Surgery 手術 – 香港乳癌及乳病治療中心 Hong Kong Breast Cancer And Disease Centre

乳癌淋巴水腫－真係冇得搞？

HK Breast — Wed, 07 Jun 2017 11:34:11 +0000

「醫生，我有冇淋巴水腫？」「你而家冇。」呢個時候病友總覺得張家輝會上醫生身：「你而家冇，但係將來會有⋯⋯」究竟咩係淋巴水腫？有咩咁得人驚？有冇得預防？有冇得根治？呢篇為你解開重重疑團⋯⋯ 什麼是淋巴系統？「我知！排毒系統！」淋巴系統並唔係坊間所講嘅排毒系統。「唔係喎，我嗰美容師真係咁講喎！」如果佢可信，消委會就唔會收咁多投訴。「咁淋巴系統即係咩系統？」我唔打算好學術咁講佢係咩黎，作為病友，你可以簡單咁當佢係一個液體回收系統。「咩野液體回收系統？」打個比喻，就好似水嘅循還回收系統。水每一日都會蒸發，積聚成雲之後落雨，經過雨水渠收集，去返水塘比我地再用。雨水就係淋巴液，雨水渠就係淋巴管道。我地身體每一日都會製造淋巴液，積聚係身體之後就會經過淋巴管道收集，去返血液循環比我地再用。「咁咩係淋巴水腫？」淋巴水腫就係當淋巴管道受損，淋巴液回收唔到，積聚喺手臂，搞到手腫。水浸就係當雨水渠受損，雨水回收唔到，積聚喺路面，搞到水浸。淋巴水腫症狀「手腫又有咩問題？」視乎嚴重程度，你可能覺得隻手好重好墜，郁得冇咁靈活，著衫／買衫有困難，甚至好谷好痛。受影響嘅手亦都會易D感染。「好似好得人驚咁喎，咁一開始淋巴管道點解會受損？」乳癌治療有兩樣野會令淋巴管受損：手術同電療。手術講緊腋下淋巴手術，切斷呢D雨水渠，好易理解點解會水浸。越切得多淋巴，好自然越易水腫，所以全淋巴切除係易過只切前哨淋巴有水腫。電療同樣道理，如果電腋下淋巴呢D位置，係會有機會傷到呢D雨水渠。另外，如果好多癌細胞擴散去腋下淋巴，塞曬D雨水渠亦都可以搞到水浸。預防淋巴水腫「咁有冇得預防淋巴水腫／預防水浸？」可以由以下幾方面去睇吓點樣預防水浸： 1）好好保護僅餘的雨水渠：正如人地有10條渠，你得返5條渠，咁唔該你好好保護佢地，你係易D水浸嘅。所以姑娘會教你唔好係呢隻手量血壓／抽血／打針，呢D動作我地怕佢會傷到剩落黎嘅雨水渠。 2）唔好落大雨：你嗰5條渠平時細雨可能都夠用，黃紅黑雨梗係水浸。所以姑娘會叫你唔好浸溫泉／焗桑拿／做劇烈運動／拎重野，因為呢D動作係會令血管擴張，增加淋巴液分泌（令到落大雨）。另外亦都要避免受傷，例如避免蚊叮蟲咬／寵物爪傷／小心D剪指夾，因為發炎又係會增加流量。淋巴水腫治療「死啦，我已經水浸咁點？」最簡單醫生會叫你得閒／訓覺「浪」高隻手，因為水向低流，幫一幫／理順雨水渠嘅積水。「試過，唔係太幫到⋯⋯」下一步就係美容師／按摩師最鍾意嘅「淋巴水腫按摩」。淋巴水腫按摩／物理治療「咦咦咦，你又話佢地呃人嘅？」佢地鍾意sell客姐，佢地係唔識嘅。因為真正嘅「淋巴水腫按摩」並唔係佢地大大力咁到你好毒就「通咗淋巴／排咗毒」，相反，亂咁按係會傷到剩落黎嘅雨水渠。「咁咩係真正嘅淋巴水腫按摩？」