Treatment 治療方法 – 香港乳癌及乳病治療中心 Hong Kong Breast Cancer And Disease Centre

乳癌治療方法－我需要如何去治療乳癌？

HK Breast — Sun, 24 Feb 2019 08:23:37 +0000

「我不想做手術，放棄治療吧～」「我很怕化療，為何我要做化療？」「電療與化療是什麼？我弄不清它們有何分別？」在面對乳癌確診的一刻，人生下半場被改寫，第一個反應便是震驚及憤怒，為何偏偏選中我？當定過神來被迫接受事實，面對一大堆治療名詞及選擇，下一個反應便是驚惶失措，面對未知的未來，不安感直線上升。只要一步一步去了解乳癌不同的治療方法，這些不安的代名詞其實是幫助我們渡過難關的法寶⋯⋯ 當我還在醫學院時，治療乳癌主要依靠五種方法：手術、化療、標靶治療、電療及荷爾蒙治療。時至2019年的今天，醫學界已經發展出第六種方法－免疫治療。這次跟大家略略談談這六種方法如何去幫助我們渡過難關。乳癌手術顧名思義，手術便是把乳癌切除，由身體將乳癌細胞移除，達致根治乳癌的目的。由於乳癌能夠以腋下淋巴作為跳板，擴散去身體其他地方，所以侵蝕性乳癌的手術包括兩部份：乳房及淋巴。乳房方面，如果情況許可，可以選擇局部切除，以保留重要的女性器官。如果腫瘤很大，或多源頭，我們可能要作全乳切除的痛苦決定。全乳切除後為了減少失去乳房的傷痛，我們可以選擇即時或延後的重建乳房。淋巴方面，如臨床沒有擴散的跡象，我們會做一個手術中途的快速檢測，稱之為前哨淋巴檢測。前哨淋巴是最接近乳癌的淋巴，那裡最大機會有癌細胞的蹤影。如果前哨淋巴沒有癌細胞，我們知道較遠的淋巴是安全的，可以得以保留。但如果前哨淋巴已經受癌細胞感染，我們便要切除兩組淋巴以策安全。另一方面，如果臨床一早已經有淋巴擴散的跡象，我們便不會浪費時間做這個前哨淋巴檢測，直接切除兩組淋巴以徹底清除癌細胞。乳癌手術是唯一可以根治乳癌的方法，假如我們是一件電器，現在壞了（患癌），便需要入廠維修（手術）。維修（手術）過後我們便再次健康起來，但不代表我們不會再壞（復發）。因此我們要根據再壞（復發）的風險，去做好保養工作（輔助治療）。乳癌期數越後、屬性越惡，越大機會復發，越要做足保養。化療、標靶治療、電療及荷爾蒙治療便是保養措施。乳癌化療化療是我們派一些藥性很強的化學藥物，入血管去追殺癌細胞。可惜它們不懂分辨敵我，沒選擇性的針對生長得活躍的細胞。癌細胞本性活躍因而受影響，但我們身體一些良性活躍的細胞如毛囊、骨髓也會受影響，所以會產生一些惱人的副作用，如脫髪、發燒等等。可幸的是再辛苦的日子始終會過，經歷三至五個月的黑暗時期，我們便如火鳳凰般重生，享受豐實的成果，仿如傳統智慧「苦口良藥」。乳癌標靶治療那麼化療如斯的笨拙，不懂分辨敵我，有沒有聰明一些的輔助治療？有，便是乳癌標靶治療。顧名思義，標靶便是導向性的治療，向著帶有「飛標靶（HER2）」的癌細胞衝著來。副作用少、功效大。可惜不是人人合用，只合HER2型的乳癌患者（大概佔整體患者25％）使用。唯一可挑剔的是費用高昂（動輒高達數十萬圓），普羅大眾難免感吃力，只可靠政府、慈善基金的資助。乳癌電療那麼電療又是什麼呢？初為患者的，往往分不清化療與電療的分別，以為電療很辛苦、會掉髪等，其實出於誤解。電療亦即放射治療，我們用一些高能量的放射線照射胸口，實際過程只需訓在床舉高手，數分鐘便完成一次，可看成曬太陽般，我們用一些看不見的光線照射胸口，副作用尤如曬傷了般，皮膚紅紅滾滾黑黑脫皮。整體過程很易接受，只是麻煩在每天要到醫院，大概需時三至六星期才完成整個療程。乳癌荷爾蒙治療大約七成半的乳癌也對荷爾蒙呈陽性反應，即身體越多女性荷爾蒙，乳癌便越受刺激、越易復發。因此我們可以利用一些口服藥物，去對抗女性荷爾蒙的作用。情況尤如拿去乳癌細胞生長的燃料，餓死它們般。荷爾蒙治療副作用少，成效大，但要服用五至十年，才能長期壓制癌細胞。乳癌免疫治療免疫治療在其他癌症已研究經年，但在乳癌的應用還是在起步階段，是近年的焦點所在。我們希望透過自己的免疫系統對付癌細胞，尤如對付細菌病毒一樣。但癌細胞也不是省油的燈，他們懂得戴上面具，扮作自己身體的細胞，逃避免疫系統的監察。近年的新藥PD-1或PD-L1抑制劑，便是透過揭開癌細胞的面具，讓免疫系統得以認清誰是敵人，繼而攻擊癌細胞。結語原來我們對付乳癌已經發展出六大武器，在根治或控制乳癌方面我們是有把握的。確診乳癌不用怕，不是世界的末日。不要諱疾忌醫，身體的健康正等著你奪回來，一齊攜手展開二次人生。馬國權醫生香港乳癌及乳病治療中心外科專科醫生原文刊載於《直通車月刊》2019年1-2月號

