D癌症係有關聯？」原來BRCA基因突變，係會易D有乳癌、卵巢癌、前列腺癌、胰臟癌。「即係如果有BRCA基因突變，就會生乳癌、卵巢癌、前列腺癌、胰臟癌？」唔係必定生，係易D生。機會率唔同研究有唔同結果，不過以下數字引述自一個大型研究，可以比到D印象你： BRCA1基因突變：到八十歲，72％機會有乳癌，44％機會有卵巢癌。 BRCA2基因突變：到八十歲，69％機會有乳癌，17％機會有卵巢癌。「咦，我屋企人有肺癌、肝癌、腸癌，呢D冇關係㗎咩？」同BRCA基因突變冇關係。乳癌遺傳機率「咁如果我阿媽有BRCA基因突變，有幾大機會遺傳比我？或者我有BRCA基因突變，有幾大機會遺傳比我仔女？」如果講基因遺傳就相對簡單，BRCA基因突變的遺傳特性係autosomal dominant（常染色體顯性），即係每一個下一代有50％機會遺傳到呢個突變。但如果講乳癌遺傳就相對複雜，因為遺傳基因突變唔等如遺傳生癌，遺傳到呢個BRCA基因突變（即係天生冇教車師傅），都仲要睇埋penetrance（即係上面的患癌風險），再加上其他risk modifiers（風險改變因素，例如預防性手術），先可以對風險有D眉目，不過聽都知好難計，人人情況唔同，冇可能有一個簡單數字比到你。乳癌基因檢測「我成日都懷疑我的乳癌係關遺傳事，點先可以驗下係咪BRCA突變？」通常都係搵乳腺科醫生睇咗先，畫埋家族圖譜（family tree），睇下邊個最可疑（我地叫index case），通常係最後生乳癌病發嗰個，嗰個抽血去驗咗基因先，如果真係驗到有BRCA突變，其他屋企人先去驗。「我就咁去驗唔得咩？」唔係唔得，不過驗到有野嘅機會好低，即係9成哂錢。「唔係就咁去驗，咁咩人去驗先啱？」跟美國NCCN Guideline就話，以下7類人可以考慮驗BRCA基因突變： 1）50歲或以下患乳癌（註：因為香港相對早病發，所以傾向用45歲做分界） 2）60歲或以下患三陰性乳癌 3）雙邊乳癌 4）多次患乳癌 5）男性乳癌 6）有其他BRCA突變相關癌症（乳癌、卵巢癌、前列腺癌、胰腺癌） 7）家族病史（一個或以上的家人於50歲或以下患上乳癌；一個或以上的家人患上卵巢癌；兩個或以上的家人患上乳癌／前列腺癌／胰臟癌）「咦，我中咗以上條件喎，咁我應該去邊度驗？」究竟合適條件嘅朋友應該去邊度驗？點樣驗？收費如何？驗到BRCA基因突變又點樣處理？下一回「乳癌基因突變－宿命真的無法逆轉？」為你分解。相關醫學專欄：乳癌「哥士的」－萬用的基因測試封面圖片來源：helix.com

The post 遺傳性乳癌－我洗唔洗驗基因？ appeared first on 香港乳癌及乳病治療中心 Hong Kong Breast Cancer And Disease Centre.