真正嘅淋巴水腫按摩（Manual Lymphatic Drainage，MLD）喺由受過專業訓練嘅物理治療師去做，係好溫柔嘅（就好似你嘅性格咁）。原理係「好輕、好柔、好慢」咁去疏導積水，你而家手部嘅雨水渠去唔切水麻，物理治療師就將呢D積水掃去／引去身體其他冇積水嘅地方，等D積水可以由其他通暢嘅雨水渠回收。「咁自己按唔按得？」當然得，物理治療師唔會跟你一世嘅，你可以自己／另一半跟物理治療師學，有樣學樣唔難學。文章最底段片都有教少少，或者以下條link都圖文並茂：淋巴水腫按摩另外如果唔介意比幾百蚊，香港乳癌基金會有開班教點樣做淋巴水腫按摩，可以自己打去25256033查詢／報名，其他淋巴水腫服務／收費如下：淋巴水腫服務收費表「我見其他病友用壓力衣／袖，又係咩原理？」普通壓力袖嘅原理就好似掩耳盜鈴咁，封咗雨水渠入水口，等佢就算唔通暢都倒灌唔到。圖片來源：互聯網如果淋巴水腫嚴重，就要靠物理治療師幫你紥壓力繃帶，佢會紥到越近遠端（手掌）壓力越大，目的係希望製造壓力分野，咁D水自然由高壓區（手掌）流去低壓區（身體），同「浪」手水向下流原理差不多。圖片來源：互聯網「人地話搭飛機一定要著壓力衣／袖，係真唔係真？」佢地覺得飛咗上天係低壓區，同埋長途機手部活動減少，易D誘發淋巴水腫，所以建議著壓力袖去預防水腫。至於係咪真係預防到呢？冇好強嘅科學證據去支持呢個說法，不過作為一個簡單易行嘅建議，做吓又冇防嘅，信則有不信則冇咁囉。淋巴水腫治療機「有人sell我淋巴水腫治療機，又得唔得㗎呢？」圖片來源：互聯網佢原理同上面壓力繃帶差不多，都係製造高壓低壓區。不過因為用機嘅關係，所產生嘅壓力可以大得多。亦都正正因為呢個原因，唔識／唔清楚了解自己做緊咩嘅，我建議唔好亂咁試，怕嘅係怕過大嘅壓力（大過50mmHg）傷到剩落黎嘅雨水渠，令到情況越做越衰。「我睇書／網上資料講到咩淋巴水腫沒法根治，其實係咪真係咁灰？」傳統黎講，淋巴水腫真係一個棘手問題，如果唔係都唔會有以上五花百門嘅建議／你都唔會咁好心機睇到呢度。不過呢度係要帶來希望嘅地方，我地唔應該咁灰嘅。「咁你有咩希望比到我？」近年原來淋巴水腫可以試吓做手術。淋巴水腫手術「乜原來淋巴水腫有手術做㗎咩？」近年興起兩款手術：駁通小淋巴管（lymphovenous／lymphaticovenular anastomosis)同埋淋巴移植（lymph nodes transfer)。兩款之中，以淋巴移植效果比較令人鼓舞。做法就係全身麻醉底下，整型科醫生喺大脾攞一D淋巴移植上去腋下。理論上呢D淋巴可以落地生根／刺激腋下淋巴管生長，就好似重新鋪設一D雨水渠，從而改善積水情況，甚至根治水浸問題。淋巴水腫運動坐咗喺電腦前睇咗咁耐，係時候去片郁吓做吓運動，呢段片係由網友upload去YouTube，版權屬於廣華醫院乳病中心，有關淋巴水腫運動嘅片段（冇2個鐘咁耐，大概一個鐘度啦，唔知點解upload時重覆咗）。有唔明？係下面寫低佢，我會盡量解釋你聽⋯⋯ 封面圖片來源：英皇金業廣告截圖