The post 乳癌治療方法－我需要如何去治療乳癌？ appeared first on 香港乳癌及乳病治療中心 Hong Kong Breast Cancer And Disease Centre.

老人家乳癌治療攻略－唔做手術／治療得唔得？

HK Breast — Wed, 07 Jun 2017 11:31:07 +0000

我媽媽有乳癌時已經80歲喇，醫生建議佢做手術，不過我怕佢頂唔順，究竟老人家有乳癌唔做手術／治療得唔得？呢次老人家乳癌治療攻略帶你睇吓做咩治療最唔傷⋯⋯ 老人家乳癌唔知你仲記唔記得／有冇睇過，一個好耐之前講過嘅一個概念：年紀越大越易生乳癌。正正因為呢個原因，好多時病友家屬要面對嘅問題就係「佢已經70／80／甚至90歲喇喎，究竟乳癌可唔可以唔做『治療』？」你只要將以上句式「治療」兩個字，自由代乳癌五寶「手術／化療／電療／標靶治療／荷爾蒙治療」入去，咁就成為典型問題，就好似「佢已經70／80／甚至90歲喇喎，究竟乳癌可唔可以唔做手術？」咁。不過喺同你探討呢個典型問題之前，當然要加個警告字句：警告：乳癌種類繁多，身體體質人人不同，心理取向更加是分秒轉變，乳癌治療方案應與自己醫生商量制定，千萬「不要」因為以下文章而做定唔做某一治療。以下內容僅為分享個人見解，帶有強烈個人色彩，不保證內容中立，敬請留意。警告完之後終於可以入正題，其實呢個典型問題嘅核心就係「我怕佢頂唔順／怕治療辛苦／都幾廿歲唔好搞咁多野啦」，面對呢個複雜問題，係冇可能一篇文章可以解釋得清楚，不過有幾樣野知道咗係幫到你易D去做決定： 1）什麼治療最傷／最唔傷？（咁你先知佢頂唔頂得順／辛唔辛苦） 2）什麼治療成效最大？（咁你先知值唔值得去做某某治療） 3）仲有／仲想要幾耐命？（咁你先知治療係「搞咁多野」定「唔算搞得多野」） 1）什麼治療最傷／最唔傷？如果要講治療副作用嘅排名，我會咁排（由最溫和至最多副作用）：食藥＜手術＜電療＜標靶治療＜化療。以下喺一個圖像化嘅表達，等大家易明D我心目中嘅排名。每個人睇事物嘅方法都唔同，有人關心A副作用，有人看重B副作用，根本唔可能有一個統一客觀量化嘅比較。以下所依據的是我個人嘅知識／觀察同體會，係唔客觀嘅。食藥（荷爾蒙治療）：呢個係最溫和嘅，日日食一粒藥，可以感覺得到嘅副作用其實有限，同埋有咩唔妥可以隨時轉藥／轉計劃，不過前提係你隻乳癌有荷爾蒙受體（ER＋）先得，好在老人家乳癌通常都係ER＋嘅。手術：好多人一聽到（老人家）要做手術都怕怕（因為大部分人都未做過手術／冇相關經驗），其實老人家同後生做乳癌手術都係面對同樣問題，分別只係麻醉風險輕微上升（當然講緊本身相對健康嗰D，有長期病患就要個別評估），不過整體黎講都係好安全嘅。電療：副作用一般，都係皮膚灼傷，不過老人家黎講就麻煩D，因為日日去醫院，如果行動唔方便／要後生日日陪都幾麻煩。