醫乳癌公私營合作 - 教你點保障自己

Posted by in Doctor 醫生

「我對公立醫院已經失去信心,想去搵私家醫生醫,咁我點樣先可以攞返D報告比私家醫生睇?」

「私家醫生收費好昂貴,我已經負擔唔起,想返去公立醫院醫,佢地會唔會唔收我?」

每一日都有大量病友面對以上煩惱,究竟點樣先可以保障自己、為自己/心愛嘅家人爭取最佳治療⋯⋯

有人辭官歸故里,有人漏夜趕科場。
有人想轉去私家醫,有人想返去公立醫。

今次教你呢兩個情況有咩要留意,點樣保障自己最大利益:

1)想去私家醫

「日日報章都報導醫療事故,我已經對公立醫院失去信心⋯⋯」
「政府醫院等手術等得太耐喇,我想快D做手術⋯⋯」
「次次都睇唔同醫生,嗰個醫生咁後生,好似冇咩經驗比唔到信心我⋯⋯」

通常呢類病友已經係公立醫院睇咗一輪,想轉去睇私家,當然係因為唔滿意公立服務。咁但係已經開咗嗰頭,做咗D檢查,點先可以帶走D報告去私家繼續跟?方法有兩個:

方法一:直接叫醫生寫轉介信總結病歷加埋印埋重要嘅檢查報告。

「就係咁簡單?」

係,你冇聽錯,就係咁簡單。直接話比醫生聽你想去睇私家,唔洗左擰右擰/轉彎抹角嘅。你係唔係公立度睇,醫生根本唔在意,做又36唔做又36(人工冇多冇少,工時都係做足36小時)。你直接講啦,就好似女仔咁,爽快嘅性格特別受男仔喜愛,左擰右擰都唔知你係咪想要嗰個手袋。

「醫生唔肯印報告比我,要我去病歷檔案部度申請⋯⋯」

跟規矩的做法,真係要去申請嘅。不過除咗手續費加遂頁計,就算你唔嫌貴,一般起碼需時一頭半個月,對於心急如焚想去睇私家嘅病友,咁嘅效率點會令人滿意。

「咁點算?」

唔想人地揸正黎做,咁梗係唔好硬碰/郁D都話要投訴,呢個時候要用中國傳統智慧。

「咩叫中國傳統智慧?送禮?」

中國人最重「禮」,送禮係乎合中國國情,不過呢度係香港「特別」行政區,特別在我地有ICAC廉政公署,雖然湯顯明之後,我地已經好似不再特別。

所以我講嘅中國傳統智慧,係叫你動之以「情」。盡你所能令醫生明白,佢㩒個列印制,對於患乳癌嘅病友/家屬,已經係救人一命,勝做七級浮屠。再硬心腸嘅醫生都應該會㩒,個制又唔係有刺。

「喂,我醫生佢個制真係有刺,唔肯㩒喎,咁點算?真係要去申請?」

申請就係申請,不過唔係申請文字報告(等得黎都蚊訓),而係方法二:申請電子醫療檔案通行密碼

方法二:公私營醫療電子檔案

醫乳癌公私營合作

圖片來源:醫院管理局網頁截圖

「呢個係乜東東?」

1997年公立醫院實行醫療檔案電腦化,大部份紀錄/報告現在已經全面電子化,即係醫生好方便㩒個制就睇到舊紀錄。

2006年呢個系統局部開放比私家醫生,只要你申請一個專屬於你個人嘅電子醫療檔案通行密碼,再比呢個密碼有參加呢個計劃嘅醫生,佢就可以睇到你係公立醫院嘅大部份紀錄

「嘩,咁我D個人資料咪好唔安全?」

呢家咩都講私隱,醫管局已經好小心。私家醫生睇你D野時,你係會收到手機訊息通知嘅。另外你可以隨時退出計劃。

「咁點申請?」

先睇申請須知(http://www3.ha.org.hk/ppp/Download/271/PPI_ePR%20Doc%203%20Chi_Aug%2014_Patients%20Points%20to%20Note_4.pdf),之後填咗張申請表(http://www3.ha.org.hk/ppp/Download/269/Section_2_0a_Patient_1.pdf),再經以下任何途徑交返去(註:2/3/4非親身方法要加埋身份證副本):
1)親身:19間醫院嘅病人登記處
2)郵寄:香港九龍灣展貿徑一號九龍灣國際展貿中心11樓1193室
3)傳真:21940666
4)電郵:[email protected]

「唔知我醫生有冇參加呢個計劃呢?」

有名單可以check吓(https://ppi.ha.org.hk/PPI/CollaboratorList_m.aspx?i=1)。

「明白哂,我會考慮吓申唔申請⋯⋯」

總之就申請定啦,錢到用時方恨少,申請定對你百利而無一害,以後唔洗怕醫生唔肯㩒制/寫漏野,唔洗等到頸到長都未收到報告,唔洗逐頁比錢印紀錄仲要唔update/周圍帶。

了解完公立去私家,係時候睇吓私家去公立。

2)想去公立醫

「私家醫生收費好昂貴,我已經負擔唔起,想返去公立醫院醫,佢地會唔會唔收我?」

香港嘅醫療制度係非常之好嘅,只要你肯黎加唔介意等,係唔會拒絕任何病人,唔洗擔心私家睇過公立就唔收

「私家建議用呢隻XXX藥,公立醫院會唔會冇?」

所有藥私家有嘅公立都會有,雖然有時要自費買(太貴嘅藥/想要正廠藥)。

「私家建議XXX方案,公立醫院會唔會跟?」

所有野都係講醫學理據,合理咪跟,唔合理咪唔跟。你係可以問清楚醫生跟同唔跟背後嘅理據。

「好,我決定返去公立醫院醫,有咩要注意?」

記得帶齊所有文字報告同片。好多時病友黎睇醫生,以為揸住封轉介信就得,大安旨意以為私家醫生咩都寫齊係度。姑勿論醫生有冇寫齊係度,但人會錯㗎麻,所有野都係眼見為實,你都想第二個醫生幫吓眼,睇吓有冇野漏。所以唔好懶,第一次見醫生,屋企有咩新舊報告帶曬去,第二次冇用先唔帶

「幾年前D報告/片都帶?」

係,有時咁啱得咁橋,可能幾年前已經做過相關檢查,新舊對比有冇變化係一個好重要嘅資訊,會大大影響往後治療方向

「仲有冇野要注意?」

有D大私家醫院照嘅造影檢查/MRI/CT/PET scan,佢地其實可以上載到醫管局的內聯網,咁公立醫院醫生就可以電子化咁睇報告/片。呢個服務唔係間間自動波,好多時你要提出要求/申請,佢地先會咁做

另外有時私家抽粗針確診乳癌,係冇做荷爾蒙受體/標靶受體測試的,因為額外測試始終牽涉額外費用,最終都係會轉價病人身上。如果公立醫院醫生想手術前知道呢D資料,係可以問私家化驗所借返D玻璃片返去公立醫院補做返,咁就可以避免抽多一次針

 

醫乳癌公私營合作總結

無論由公立出去私立,定由私立返去公立都好,學識以上要點,帶齊所有報告,咁就可以減少不必要嘅等候/重複做不必要嘅檢查,為自己/自己心愛嘅家人爭取最佳治療。

有唔明?係下面寫低佢,我會盡量解釋你聽⋯⋯

封面圖片來源:互聯網