The post 乳癌淋巴水腫－真係冇得搞？ appeared first on 香港乳癌及乳病治療中心 Hong Kong Breast Cancer And Disease Centre.

義乳的秘密－重建乳房手術外的另一片天

HK Breast — Wed, 07 Jun 2017 11:14:52 +0000

幫我開刀嘅醫生冇得我揀，一定要成個乳房切晒，但我又唔想做重建乳房手術，唔想多條疤痕，咁仲有咩辦法？原來手術世界之外，仲有另一片天叫「義乳」⋯⋯ 以禮待人「其實我就唔貪靚，不過切晒成個乳房又唔重整嘅話，咁我點著衫？」係，我同意所有女性無論中女、盛女、定沒女，無論作戰唔作戰都好，都係唔貪靚嘅。不過全乳房切除之後，一邊平一邊凸，諗起都怕D膚淺男人覺得自己冇禮貌。係，我都同意男人無論鑽石唔鑽石都好，都係膚淺嘅。「咪係囉，咁點先可以著衫有禮貌D？」原來呢個世界上有樣野叫「義乳」。唔好問我佢個「義」字係咪代表好有「義氣」？定係同「關二哥」有冇關係？義乳的秘密「唔明，咁義乳即係咩？」恕我通俗D講，即係「裝假狗」，就好似平時姊妹墊pad／用砵仔糕／水餃墊咁。雖然咁講好粗鄙，但真係一講就明。不過為咗提升返呢度嘅文化水平，以下我都係用返「義乳」好D。「哦～～咁我明喇，不過我係裝假狗方面又冇咩經驗，咁有咩義乳過我揀？」唔同階段嘅你，有唔同嘅需要。主要分為： 1）啱啱做完手術 2）已經康復後剛完成手術「啱啱開完刀，有咩要留意？」啱啱開完刀，嗰傷口如果順利嘅話，大概兩個星期埋口，引流幾時拆就因人而異（有人幾日拆，有人幾星期先拆）。呢個時候，通常咩都唔戴，不過亦有部分有禮貌嘅病友會揀戴胸圍加義乳。胸圍就揀一D冇硬膠條／鐵線嘅，例如運動型胸圍（sport bra），貪佢有彈性同埋冇硬膠條／鐵線，唔會整親個傷口。同埋最緊要前扣式，因為做完手術隻手開頭冇咁靈活，拗去後面解胸圍扣會好唔方便。圖片來源：互聯網義乳就揀一D輕身嘅義乳，例如纖維質地或者綿質（有D係內裡D綿花可填補嘅，可以自行調節理想嘅大細，想大D就入多D綿花，想細D就減咁D綿花）。圖片來源：互聯網而呢D輕身型義乳，亦都好合適訓覺用，貪佢唔洗有舊重野壓住，同埋又透氣D，咁就可以訓得舒服D。不過咁輕身，你都估到摸落去手感一定唔好，覺得好虛／冇彈性嘅，唔太合適長久用。康復之後「咁短暫手感差D都可以接受，但康復之後長期點算呢？」康復之後，傷口已經穩定晒，佢唔再係一個考慮，呢個時候（手術後四至八星期後）就可以去義乳公司揀一D合適嘅胸圍同義乳。佢地會有專家去陪你試身（breast prosthesis fitting），介紹一D啱你／sell你一D產品。義乳公司「咁有冇義乳公司資料？」有，以下資料係由病友搜集所得。（利益申報：我冇同任何一間公司有聯系，自己亦都未試用過佢地產品（我係冇易服癖嘅），所以我係唔知佢地嘅服務／產品係好定唔好。但都寫出黎嘅原因，係希望幫到大家，做咗第一浸搜集工夫，唔洗連個公司名都要周圍搵。排名只係分區加隨機，並不表示邊間好D，你可以自己排嘅。）