標靶治療：可能會傷心臓，同埋通常撘埋化療一齊做，所以喺老人家身上要小心D，有時就算HER2＋型醫生都未必建議做標靶治療。化療：呢個就最傷，除咗A針可能會傷心臓之外，仲有一系列副作用。呢個亦都係神棍用黎攻擊西醫嘅常見手法：「化療／西醫好傷身㗎，試吓另類治療先啦⋯⋯」，往往令病友錯過黃金治療機會。化療係傷，不過都唔洗一竹篙打一船人（因為所有治療並唔係捆綁式的），用唔用某某療法嘅決定權其實喺自己手上，呢個係一個平衡完好處同唔好處嘅理性決定。 2）什麼治療成效最大？呢次個排名，我會咁排（由成效最大至最小）：手術＞食藥、標靶治療、化療＞電療。都係嗰句，純粹個人體會，係唔客觀嘅。手術：成效一定最大，因為成個腫瘤切左佢，如果冇擴散，手術係根治個病，其他四樣治療係做唔到「根治」呢個效果。食藥：如果選擇唔做手術，呢個係一個好選擇，因為日日食藥，長期有野控制住乳癌。不過都係嗰句，要ER＋先得。標靶治療／化療：雖然係全身性治療，不過副作用大，搞到性價比唔高。電療：局部治療嘅一種，達唔到整體長期控制嘅目標。綜合以上兩個排名，你可以見到／估到，大部分老人家都係揀手術／食藥，加減電療，好個別情況先會做埋化療／標靶治療。 3）仲有／仲想要幾耐命？呢個就要睇你第幾期乳癌同埋而家幾多歲，以前D人就話人生七十古來稀，而家70係非常普遍，香港女性人均壽命去到86，當你有癌症打個折80歲先算，70歲病友仲有10年行（申延閱讀：香港乳癌存活率：我仲有幾耐命？），太早放棄主流治療／根治性手術係不智嘅。話分兩頭，如果你90歲，本身已經長命過人，看破塵世，每過一日都心懷感激「醫生幫你日日賺」，咁你揀一D保守D嘅治療係可以理解嘅。老人家乳癌治療攻略如果年紀相對後生，身體相對健壯，仲熱愛生命，治療就揀做乳癌手術，ER＋就食埋藥。個別病情有需要，性格又進取，身體又頂得順，先做埋電療／化療／標靶治療。如果年紀相對老邁，身體多毛病，樂天知命，ER＋就抗荷爾蒙藥「食住先」，希望可以「食一世」。睇反應／情況，先考慮做唔做手術，至於化療／標靶治療／電療呢D就太遙遠喇。最後長氣都要講多句，乳癌治療有5寶：手術、荷爾蒙治療、電療、化療同標靶治療，老人家揀咩野治療唔係捆綁式，好似去茶樓飲茶點心紙咁，鍾意嗰樣先剔嗰樣。千祈唔好因為怕「某某」治療，就放棄「全部」治療，走去試D古靈精怪野，我敢講呢D另類治療九成九呃人，最終受害嘅係自己／自己心愛嘅媽媽。下一次，教你點樣「醫乳癌公私營合作－教你點保障自己」⋯⋯ 有唔明？係下面寫低佢，我會盡量解釋你聽⋯⋯ 封面圖片來源：互聯網

The post 老人家乳癌治療攻略－唔做手術／治療得唔得？ appeared first on 香港乳癌及乳病治療中心 Hong Kong Breast Cancer And Disease Centre.