乳癌成因：我易D生乳癌嗎？

HK Breast — Wed, 07 Jun 2017 09:02:45 +0000

「究竟我有冇患乳癌嘅高危因素？」睇報紙／網上資訊，樣樣都係高危因素，你一定中幾樣（就好似讀者文摘啲抽奬咁，你一定中㗎。）咁中咗又有幾影響患乳癌嘅機會呢？呢篇有你想知嘅野⋯⋯ 你帶個男朋友返去比阿媽睇，大家都係毒男樣（同樣病徴）如果男仔冇家底（高危），阿媽會話：「毒男（癌）黎喎，阿女小心。」；如果有家底（低危），話之佢50歲禿頭，阿媽都會話：「鑽石王老五黎喎，阿女唔好咁膚淺淨睇樣，好仔黎㗎（良性腫瘤）。」醫生同阿媽都一樣唔膚淺，睇病係睇你㡳蘊。你高危嘅，話之你病徵唔太可疑，一樣要小心。相反，你低危嘅，就算病徵好可疑，低危就係低危。乳癌的高危因素隨隨便便，我都可以列舉一大堆患乳癌嘅高危因素：女性／年紀大／曾患乳癌／有家族病史／早初次黎經／遲收經／從未懷孕／冇餵人奶／長期用口服避孕藥／收經後肥胖／收經後用荷爾蒙補充劑／黑人／酒精／早年曾受胸腔電療。就咁講完，係好多醫生／網頁嘅做法。聽完你只會有兩個反應，跟得切嘅就會話：「死喇死喇，我中喇⋯⋯又中⋯⋯又中⋯⋯」就好似啲星級補習名師上咗身話齋：「這才是中！」跟唔切嘅就會話：「醫生，我唔明」。你唔明，醫生再慢啲講多次，你都唔會明，唔係你蠢，而係咁多個因素互相影響，好難講得埋有幾差。呢啲又唔係六合彩有分特別號碼，我中呢四個，你中嗰四個，邊個衰啲？邊個係特別號碼？唔好話你唔明，你叫醫生比個具體啲嘅數字你，佢都好難做到。點去理解？「吓？咁無奈？」又係唔哂，我都有四樣野講到過你聽： 1）越中得多，越高危（好合理吖） 2）要睇重一啲重中之重嘅因素：女性／年紀大／曾患乳癌／有家族病史，呢四大天皇，緊要過其他二打六。 3）要改變一啲可改變嘅因素：你睇以上四大天皇，有邊個可以改到？唔通真係地鐵站廣告「肌齡回復」咩。你可改變嘅就係「唔好食避孕藥、早啲生小朋友、餵多啲人奶、收咗經唔好食荷爾蒙補充劑、但又要努力保持競爭力（瘦）、同埋唔好飲酒。」 4）早初次黎經／遲收經／黑人／早年曾受胸腔電療，呢啲又唔緊要又改變唔到嘅，算吧啦，佢地嘅重要性等如隔離陳師奶話：「你生野呀？都幾黑仔喎。」冇意思。患乳癌機率計算機「Breast HK，一開始你又話會講『中咗有幾影響患乳癌嘅機會』嘅，而家又講到醫生都比唔到實在數據我，咁即係點？」本地醫生唔係好興計機會率，不過外國就好興呢家野。其中一個喺外國好出名、經過驗證嘅計算患乳癌機率計算機叫Gail Model，你可以喺美國政府嘅官方機構National Cancer Institute 度搵到（呢方面，美國D大國的確係做得好） Breast Cancer Risk Assessment Tool 圖片來源：National Cancer Institute 圖片來源：National Cancer Institute 你入晒啲資料入去，佢就會話比你聽黎緊5年／呢一生人（到90歲）中招嘅機會率。圖片來源：National Cancer Institute 要套用到香港，我估要將它計算出黎嘅機會率除2，因為美國嘅乳癌病發率係高香港一倍。不過人算不如天算，好多野都係講運，與其機關算盡，不如珍惜所有，抱緊眼前人。下一篇同大家講吓一個好重要嘅題目⋯⋯ 乳癌分期 ﹣ 我係早期定末期？封面圖片來源：互聯網

The post 乳癌成因：我易D生乳癌嗎？ appeared first on 香港乳癌及乳病治療中心 Hong Kong Breast Cancer And Disease Centre.

Risk Factors 乳癌成因 – 香港乳癌及乳病治療中心 Hong Kong Breast Cancer And Disease Centre

乳癌基因突變－宿命真的無法逆轉？

遺傳性乳癌－我洗唔洗驗基因？

乳癌成因 ： 我易D生乳癌嗎？

乳癌成因：我易D生乳癌嗎？