矽膠義乳「咁佢地有咩產品啱我／sell我呢？」喺去見sales之前，了解吓產品特性，係有助成為一個精明嘅消費者。已經康復後，呢個時候「禮貌」嘅要決在於重量、手感、同埋型狀。「點解重量咁緊要？」首先，因為切晒成個乳房，脊骨兩邊嘅重量唔平衡，係可以搞到背脊痛嘅，呢個情況喺乳房豐滿嘅病友身上尤其嚴重。因此希望搵返個差唔多重嘅義乳，去平衡返佢。「但我唔係太豐滿咋喎⋯⋯」重量都緊要，冇返咁上下重量，係唔夠墜手嘅。如果上身太大動作，胸圍可能縮咗上去，如果喺社會場合發生D咁嘅事，會非常尷尬，就好似D女明星比記者影到高低胸一樣。圖片來源：網易論壇所以適當嘅重量，係有助墜住個胸圍，等成個外型／動態自然D，有禮貌D。「咁我明喇，邊D義乳有重量D？」通常都係矽膠義乳，佢無論喺重量定手感，佢都係勝人一籌，所以最多人揀，價錢亦只係貴少少。圖片來源：東網不過佢都有唔好處，就係如果太大嘅義乳，可能「過重」，返而令膊頭位痛。仲有膠質嘅關係，佢係唔索汗嘅，夏天大熱天時／做運動時，配帶矽膠義乳就冇咁舒適。「嗰間公司話有超輕身矽膠義乳喎～」雖然都有D矽膠義乳標榜自己超輕身，不過唔好處通常就係手感硬身D，摸落去冇傳統矽膠咁自然。當然有D品牌／型號講到自己無敵咁，又輕身、又自然、又透氣、手感又好，係咪真係咁正，定係違反商品說明條例，真係要試過先至知啱唔啱自己。另外有樣野要留意，雖然膠質防水，但都唔好浸佢落太熱嘅水度／浸溫泉／焗桑拿，質地會變㗎。「重量同手感我明喇，咁型狀呢？」揀完重量／手感就揀型狀。乳房型狀呢樣野，其實人人唔同，並唔係好似D明星隆胸咁，個個都警鐘型嘅。原來義乳胸型都有分幾款，有三角型、有雨滴型、有心型、有分左右嘅不規則型。自己鍾意咩類型，可以去試身（prosthesis fitting）時試清佢。義乳胸圍「吖，唔記得咗問埋配合義乳嘅胸圍添～」胸圍除咗可以揀平時用開嘅款式之外，好多病友都會揀埋專登設計比配戴義乳所用嘅胸圍，貪佢令義乳冇咁易移位。大部份特製胸圍都係含有暗袋／夾層，方便攝自己嘅義乳入去。圖片來源：互聯網有D公司可以幫你直情車埋纖維／綿質嘅義乳落去個胸圍度，連成一體咁就一定唔會移位。「咁呢D義乳同特別胸圍貴唔貴？」如果最基本嘅矽膠義乳，加埋一套有內格嘅胸圍，大概$800度起步，當然有D靚D貴D嘅選擇，去襯返高貴嘅妳。「咁襟唔襟用㗎？」一般正常耗損，義乳公司就話用2年度。如果保養得好，用幾年都得嘅。義乳泳衣「我鍾意游水㗎，戴義乳點游水呢？」當然冇問題，呢D公司都有相應有暗袋／夾層嘅特製泳衣，可以配合充滿活力嘅你。重建乳房手術外的另一片天最後喺youtube搵咗幾段片比你睇，希望你見到原來除咗重建乳房手術之外，天空仲係好闊嘅⋯⋯ 下回預告當完成晒成個乳癌治療階段，而家連扮靚靚都搞掂埋，下一個最關心嘅問題當然係「醫好乳癌之後應該點跟進？乳癌點check？要做咩乳癌檢查？幾耐做一次先最好？」。下次「乳癌檢查－醫好乳癌之後點跟進？」再見⋯⋯ 有唔明？係下面寫低佢，我會盡量解釋你聽⋯⋯ 封面圖片來源：電影關雲長