懷孕中乳癌治療攻略－腹中BB點算好？

HK Breast — Wed, 07 Jun 2017 11:29:26 +0000

「我地嘅BB仲有幾個月就出世，可惜天意弄人，老婆呢個時候確診有乳癌，究竟仲保唔保到個胎？」懷孕中有乳癌，的確係一個棘手問題，呢次「懷孕中乳癌治療攻略」我地一齊睇吓點保住個大時又保住個細⋯⋯ 懷孕中有乳癌「乳癌我聽人講有好多治療要做，又咩手術、化療、電療咁，但我老婆啱啱先有咗，咁點算？」「落咗去（中止懷孕）⋯⋯」呢個係醫生最直覺嘅答案。亦都係病友／老公最唔想聽到／最唔鍾意嘅答案。喺醫生嘅角度，梗係醫咗乳癌先，保咗媽媽嘅命，先仲有家庭、先仲有將來⋯⋯ 喺準父母嘅角度，除咗媽媽條命，BB條命一樣重要⋯⋯ 「我地就係想保住大時，又保住個細麻！我地呢胎得來不易⋯⋯」如果想保大時，又想保細，咁就要考慮以下三個問題： 1）願唔願意承擔「治療可能對BB有害／有後遺症」嘅風險？始終懷孕中接受治療，如果BB有咩冬爪豆腐（早產／流產／畸形⋯⋯），總之有關冇關嘅野，都關／都瀨治療事㗎喇，呢個時候一定自責／責怪醫生揀錯治療。因此要問自己，究竟心理準備好未？願唔願意承擔「治療可能對BB有害／有後遺症」嘅風險？ 2）之後BB照顧問題？究竟媽媽係早期定末期？醫唔醫得返好？如果媽咪要長期接受治療／甚至日子有限，究竟邊個照顧小朋友？ 3）第時如果不育點算？乳癌治療有可能影響第時生育能力，如果呢次選擇落咗去，第時冇得生時，會唔會抱憾終身？如果諗清諗錯以上三大問題之後，答案都仲係想保住BB嘅話，好，我就帶你去睇吓我地點樣調節乳癌治療五寶：手術、化療、標靶治療、電療、荷爾蒙治療，希望保到個B之餘，媽媽嘅治療亦都妥善處理。懷孕中乳癌手術篇首先，返去睇返一般人做乳癌手術有咩過你揀：乳癌手術 1 －開刀我有咩可以揀？乳癌手術 2 －保留乳房手術，我做唔做得？乳癌手術 3 －保留乳房手術，我揀唔揀好？乳癌手術 4 －乳房重建手術你要知乳癌手術 5 －前哨淋巴結活檢術？咩黎㗎乳癌手術 6 －專做乳房手術醫生的增值服務義乳的秘密－重建乳房手術外的另一片天「啱啱睇完，咁懷孕中有咩過我揀？同一般人有咩分別？」 1）乳房方面：傾向全乳房切除，因為希望避咗電療，尤其係懷孕仲喺初期階段（first trimester）。如果懷孕已經去到就足月（third trimester），都仲可以諗吓保留乳房，因為可以生完先電。 2）腋下淋巴方面：傾向全淋巴切除，因為現階段醫生唔敢拍心口話前哨淋巴百分百安全（雖然外國有人照做）。 3）乳房重建：超大型手術都係遲D先搞喇。懷孕中乳癌化療篇又係返去重溫舊文章：乳癌化療需知－我洗唔洗化療？乳癌化療時間－手術前做？手術後做？乳癌化療需唔需要－著數計算機火併乳癌基因測試乳癌化療AC針TC針－乜藥黎㗎？乳癌化療選擇－咁多組合點樣揀？乳癌化療費用－要用幾多錢？貴唔貴？乳癌化療療程－吊針過程大公開乳癌化療甩頭髮－點處理？幾時生返？乳癌化療嘔吐－終極止嘔藥乳癌化療副作用－辛唔辛苦？點處理？乳癌化療期間之飲食－點補身？洗唔洗戒口？「其實懷孕期間化療安唔安全？」醫學文獻就話懷孕中至後段（second to third...read more

