愛・乳・希望入門指南 - 終極懶人包

Posted by in 成功戰勝乳癌的妳, 關注乳房健康的妳, 面對乳癌挑戰的妳, 香港的乳癌治療資訊

當愛・乳・希望呢個網站越來越多文章,新來到的朋友可能感到無從入手,都唔知睇邊篇先。為咗方便大家,我整咗幾個pdf終極懶人包,作為網站的入門指南。叫得做懶人包,自然一定要夠懶⋯⋯

點先為之最懶:

第一懶:懶得探索

其實之前網站已經分開咗三類朋友:關注乳房健康的妳面對乳癌挑戰的妳成功戰勝乳癌的妳。我開頭以為夠清晰啦,但原來咁係未夠嘅,當我喺診所診症時話:

「你好不幸而家係第三期,個網站有曬你要知嘅野,返去睇下⋯⋯」
「你好彩發現得早,係零期原位癌,頭先解釋咗同侵蝕癌嘅分別,如果唔明可以去網頁重溫⋯⋯」

病人及家屬返到去,㩒入去面對乳癌挑戰的妳,面對嘅係幾十篇乳癌文章,變咗面對文章挑戰的妳,都唔知由何處入手,都唔知診症時講過嘅野散落喺邊D文章。

為咗方便大家,我特意由唔同期數入手,精選相關的重要文章,再加上治療的時間表,咁大家就可以就住自己嘅情況,睇咗D最重要嘅文章先,到有時間先慢慢探索其他感興趣嘅文章。呢個對於唔係我度睇病的朋友尤其重要,因為往往睇醫生時自己又唔識問,醫生又唔得閒主動講多D。

醫生話我係第零期乳癌(原位癌)
https://www.hkbreast.com/pamphlet/pamphlet-stage0.pdf

醫生話我係第一期乳癌
https://www.hkbreast.com/pamphlet/pamphlet-stage1.pdf

醫生話我係第二期乳癌
https://www.hkbreast.com/pamphlet/pamphlet-stage2.pdf

醫生話我係第三期乳癌
https://www.hkbreast.com/pamphlet/pamphlet-stage3.pdf

醫生話我係第四期乳癌
https://www.hkbreast.com/pamphlet/pamphlet-stage4.pdf

醫生話我係咩乳癌類型話
https://www.hkbreast.com/pamphlet/pamphlet-cancer-type.pdf

醫生話我係良性
https://www.hkbreast.com/pamphlet/pamphlet-benign-breast-disease.pdf

第二懶:懶得㩒入去

「睇標題條條都好吸引/好唔吸引,㩒我都懶得㩒入去,唔㩒又唔知你篇文講乜,都唔知關唔關自己事。」

得,意見收到冇問題。你㩒都懶得㩒,我畫公仔就畫出腸,將文章起首的引旨抄埋出黎比你,咁你㩒都唔洗㩒,立下眼都略知一二篇文講咩,唔洗浪費你的寶貴時間。

第三懶:懶得輸入

有時後生仔女好有心幫阿媽上網搵咗D乳癌資料,想分享比年紀大的媽媽睇,都真係拉牛上樹。

「Facebook share比你⋯⋯」

冇面書。

「WhatsApp 比你⋯⋯」

工聯會智能手機班阿sir未教到。

圖片來源:民建聯

「抄個網址比你⋯⋯」

我唔識英文,又眼曚曚手震震,好難輸入。

「㩒個超連結⋯⋯」

邊度有制㩒。

「拿,掃一掃呢個QR Code,呢家大陸乞兒乞錢都係叫你掃一掃,微信支付比佢㗎咋⋯⋯」

咩叫QR Code?

圖片來源:蘋果日報

唔緊要,面對咁嘅問題,最終就係print出黎,揸住張實物最實際,呢個就係我整pdf嘅原因。Print出黎又得,save低喺手機電腦又得,對住打網址又得,唔想打字㩒個hyperlink又得。如果連㩒都懶得㩒都冇所謂,我整埋QR Code比你,用iOS 11/android個相機,或者WeChat 微信/其他掃QR code 嘅app,掃一掃就連網址都唔洗打就入到去,又或者cap張相send個QR Code share比人亦都好方便。

第四懶:懶得睇字

「咁多字,好悶我唔想睇⋯⋯」

明白嘅,現代人速食文化,咁多字真係好難引得起興趣。往往都係行行下街,攝時間掃一掃手機睇下姐,咁多字點睇呀~仲未計老人家隻眼唔好老花睇唔到。唔緊要,我拍埋片比你有聲有畫,你唔好嫌棄浪費你data污染你眼睛就得。

乳房硬塊:我應該抽粗針定幼針?馬國權醫生
乳癌手術:開刀我仲有得揀?馬國權醫生
乳癌手術:做咩切我啲淋巴?馬國權醫生
未知點重建乳房前,千祈唔好做全乳切除。馬國權醫生
乳癌我可唔可以唔化療?馬國權醫生
乳癌我可唔可以唔標靶治療?馬國權醫生
乳癌我可唔可以唔電療?馬國權醫生
乳癌荷爾蒙治療 - 我可唔可以唔荷爾蒙治療?馬國權醫生
我真係好驚乳癌復發,點先可以保命保健康?馬國權醫生

 

懶到呢個點,我諗都稱得上終極懶人包,可以方便大家的都已經做咗,差就差在叉電開機呢D就未幫到。如果你都想幫到有需要嘅人,就麻煩你幫手share D pdf出去,無論係透過FacebookwhatsapppdfQR Codeprint 出黎,總有一款你係做得到嘅,唔該曬。

封面圖片來源:互聯網