The post 義乳的秘密－重建乳房手術外的另一片天 appeared first on 香港乳癌及乳病治療中心 Hong Kong Breast Cancer And Disease Centre.

乳癌手術 6 －專做乳房手術醫生的增值服務

HK Breast — Wed, 07 Jun 2017 09:54:00 +0000

「嗰個醫生專做乳房手術好出名⋯⋯」「一定要搵個專門做乳癌手術嘅醫生，有冇好介紹？」作為乳癌病人，當然想搵個專醫乳癌嘅專家／名醫去幫自己做手術／開刀。但叫得做乳癌專家／名醫，收費一定唔平。比得咁貴手術費，同公立醫院有咩分別先？呢篇同你講吓專做乳房手術醫生的增值服務⋯⋯ 乳房手術都有得增值？八達通呀？幫我增值100⋯⋯ 專做乳房手術的醫生冇錯，專做乳房手術嘅醫生，賣點除咗係佢地嘅經驗／手勢／刀法之外，好多時，力求完美嘅佢地仲有一D增值服務，可以令乳癌手術能保留乳房嘅成功機會大大增加。咁神奇？其實唔神奇，好多醫生都識，不過因時間／環境所限，所以唔做／唔做得姐。咁即係咩增值服務呢？就係我之前都有提過嘅「手術超聲波」同埋「急凍切片／冰凍切片Frozen section」⋯⋯ 保留乳房手術的基礎要局部乳房切除嘅治療效果（存活率／局部復發率）同全個乳房切除嘅一樣，我地要滿足兩個條件： 1）手術要割清，即係邊緣唔可以有癌細胞。 2）一定要撘電療乳癌點樣割？開刀割乳癌，就好似煎太陽蛋咁。蛋黃就係有毒嘅乳癌，蛋白就係包圍乳癌嘅正常細胞，亦即乳腺科醫生所講嘅緩衝區／紙口位／邊界位（margin）。要成功煎太陽蛋（切除乳癌），就要唔好整爆嗰蛋黃（乳癌）。圖片來源：改篇自互聯網點為之割得清？如果醫生能夠見到四圍有蛋白包住蛋黃，即係蛋黃無爆，成功煎太陽蛋啦。如果醫生能夠見到四圍有正常細胞包住癌細胞，即係乳癌無爆，成功切除乳癌啦。割得清，就係喺顯微鏡底下，乳癌周圍有足夠嘅正常細胞包住佢，咁樣醫生先能夠確定冇乳癌細胞殘留係乳房。「好簡單姐，開刀割多D咪得囉⋯⋯」割多D係易D有足夠緩衝區，最極端就係全個乳房割晒，不過好多病友就係想保留乳房麻，你割咁多無辜嘅正常細胞，咁個乳房咪凹晒囉。圖片來源：改篇自互聯網所以割得清唔等如割得準。個平衡點應該要放喺有足夠緩衝區得黎，緩衝區又要盡量少，即係我成日講嘅「割得準」。圖片來源：改篇自互聯網點為之割得準？乳癌黎講，專做乳房手術嘅醫生開刀時會攞1cm緩衝區，目的就係喺顯微鏡底下有起碼1-2mm邊界位。如果緩衝區少過1mm，醫生叫呢D做「好近／好貼（close margin）」，就好似個蛋黃側埋一邊，最好就再做手術，割多D好貼嗰面嘅緩衝區做清佢。圖片來源：改篇自互聯網如果直情見到癌細胞係邊邊位，呢D叫做「割唔清（involved margin）」，因為蛋黃已經流晒出黎（可能有乳癌殘餘喺乳房），一定要翻手再割。圖片來源：改篇自互聯網點為之割得好？割乳癌割得好，除咗要割得清割得準，仲有一大要點，就係要識善後（即係點砌返靚個乳房），唔好凹咗一大忽。與時並進嘅乳腺科醫生都會識／知／聽過切除乳癌時嘅整形技術（oncoplastic surgery），擅長oncoplastic surgery就能夠喺未割乳癌時，一早預計好點砌返靚個乳房。割得清割得準割完靚，此為之割得好。點解會割唔清？「好易做姐，醫生用間尺周圍度住攞1cm咪得囉，點解咁都會割唔清？」你要明白外科醫生係冇一對超聲波手／顯微鏡手，做手術都係靠摸／靠觸覺。因此如果你個乳癌好難摸／甚至摸唔到，割乳癌側埋一邊係好易理解嘅。就算你粒野好易摸，都唔一定好易清。