The post 懷孕中乳癌治療攻略－腹中BB點算好？ appeared first on 香港乳癌及乳病治療中心 Hong Kong Breast Cancer And Disease Centre.

乳癌復發治療攻略－求生大作戰

HK Breast — Wed, 07 Jun 2017 11:25:29 +0000

上次講到乳癌復發原來分3大類，治愈率同治療方法都好唔同，究竟乳癌復發仲有冇得醫？為咗生存，你可以去到幾盡？「乳癌復發治療攻略－求生大作戰」開始⋯⋯ 1）曾經有事嗰邊乳房／胸口局部復發個名太長，以下我地簡稱為「局部復發」，即係上次局部割／保留咗嘅乳房，甚至重建出黎嘅乳房，又再生乳癌。或者，上次全乳房切除冇重建嘅，就喺個胸口復發。呢個仲係有得醫嘅，不過會因應你之前做過嘅治療而有所微調：局部復發乳癌手術篇 1）之前局部割嘅，而家一定要全乳房割。因為事實證明保留乳房失敗，同埋以前電過唔可以同一部位電2次。 2）之前全乳房割嘅，而家要睇吓仲可唔可以再割，有可能要植皮／皮瓣先可以刪得埋個傷口。 3）之前有做乳房重建嘅，仲割到嘅就就咁割，但要有心理準備可能要拆咗個重建乳房去。局部復發乳癌化療篇 1）之前有化療嘅，喺化療嘅藥物選擇上，要就住以往用過嘅劑量／種類調節一下，可能用其他第一線化療，或者第二線，甚至第三線化療。另外有D化療藥（例如紅魔鬼）係有劑量頂點嘅（呢D我地叫cumulative dose），你身體呢一生可以打幾多其實係有限制。 2）之前冇化療嘅，而家就要化療返。局部復發乳癌標靶治療篇要睇返之前做過未，同埋復發腫瘤嘅特性（標靶受體陽性定陰性），先可以決定點做。呢個十分複雜，因為人人唔同，一定要問返自己醫生，2015年大方向就好似以下個表咁（注：醫學發展太快，下一刻可能就更新／變／錯，記緊問返自己醫生最update最貼身嘅方案）：局部復發乳癌電療篇 1）之前電過嘅，而家冇得再電。 2）之前冇電療嘅，而家要電返，藉以加強局部控制。局部復發乳癌荷爾蒙治療篇同標靶治療一樣，要睇返之前做過未，同埋復發腫瘤嘅特性（荷爾蒙受體陽性定陰性），先可以決定點做。呢個十分複雜，因為人人唔同，一定要問返自己醫生，2015年大方向就好似以下個表咁（注：醫學發展太快，下一刻可能就更新／變／錯，記緊問返自己醫生最update最貼身嘅方案）： 2）另一邊冇事嗰邊乳房生乳癌呢個係最簡單嘅，就係所有野回帶咁黎多次，又係乳癌治療5寶（手術／化療／標靶治療／電療／荷爾蒙治療）出動嘅時候。唯一有少少分別： 1）如果手術上次原本有事嗰邊，係全乳切除而又冇重整嘅話，咁呢次新呢邊都傾向全乳切除，因為對稱D。除非特別原因，如果唔係嘅話，大部分病友好少可話想／揀保留單邊乳房。 2）之前有化療嘅，就好似上面咁，就住以往用過嘅劑量／種類調節一下化療嘅藥物選擇。 3）標靶治療同荷爾蒙治療：大方向就好似以上兩個表咁。 3）遠端復發（即係擴散／轉移）呢個係最唔開心嘅，去睇睇「乳癌四期治療－末期仲有冇得醫？」乳癌復發治療攻略結論清楚晒乳癌復發應該點面對，心裡嘅不安雖不至一掃而空，但我地可以做嘅已經盡晒力，剩落黎嘅就安然交返比個天啦。下次我地轉轉話題，講下生BB沖喜吓：「乳癌康復後懷孕－我想生BB！」有唔明？係下面寫低佢，我會盡量解釋你聽⋯⋯ 封面圖片來源：互聯網分段圖片來源：改篇自互聯網

