仲記唔記得一年半前的承諾？我話過會幫機構整一個香港乳癌app。嗰時問大家攞意見，究竟一個點樣嘅app先幫到大家走呢條乳癌抗癌路，大家比咗好多好好的意見我，但由於現實技術的限制，好多好建議都未能夠付諸實行住，但唔緊要，做得幾多得幾多，呢個app終於同大家見面：乳日誌 Breast Friend⋯⋯ 未開始介紹個app之前，當然要下載咗先： iOS 版本：乳日誌 Breast Friend Android 版本：乳日誌 Breast Friend 下載完成後第一步就係要登記： 開頭設計團隊諗，由於內容可能涉及私隱，咁一定要登記啦，一般D app都係用email登記，但問題黎喇，好多公公婆婆雖然有智能手機，但其實係冇email嘅，就算有都好有可能唔識check或直情唔check，所以設計團隊決定用電話號碼登記，咁就唔怕老人家唔識登記。登記完後就會收到SMS短訊啓動碼，輸入埋就可以開始用。 另外所有資料都加密曬，咁就唔怕比人hack server，個人私隱洩漏等問題。 登記完成後就可以進入嗰app，成個app由三大核心所組成：覆診日曆、電子病歷、個人日誌。 覆診日曆 第一大乳癌患者或家屬所面對的問題就係覆診，治療初期去得醫院又密又亂，好容易搞錯日期地點，治療完成後去覆診又會疏到大頭蝦唔記得咗。所以智能手機最好嘅一樣野就係日曆calendar ，佢可以幫到我地記底幾時去覆診，仲可以較埋幾時通知我地（notification）。 「咁我用內置嗰calendar app都得啦，洗鬼你呢個app～」 啱，所以設計團隊要係內置calendar app 嘅基礎上再改進。 第一樣諗到嘅問題就係私隱。因為有些大忙人的朋友，本身嗰calendar 已經佈滿自己的約會，咁如果個乳癌app嘅calendar 本身既可以獨立（就唔會發生錯手比人睇到calendar 時，會泄露自己覆診的秘密），又可以融合（需要時就整合），咁就perfect。 第二樣諗到就係家屬陪覆診問題。好多仔女都好有阿媽心，會陪阿媽覆診，不過擬於要揾食的原因，好多時幾兄弟姊妹要分工合作，一時你去一時我去。人多時，夾時間都係一個痛點。 咁有一個share calendar 就正喇，陪覆診嗰個人update 個calendar 幾時覆診，其他人就算今次冇陪阿媽都知下次幾時再去，夾時間都方便D。其實google calendar 都有呢個功能，不過又要登記又要email又要setup，唔係人人識用。咁整合埋落個app到就方便好多。 第三樣就係叫得智能手機app，可唔可以智能少少，減省人手輸入咁咪方便D囉。所以揸住張覆診紙，影一張相，咁佢就會upload 上server認，好似D咭片皇app咁，幫你自動create 埋appointment，另外張相都會儲存低，咁就算唔見咗張實體覆診紙都冇咁驚。不過由於開發嗰時，只得瑪麗醫院同東華醫院參與，其他醫院D覆診紙唔知認唔認到。 電子病歷 去到第二個核心「電子病歷」，其實靈感來自香港乳癌基金會本「my journey 」，佢地本身都係借鏡Breast Cancer Network Australia本my journey kit。不過好多病友反映本野內容太煩亂鬆散唔想填，就算填咗都唔會帶係身，變相變得冇用。 電子版又唔同講法喇，有電話就等如有病歷，咁入曬D資料入去，究竟病理報告係點、期數係幾多、幾時開始化療、幾時開始食藥等等，就算公立私家兩邊走都一樣一清二楚。尤其醫生成日失驚無神玩答問比賽，例如問幾時開始食藥去決定幾時停藥，真係唔記下來真係比醫生考起。 另外呢個電子病歷都係可以share比親友嘅，咁老婆有咩事老公都一清二楚，或者阿媽唔識入咁多野，就仔女入完再share 返出黎比阿媽或者其他兄弟姊妺，又或者家族遺傳嘅幾姊妹都知大家情況。 個人日誌 至於個人日誌有咩用呢？主要都係舒發情感（尤其一D難以啟齒的內容就最啱），一方面可以好似私密日記咁，記底自己的心路歷程高山低谷。另一方面亦可以選擇性分享比身邊人知，等其他人亦可以了解多D患者的內心世界，及時作出適切支援。 但市面上咁多social networking嘅app，又Facebook 又微信圈，咁呢個function仲有咩用呢？其實市面D app就係想open想開放，乳日誌就係想close想私隱。你諗下，莫講話喺facebook公佈自己有乳癌要有莫大勇氣，尤如明星公佈出櫃咁震撼，就連like吓breasthk都怕D八掛精問你仲咩like D咁嘅野。所以私私密密就最啱，一來同自己其他account 嘅內容分開唔怕比人起底，二來鍾意同邊個share先分享比嗰個人。 三來個app專登設計成冇得comment冇得like，對身邊人可以減少壓力，唔洗再比人問點解我出咗post你唔like唔回應，或者點解藍剔剔只讀不回。所以返璞歸真，想回應就心動不如行動，現實世界搵吓人啦，唔再沉迷網絡世界，反而可以拉近彼此距離。 圖片來源：信諾電視廣告截圖 再有用嘅App都會有outdated 嘅一日，留低喺手機嘅除咗係一個廢app，仲係一份心意、一段記載住我地一齊走過嘅路，而呢段路最終都唔再係負擔。
The post Breast Friend 乳日誌 － 留低嘅係一份心意 appeared first on 香港乳癌及乳病治療中心 Hong Kong Breast Cancer And Disease Centre.
]]>