因為乳腺細胞早期變癌時，係摸唔到嘅，即係你摸到嘅腫瘤就1cm，摸唔到嘅喺顯微鏡底下而有癌細胞嘅範圍可能已經2cm，判斷緩衝區當然有誤差（以為係蛋白，點知原來係蛋黃）。割唔清會點？割唔清，即係問題未處理，乳癌未醫好。未醫好嘅乳癌係會攞命嘅。要處理未解決嘅問題，當然就要再做手術切清佢，即係你最唔想聽到嘅消息－「要再做手術」。一般黎講，保留乳房手術割唔清嘅機會率大概係兩至三成，即係十個人有三個要再做手術。再做手術你會點諗？割唔清，做完手術聽病理報告，醫生同你講要再開刀，你一定「晴天霹靂」問：「點解第一次開刀唔割多D／割清D？係咪個醫生手勢差？係咪想dum我症賺多D錢？」你唔會再信嗰位醫生，你會叫人介紹一個專做乳房手術／乳癌手術嘅名醫比你，希望可以割得清／割得準／割完靚／割得好。點解專做乳房手術的名醫可以割準D？專做乳房手術的名醫除咗贏經驗之外，仲有兩大增值服務能夠增加準確度，就係「手術超聲波」同埋「急凍切片」。咩係手術超聲波？之前講過一般外科醫生開刀時只係靠摸／觸覺，所以難摸／摸唔到嗰D腫瘤咪準確度低。「咁如果我地唔只靠摸，加埋其他感觀，咪會好D準D囉？」正是如此，專做乳房手術嘅名醫，開刀時除咗靠摸／觸覺，仲會靠睇／視覺，所以會好D準D囉。當然，唔係靠肉眼去睇，而係靠平時乳房造影嘅超聲波去睇。同平時唔同，佢地係一路做手術一路照（intraoperative ultrasound）住去做。所以就算難摸／摸唔到嗰D腫瘤，都難佢地唔到，因為佢地超聲波睇到麻。咁咩係急凍切片？「咁如果好似你頭先講，摸唔到又睇唔到，剩係顯微鏡先知嘅早期變異，咁點算呢？」好問題！如果睇都睇唔到，呢樣真係手術超聲波都幫唔到。不過專做乳房手術嘅名醫仲有第二樣法寶「急凍切片」。「急凍切片」就係喺手術中途做快速測試：醫生會將四邊嘅紙口位（margin／蛋白），都切一D立即送去化驗室，比病理科醫生立刻喺顯微鏡底下睇吓有冇癌細胞。如果有癌細胞（蛋黃），即係唔清，名醫會即場再割多D，以求割清晒。當然叫得急凍（快速測試），一定唔會百分百準確，因為冇特別染色／慢慢詳細睇。不過顯微鏡加埋手術超聲波，已經能夠令翻手嘅機會大大降低九成（唔係百分百）。割清晒你會點諗？割清晒，做完手術聽病理報告，醫生同你講恭喜你，你一定「天天天晴」諗：「點解第一次我唔搵一個專做乳房手術的醫生做手術？呢個醫生咪就係手勢好，洗多D錢都值得睇嘅名醫囉！」呢兩大增值服務係咪好貴？貴唔貴，視乎你個乳腺科醫生有幾出名，因為最主要都係時間成本，做多咗額外野，自然收返行政費。情況就好似請大狀咁，越出名，每個鐘頭收費就越貴。咁值唔值？見人見智，睇你將重點放係邊度。情況有如買保險（手術超聲波／急凍切片），你要比保費（醫生費），不過佢保你唔會出事（唔洗再做手術）。如果你唔買保險，冇事發生割清晒，恭喜你慳咗保費。如果你唔買保險，有事發生割唔清，翻做手術條數點計（心理／生理／荷包）都一定貴過保費好多。買唔買，視乎你進取定保守。咁邊度可以增值？私家呢，專做乳房手術嘅乳腺科醫生一般都有得增值，好公平，用者自付原則。公立呢，對唔住，一般都冇得增值。唔係唔識，只係資源所限，時間唔容許慢慢增值。因為喺醫管局嘅角度十個有三個要翻手，即係七個（大部份）冇事OK啦，仲咩浪費呢D時間？當然，我估如果高官有事黎教學醫院醫，醫管局會有唔同嘅答案。你唔會天真到以為梁振英去錯士多增值會增唔到呀？老闆就算冇八達通機，都一定有得增值啦，最多咪比埋自己張增爆咗嘅個人八達通過特首。...read more

The post 乳癌手術 6 －專做乳房手術醫生的增值服務 appeared first on 香港乳癌及乳病治療中心 Hong Kong Breast Cancer And Disease Centre.