The post 乳癌復發治療攻略－求生大作戰 appeared first on 香港乳癌及乳病治療中心 Hong Kong Breast Cancer And Disease Centre.

乳癌四期治療攻略－末期仲有冇得醫？

HK Breast — Wed, 07 Jun 2017 11:10:02 +0000

當醫生同我講我已經係乳癌四期／末期，我D眼淚已經再忍唔住，一諗到生命正在倒數，我條路已經唔知點走落去，究竟乳癌末期仲有冇得醫？如果冇得醫，乳癌四期存活率又係點？今次「乳癌四期治療攻略」陪你行呢段難行嘅路⋯⋯ 警告本篇內容涉及一些極度敏感的話題，可能令人不安／產生不可估計的負面情緒。如閣下不欲看有關乳癌四期的資料，或心理狀況未準備就緒，請立即離開。圖片來源：互聯網停一停，諗一諗，問吓自己準備好未？歡迎你勇敢地返黎，我地一齊睇吓呢段路應該點樣行落去⋯⋯ 乳癌四期治療目標「乳癌末期仲有冇得醫？」呢個係一條非常非常非常之難答嘅問題。佢亦都係好多病友／家人得知乳癌四期之後嘅第一個問題。老實講，我實在冇一個啱聽嘅答案。「乳癌末期有得醫！」，呢個係寶藥黨／祈福黨，利用癌症病人嘅痛苦、無奈同埋絕望，去呃人嘅手法。「乳癌末期冇得醫～」，呢個係罔顧病人／家屬感受，殘忍地摧毀他們希望嘅答法。我只可以答：「當我地改變唔到客觀環境，就只可以改變自己心境。」當我地嘗試將要求降低（唔再強行追求根治個病），而係將目標擺喺控制／管理個病（延長壽命）、舒緩不適、同埋撫平內心不安方面，我地仲係做得到嘅。控制乳癌轉移「咩叫控制乳癌轉移？」即係喺保持生活質素嘅大前提底下，用盡所有嘅方法去殺死身體嘅乳癌細胞，希望佢唔會作惡，同佢共存。情況有如寄生蟲，明知清唔到，只希望佢生生性性，唔好吸太多營養，同佢共存，一齊生活幾耐得幾耐，就好似將活火山變成睡火山咁，希望佢盡量沉睡唔好爆。或者你可以將佢睇成長期病患，例如糖尿病／高血壓／高血脂咁，要長期作戰咁好好管理佢。「咁我地有咩方法可以控制／管理佢？」除咗乳癌5寶（化療、標靶治療、抗荷爾蒙治療、電療、手術）之外，仲有兩樣野叫CDK4/6抑制劑同骨針。同第一至三期唔同，乳癌四期以上每一環節都要作出微調： 1）化療：治療嘅主力（今次唔再係手術，因為已經唔係一D局部治療可以控制嘅野），都係用返第一線A針T針為主。不過如果第一線化療冇效，我地就要用第二第三第N線化療，直到醫生覺得再打落去係壞處多過好處／你唔想再打為止。你將會見到一大堆化療藥名［Gemcitabine／Carboplatin／Capecitabine（Xeloda）／Vinorelbine／Navelbine／Eribulin（Halaven）／Cyclophosphamide］，詳情唔洗理，因為太深喇，寫D名比你睇係想話比你聽，A針T針之外，原來你仲有好多化療選擇可以用黎打乳癌。 2）標靶治療：雖然我以前只係成日講Herceptin一隻標靶藥，但原來同化療一樣，仲有好多新希望［Pertuzumab／T-DM1／Lapatinib（Tykerb）／Everolimus（Afinitor）］可以幫幫手。伸延閲讀：乳癌類型巡禮－與你細數HER2型乳癌的歴史 3）抗荷爾蒙治療：除咗舊藥（Tamoxifen）同新藥（AI）之外，仲有第四代抗荷爾蒙針［Fulvestrant（Faslodex）］。