乳癌手術 5 －前哨淋巴結活檢術？咩黎㗎

HK Breast — Wed, 07 Jun 2017 09:52:28 +0000

仲記唔記得乳癌手術1教過你，乳癌手術有兩大部份：乳房同埋腋下淋巴？前三篇講完乳房，呢一篇我地跳去淋巴，講吓有咩比你揀。你可能已經由醫生度聽過「前哨淋巴結活檢術」，不過似明非明，「咩前哨淋巴結，又造影，又定位，又追蹤，又活檢」。究竟係咩黎㗎？未講新野前，我地要溫一溫書，記返呢張圖：你會見到腋下淋巴有兩個選擇過你揀： 1）全淋巴清除（Axillary dissection）：即係等如你嘅醫生／網上講嘅割兩組淋巴。 2）前哨淋巴清除（Sentinel lymph node biopsy）+/- 全淋巴清除（Axillary dissection）：先割少少／幾粒淋巴即場去驗。如果有癌細胞跡象，就全淋巴清除。如果冇癌細胞跡象，就嗰刻收隊。點解要做腋下淋巴手術？侵蝕性／入侵性乳癌就好似惡嘅賊咁，會周圍搞事（擴散），最佳最快嘅方法就係搭地鐵（經腋下淋巴擴散）。相反，原位癌（善良嘅賊）喺唔會擴散（唔會周圍搞事），所以係唔洗做腋下淋巴手術。呢一點，正正解釋咗之前（乳房檢查三步曲3－乳房抽組織檢查）點解話懷疑乳癌抽粗針好過抽幼針。「點解之前你話原位癌開刀時唔洗做淋巴手術，但上圖你係寫選擇性嘅？咁即係幾時先要做？」有兩個情況醫生會原位癌都問你做唔做淋巴手術（做都係做前哨淋巴，唔洗全淋巴清晒嘅）： 1）全乳房切除：因為呢個係做前哨淋巴嘅最好機會。如果第一次開刀時唔做，之後術後先發覺個乳癌原來係有侵蝕性，係有需要翻手做淋巴手術，到時未必做得返前哨淋巴。 2）懷疑唔係原位癌咁簡單：例如好大舊腫瘤／抽針話比較惡嘅原位癌（High grade DCIS）。呢D情況，醫生估你個腫瘤有可能有侵蝕性，開刀時可以順手做埋前哨淋巴。當然你都可以選擇唔做住，到真係病理報告返黎話你有侵蝕性乳癌，先翻手做返（不過就做兩次手術）。圖片來源：改篇自MTR 講返D惡嘅賊（侵入性乳癌），咁多個地鐵站（腋下淋巴），你都唔知佢邊個地鐵站上車。圖片來源：改篇自MTR 所以傳統乳癌手術（捉賊），係採用有殺錯無放過嘅方法，總之有理冇理將所有淋巴結（地鐵站）清除左先，務求做到堵截賊人（乳癌）擴散。事實亦都證明呢個方法係有效嘅，我地發覺切晒腋下淋巴嘅病人係長命啲。但係你用呢個斬腳趾避沙蟲嘅方法去清晒D地鐵站（淋巴），賊（乳癌）係就係捉到，不過影響到其他市民（身體要循環嘅淋巴液體）冇地鐵搭，所以放工時候D人（淋巴液體）滯留係港島（手腫／淋巴水腫lymphedema），返唔到過九龍。申延閱讀：乳癌淋巴水腫－真係冇得搞？咩嘢係前哨淋巴結活檢術？為咗減少手腫／淋巴水腫嘅機會，近十幾年發展出一種針對性嘅技術「前哨淋巴結活檢術」。「咩嘢係前哨淋巴結？」前哨（第一站）淋巴結（地鐵站），即係站頭／個賊上車嘅地方。假如我地能夠有線報知道D賊（乳癌）將會係邊度上車（入侵淋巴），我地只要針對性咁封鎖搜查（活檢）嗰個／幾個站頭（前哨淋巴結），就會知道究竟有冇賊人入咗閘上咗車。圖片來源：改篇自MTR 點造影／定位／追蹤？成個計劃聽落好簡單好合理，不過問題係咁多個地鐵站（腋下淋巴結），邊一個先係站頭（前哨淋巴結）？個賊究竟會選擇喺邊度上車呢？上環？柴灣？要知D賊係邊度上車，我地要代入賊嘅角度去諗「邊度上車方便？」，最簡單，就係用臥底。我地先派兩款（兩個準確D）臥底（放射性藥水同埋藍藥水），模擬一下D賊（乳癌）會喺邊度上車（站頭），之後我地追蹤返臥底嘅行蹤，就會知上環定柴灣係站頭（前哨淋巴結）。定到「上環」嗰面係站頭之後（定位），就可以局部封鎖頭幾（穩陣D）個地鐵站（前哨淋巴結）去仔細搜查（活檢）。點活檢？警察（醫生）會即時［手術進行中送急凍切片（frozen section）］仔細研究呢面頭兩／幾個站頭（前哨淋巴），睇吓有冇賊人（乳癌）嘅蹤影。如果賊人已經入咗閘上咗車（前哨淋巴結有癌細胞），我地唔知佢可以搭車搭到去邊，？銅鑼灣？炮台山⋯⋯ 圖片來源：改篇自MTR 正正因為唔知D賊（乳癌）可以擴散去邊，所以就要清晒全港島線所有地鐵站（全淋巴切除）。圖片來源：改篇自MTR 如果賊人都未入閘（前哨淋巴結冇癌細胞），理論上其他地鐵站（淋巴結）應該無賊人，我地係可以解封其他地鐵站（保留其他腋下淋巴）嘅。越保留得多地鐵站（淋巴結），人群滯留（手腫／淋巴水腫）機會越細。點樣揀？好簡單，如果醫生有得比你揀，就揀先進D嘅前哨淋巴。因為手腫／淋巴水腫嘅機會係少一倍。當然針無兩頭利，前哨淋巴活檢術唔係百分百準確，都有百分之七到十嘅誤差（已經非常準確），有機會要做第二次手術（急凍切片話冇野，之後詳細病理報告話有野）。咩人冇得揀？以下幾個情況醫生開刀冇得比你揀 1）腋下淋巴手術前已經有擴散跡象：觸診摸到／造影照到／正電子掃描著燈／淋巴抽針確定。 2）孕婦：怕幅射 3）用背脊做乳房重建：唔係一定冇得揀，只不過如果你唔好彩，前哨淋巴有誤差，之後處理會好麻煩。呢個情況要同返自己乳腺科醫生傾。 4）醫生唔識做：呢個情況常見於婦科醫生／非乳腺科外科醫生／冇與時並進嘅醫生，因為冇學過。手腫有咩問題？手腫有D人會消，有D人唔會消，一世都係咁。唔消可以好大問題，例如脹痛、發炎。申延閱讀：乳癌淋巴水腫－真係冇得搞？結論如果手術前冇腋下淋巴擴散跡象，唔係孕婦，唔用背脊重建乳房，開刀時記得搵個乳腺科外科專科醫生幫你做前哨淋巴（年紀大都做得），藉此減低手腫嘅機會。下一篇我地講下專做乳房手術醫生嘅增值服務⋯⋯ 乳癌手術 6 －專做乳房手術醫生的增值服務有唔明？係下面寫低佢，我會盡量解釋你聽⋯⋯ 封面圖片來源：MTR

The post 乳癌手術 5 －前哨淋巴結活檢術？咩黎㗎 appeared first on 香港乳癌及乳病治療中心 Hong Kong Breast Cancer And Disease Centre.

乳癌手術 4 －乳房重建手術你要知

HK Breast — Wed, 07 Jun 2017 09:50:49 +0000

如果情況唔容許你保留乳房（即係要全乳房割），下個決擇就係開刀時做唔做乳房重建手術？咁點解要重建？幾時重建？用咩重建？呢篇有你要知嘅野⋯⋯ 點解要重建？喺診症室見病人同屋企人，一講到乳房重建，十個有七個屋企人會反對，佢地最大理據「唔好搞咁多野喇，切左個乳房算數啦」。乳房重唔重建，點可以咩都唔知／咩都唔問，就做個咁重大嘅決定呢？買卷兩蚊廁紙消委會都要比拼25個品牌，寫個「測試找出乾淨、柔韌又抵用的廁紙」嘅評測啦，更何況乳房重建，點可以唔比較吓。圖片來源：互聯網「好啦，唔重整啦⋯⋯ er ⋯⋯ er ⋯⋯醫生，我想問吓乳房重建⋯⋯」口裏說不，身體卻很誠實。嘗試搵出一百萬個理由去說服自己／屋企人重建／唔重建。「點解要重建？」一百個人有一百種答案。「乳房係最重要嘅女性性徵，牽涉我嘅靈魂，影響我第時能唔能夠企翻起身」「我怕老公／未來老公介意」其實答案好簡單「重建就好似愛情咁，係唔洗講理由／原因⋯⋯重建（愛情）係講Feel（感覺）嘅，你仲愛唔愛佢（乳房）」如果講理由，你隔離嗰個有一萬個缺點令你飛咗佢，你仲同佢一齊，係因為仲有Feel。愛情，就係比全世界人睇到你跪係度比人打咗14巴都唔走⋯⋯係唔洗講理由／原因嘅。如果醫生而家要你立刻決定，唔比你諗咁多，你只得0.00009秒考慮「重定唔重建？」你會點答？記住呢個答案，佢就係最忠於你感覺嘅答案。至於合唔合適？你就要了解多D有咩選擇／有咩好處唔好處，先可以決定做定唔做乳房重建。如果想重建，下個問題就係「幾時重建？」幾時重建？主要分兩類： 1）即時重建：開刀切除乳癌同時即時重建。主要用係早期乳癌（如何分期請睇返乳癌分期 ﹣ 我係早期定末期？），好處係一次手術搞掂晒，同埋盡量減低冇咗乳房嘅傷痛。 2）延遲重建：等完成所有治療後先重建。主要用係晚期乳癌，因為呢類癌症比較容易復發，所以寧願搞掂好晒D輔助治療（化療／標靶治療／電療），等一兩年穩定D先重建。費事揀咗即時重建，之後唔好彩好快復發，手術咪白做，白白多個傷口。另一個用處就係以前做咗全乳房切除，但而家後悔／始終接受唔到嘅病友，再做乳房重建，重新建立一條忠於自己感覺嘅道路。揀好時間，下一步就揀用咩方法重建⋯⋯ 乳房重建手術乳房重建有四大類： 1）鹽水袋／矽袋直接喺胸大肌底下放入鹽水袋／矽袋：好處係簡單，身體唔洗多一個傷口。但係袋始終係外來野，手感一定唔夠自己組織自然。同埋佢係冇皮嘅成份，即係你如果個腫瘤好大／要割好多皮，咁剩係袋就唔係咁合適。你要問問乳腺科／整形科醫生自己用唔用得剩袋重建，呢樣野冇得自我評估。第二個問題就要考慮襟唔襟用，袋係唔會永久襟用嘅，你要有心理準備十幾二十年後可能要再做手術更換。如果醫生同你講，一樣外來野幾十年都唔會老化／一世襟用，你都唔信啦。同埋如果你要電療，袋係唔夠自己組織襟電，傷口裡面易D會有疤（capsular contracture），呢D疤可以令重建後嘅乳房變型／痛楚。圖片來源：BRO Development 2）自身組織（肚皮／背脊）自身組織：好處係自然／襟用／手感好，同埋同一時間連皮膚捐贈，就算腫瘤要割好多皮都唔怕。但你自己捐D組織比自己，即係身體會多一個大傷口。圖片來源：BRO Development 第一個選擇就係用自己背脊，即係醫生講嘅「背闊肌肌皮瓣（Latissimus Dorsi Flap – LD Flap）」。「嘩？！咩黎？」唔洗驚聽唔明醫生講咩，其實好簡單，「背闊肌」即係背脊舊肌肉，「肌皮瓣」即係「肌」肉連「皮」連皮下脂肪，轉去前面重建乳房。簡單D講，即係「背脊」囉。「咁我用咗背脊重建，會有咩影響？」背脊會多一條六吋度嘅傷口，膊頭嘅力量差咗10%度。「咩人最合適？」乳房A Cup 或以下而又冇咩肚腩嘅女士。因為背脊提供嘅脂肪唔多，主要靠背肌，但係肌肉轉咗去前面冇抽捉就會萎縮，所以做唔到太大嘅乳房出黎。冇肚腩即係唔可以用肚皮重建。圖片來源：BRO Development 第二個選擇就係用自己肚皮，即係醫生講嘅「腹直肌肌皮瓣（Transverse Rectus Abdominis Myocutaneous Flap – TRAM Flap）」。「嘩？！又係咩黎？」同上面背脊嘅情況差不多，「腹直肌」即係腹肌，「肌皮瓣」即係「肌」肉連「皮」連皮下脂肪，轉去上面重建乳房。簡單D講，即係「肚腩」囉。「咁我用咗肚腩重建，會有咩影響？」肚皮會多一條一尺長嘅傷口，因為腹肌轉咗上去，肚皮會弱咗，導致第時可能有小腸氣。「咩人最合適？」乳房B Cup 或以上而又有肚腩／曾生育嘅女士。因為肚腩提供嘅脂肪多，所以做到大D嘅乳房出黎。圖片來源：BRO Development 如果要D Cup以上，就要用「游離腹直肌肌皮瓣（Free TRAM Flap）」，即係要駁血管。手術失敗機會大少少（5%），同埋如果去D脂肪嘅血氣唔好，D脂肪可以硬化，就好似D小石頭咁（Fat necrosis）。 ...read more

The post 乳癌手術 4 －乳房重建手術你要知 appeared first on 香港乳癌及乳病治療中心 Hong Kong Breast Cancer And Disease Centre.

Surgery 手術 – 香港乳癌及乳病治療中心 Hong Kong Breast Cancer And Disease Centre

乳癌淋巴水腫 － 真係冇得搞？

義乳的秘密 － 重建乳房手術外的另一片天

乳癌手術 6 － 專做乳房手術醫生的增值服務

乳癌手術 5 － 前哨淋巴結活檢術？咩黎㗎

乳癌手術 4 － 乳房重建手術 你要知

乳癌淋巴水腫－真係冇得搞？

義乳的秘密－重建乳房手術外的另一片天

乳癌手術 6 －專做乳房手術醫生的增值服務

乳癌手術 5 －前哨淋巴結活檢術？咩黎㗎

乳癌手術 4 －乳房重建手術你要知