另外如果後生未收經，仲可以用唔同方法去抑制卵巢（Ovarian suppression）添，例如做手術切咗卵巢去（oophorectomy）／每月打停經針［goserelin（Zoladex）］／電死卵巢（radiotherapy）。原來ER＋乳癌治療有妙法（成個IKEA廣告”XXXX有妙法”咁添），唔差在唱埋佢支主題曲喇：得㗎得㗎得㗎得。 4）CDK4/6抑制劑：原來除咗HER2型乳癌有標靶藥外，而家管腔型乳癌都有荷爾蒙標靶藥，佢地就係Palbociclib（Ibrance）、Ribociclib（Kisqali）同Abemaciclib（Verzenio）。除咗可以穩住個病之外，仲可以延長壽命添。伸延閲讀：乳癌荷爾蒙標靶藥CDK4/6抑制劑－不可不知的新希望 5）電療：只要之前未電過相同部位，就可以有咩電咩，遇神殺神、遇佛殺佛。可以電胸口、又可以電腫瘤。電骨又得，電腦又得。電腦又分成個腦電（Whole brain radiotherapy），或者局部電－電療刀（stereotactic radiosurgery）。 6）手術：今次主力變副選。主要係切侵蝕出皮膚嘅腫瘤，等皮膚唔好爛／痛／發炎。另外個別情況，例如單一地方轉移（solitary metastasis），可考慮進取D割埋佢，例如切肝／肺／腦。仲有未講如果尾龍骨轉移，搞到壓住脊髓神經（cord compression），可考慮做減壓固定手術（decompression & fixation），以防下半身癱瘓。最後如果化療乸到好難搵血管落藥，可以做個小手術去種個內置注射器入身體（port-A-cath），等吊針時唔洗拮血管舒服D。 7）骨針：有2個選擇［Zoledroic acid（Zometa）］同埋Denosumab你揀。佢地主要用黎減少因為乳癌骨轉移，而引致嘅併發症（骨痛／骨節／血鈣過高）。另外Zometa仲有研究（AZURE，ABCSG-12）顯示，對早期乳癌可能有抗乳癌作用添，包括可以減少骨轉移，什至延長壽命，不過主要係喺收經5年以上人士身上先有效。以上全部都係有科學根據證明幫助到控制乳癌嘅療法，一口氣講咁多比你聽，只係想你知道，我地西醫雖然冇辦法根治末期乳癌，但係喺控制個病（延長壽命）方面，我地係有把握嘅，唔好咁快放棄治療！如果你未試過晒以上大部分療法，千祈唔好亂咁試其他所謂乜乜食療、自然療法、布緯食療、褐藻糖膠、人體充電、能量水、古方、古法、秘方，厚道D講就好有潛力，實際D講就係唔得嘅，刻薄D講就全部都係呃人嘅。乳癌四期存活率「如果控制唔到，我仲有幾耐命？」好視乎對治療嘅反應，而家乳癌治療發展日新月異，真係好難講實。以前寫過一篇「香港乳癌存活率－我仲有幾耐命？」，入面有個圖表可以比個初部印象你。圖片來源：Annals of Surgical Oncology 你可以見到乳癌四期可以有好大差異，有人幾個月就走，有人幾年先走，有人甚至十年以上都仲係度。「咁我係幾個月嗰個？幾年嗰個？定係十年以上嗰個？」講唔實，所有野都係靠估，不過我地估得黎都有根有據，並唔係好似D財經演員呃D師奶咁講：「恆生指數低試5000點，不過如果突破到250年平均線22000點，就可以上望40000點」。我成日諗，如果呢位財經演員可以發明／發現「唔洗經過22000點，就可以去到40000點」，諾貝爾獎仲唔係屬於佢？佢發明咗「瞬間轉移」呀！以後住高樓大廈唔洗怕電梯維修，你可以唔洗經22樓，就可以由5樓直達40樓，撐樓梯？洗乜怕。「咁即係點估姐？有咩根？有咩據？」係教你估之前，要約法三章： 1）估，係可以估錯。應該話成日估錯先啱，因為醫生都係睇平均數，平均數即係有一半人叻D，有一半人冇咁叻。一定估啱嗰個叫「神」，醫生只不過係「普通人」，甚至連妙手仁心裡面「好型仔嗰個／嗰隻醫生」佢都唔係／做唔到。嘩，仲程至美咁out？係，我得承認我已經好耐冇睇CCTVB。圖片來源：＜來自星星的你＞截圖有超能力型仔情深教授只會係「來自星星的」，現實中，醫生係「來自媽媽的」。 2）估，係好講經驗。醫生有經驗，易D估啱。你冇經驗，易D估錯。咁醫生D經驗點黎？由佢成日估錯而累積返黎。清楚明白晒？OK，一齊學點估：點估乳癌四期壽命要估有幾耐命，我地要睇5樣野： 1）現時身體狀態（performance status）：越生猛當然越好（同買海鮮差唔多），行得走得食得訓得就最理想，呢D狀態冇咁快走嘅。相反，狀態走下坡就係唔理想，即係開始覺得唔精神／冇精力，平日鍾意嘅野都唔想做，慢慢冇胃口，唔想食野，個人漸漸消瘦，之後唔想落床，沖涼大小便都唔想去／唔想郁，慢慢連呼吸基本維生既野都有困難，呢D就係轉差嘅跡象。 2）身體轉差速度（temporal change）：身體走下坡，係人都知唔好。不過走下坡個速度都有助我地估計壽命。越急速，越唔好。所以希望走下坡得黎，梗係想慢慢黎／甚至保持平穩。 3）擴散咗去邊到（site of metastasis）：腦轉移最差，主要因為腦有腦膜（blood-brain barrier）嘅關係，以前嘅抗癌藥物好難入腦，所以對治療嘅反應唔理想，而家有口服標靶加化療（Xeloda + lapatinib）就好DD。另外因為腦袋係掌管全身機能嘅中央系統，腦內壓力過高就會影響重要嘅維生器官，可以明明今日仲好地地，之後就差得好快。肝／肺轉移就普普通通，如果仲有得割（solitary metastasis）就好D。骨轉移就最好，因為相對生得慢，可以有幾年，甚至十年都唔出奇。 4）仲有咩治療未試（treatment）：上面咁多治療都未試就好D，即係我地仲有好多皇牌喺手可以對付乳癌。如果已經試過晒大部分都係唔得，當然情況冇咁理想。 5）對治療反應（response）：用完以上治療方法之後，通常都會抽血睇住個癌指數／照掃描睇反應，如果腫瘤縮小／有良好反應，條命又當然長返D。如果冇反應，唔洗我講你都知乜事。頭兩點你自己感覺得到，第三點就你而家學咗先知，尾兩點就要靠醫生。舒緩不適...read more

The post 乳癌四期治療攻略－末期仲有冇得醫？ appeared first on 香港乳癌及乳病治療中心 Hong Kong Breast Cancer And Disease Centre.

Treatment 治療方法 – 香港乳癌及乳病治療中心 Hong Kong Breast Cancer And Disease Centre

乳癌治療方法 － 我需要如何去治療乳癌？

老人家乳癌治療攻略 － 唔做手術／治療得唔得？

懷孕中乳癌治療攻略 － 腹中BB點算好？

乳癌復發治療攻略 － 求生大作戰

乳癌四期治療攻略 － 末期仲有冇得醫？

乳癌治療方法－我需要如何去治療乳癌？

老人家乳癌治療攻略－唔做手術／治療得唔得？

懷孕中乳癌治療攻略－腹中BB點算好？

乳癌復發治療攻略－求生大作戰

乳癌四期治療攻略－末期仲有冇得醫？