乳房磁力共振（MRI Breast）－我又洗唔洗照吓？
「我見朋友照咗乳房磁力共振 （MRI Breast），點解我嗰醫生淨係叫我照乳房X光／超聲波？我洗唔洗自己比錢去照吓？」究竟乳房磁力共振幾時做？有冇用？我地一齊去睇吓⋯⋯
乳房磁力共振
「究竟咩野係乳房磁力共振？」
乳房磁力共振其實係乳房造影的其中一種，就好似乳房X光／超聲波咁，用黎照清楚乳房，睇吓有冇生乳癌。
原理係咩唔洗理，只要知道佢係用2個重點去分析吓D細胞肉唔肉酸：
1）磁力（唔係輻射）
2）顯影劑（gadolinium contrast）
「點解呢2樣野係重點？」
因為要利用磁力，所以身體有內置金屬（例如心臟起膊器、骨科手術的螺絲、釘等等）就要小心，輕則影響照出黎的影像，重則直情唔照得。如果真係有內置金屬，問清楚醫生佢係咪照得磁力共振（MRI-compatible），或者上網自己check check（www.MRIsafety.com)。
另外因為要打顯影劑，係有可能敏感，或者傷腎（本身腎功能有問題的朋友又要小心）。仲有懷孕就最好唔好照，因為顯影劑係會穿過胎盤去到BB度，有冇問題冇人夠膽寫包單，所以可免則免。
「咁實際點樣做？同乳房X光／超聲波有咩分別？」
乳房X光同超聲波可以參考返之前文章：乳房造影檢查 （ 乳房X光 ／ 超聲波 ） － 乳房檢查三步曲。
圖片來源：GE Healthcare
乳房MRI呢，就係扒係張床度，兩邊乳房下垂入個凹位度，跟住進入部MRI機度，一路打顯影劑一路照，其間部機轉動會好嘈嘅，D醫護人員又走清光（因為怕佢地身上的金屬影響你），不過唔洗驚，佢地會喺房外面指導你每一步點做。
記著，照就照打顯影劑嘅乳房磁力共振（即係MRI Breast with contrast），千萬唔好貪平照冇顯影劑的MRI Breast without contrast，有野都睇唔到嘅。
乳房磁力共振優點與缺點
「咁乳房MRI有咩賣點？」
賣點就係冇輻射（因為係用磁力），喺搵乳癌方面超級靈敏（high sensitivity），即係有殺錯冇放過。
「咁正？咁我而家就去book⋯⋯」
唔好咁心急，聽埋我講缺點先⋯⋯
「係係係，咁有咩缺點？」
缺點就係唔準確（low specificity），即係殺錯咗良民，sorry。
「仲係唔明？！咩又靈敏又唔準確？你講咩呀？」
圖片來源：蘋果日報
打個比喻，香港D政客對於政府嘅施政就係好靈敏，咩建議連名稱都未洗聽，反應好多時只有一個，就係「反對／拉布」，即係有殺錯冇放過。咁事實上呢D施政／基建係咪真係唔好要反對呢？好多時都係殺錯咗良民，（政客係唔會say sorry嘅）。
乳房MRI對於乳房嘅變化係好靈敏，某變化係咪乳癌黎㗎呢，報告／反應好多時只有一個，就係「唔正常／要切」，即係有殺錯冇放過。咁事實上呢D變化係咪真係乳癌要切呢？好多時都係殺錯咗良民，sorry。
「乳房MRI好似咁廢咁嘅？咁仲有咩用？」
圖片來源：立場新聞
主要用途就係貪佢咩都反對的特性，如果連政客都支持嘅政府政策，呢個一定係派錢，呢個一定係德政。
主要用途就係貪佢咩都話唔正常的特性，如果連乳房磁力共振都話正常，呢個一定係良性，呢個一定唔係癌症。
［編按：呢度個「一定」係為咗排比句（好似D小學TSA咁）行文通暢，係誇張咗嘅，實際係好大好大機會。呢個世界冇咩野係一定嘅，唔好拿著個正常乳房磁力共振報告，就大安旨意冇事，有D乳癌係磁力共振都捉唔到。所以乳房有咩唔妥，都係問返自己乳腺科醫生。］
乳房磁力共振vs抽組織
「我乳房X光／超聲波話有可疑陰影，醫生叫我抽針，可唔可以照乳房磁力共振去替代抽針／抽組織？」
唔可以，乳房磁力共振並不能替代抽針評估。就算你真係走去照咗MRI，無論報告有野冇野都好，乳房造影有可疑陰影都係會建議抽粗針／抽組織。
5大常見照乳房磁力共振情況
「咁實際有咩情況醫生會建議照乳房磁力共振？」
通常以下情況會考慮照乳房磁力共振：
1）已確診乳癌，打術前化療／標靶治療，用黎跟進住進展。
2）打過野隆胸，乳房X光造影／超聲波花鬼曬根本睇唔到，就要用磁力共振去睇睇。
3）乳癌基因突變（BRCA1/2），高危復發病人，除咗定期要照乳房X光造影／超聲波之外，仲可以照埋磁力共振去監測。
4）我地高度懷疑乳癌（例如癌指數好高／PET scan著燈／甚至腋下淋巴已經證實有癌細胞擴散），但乳房X光造影／超聲波完全正常，咁就用個超級靈敏嘅磁力共振去睇吓係咪真係冇鬼鼠野。
5）乳房X光／超聲波報告模棱兩可時，例如分唔到手術後陰影係疤痕定復發，可以去照磁力共振攞多D資訊去幫助評估。
手術前要照乳房磁力共振？
「我唔係以上任何一類，但醫生建議我做手術前做Breast MRI，咁係咩原因呢？」
有D醫生覺得MRI可以搵到／排除其他隱藏的乳癌源頭，咁做手術時可以選擇一併割埋／做清D，減低翻手機會／命長D。
現階段2016年1月（第時有咩新證據唔敢講／冇得估），我對呢個做法有保留，因為暫時醫學文獻覺得以上論點都係缺乏支持。
舉個例，呢個2014年刊登的研究（An Individual Person Data Meta-Analysis of Preoperative Magnetic Resonance Imaging and Breast Cancer Recurrence），發覺3169個乳癌病人手術前照咗同冇照MRI，原來手術8年後局位復發／遠端復發率根本冇分別。
https://ascopubs.org/doi/pdfdirect/10.1200/JCO.2013.52.7515
另外針對係咪照咗MRI就切得清D／少D翻手，可以參考以下研究（The association of preoperative breast magnetic resonance imaging and multiple breast surgeries among older women with early stage breast cancer.）：
http://www.ncbi.nlm.nih.gov/m/pubmed/23354364/
研究睇咗45453個乳癌病人（呢個係一個超大型研究，概念大概係咁：香港最新一年有三千個乳癌新確診個案，四萬五千人即係等如研究成功邀請曬超過15年黎香港的新乳癌個案去參加研究，有幾代表性你可以有個印象）發覺兩成人（20.8%）要翻手做多過一次手術，但原來有冇照MRI都係咁上下比率。
你而家知道原來手術前照MRI係「唔可以」降低翻手機會／切清D／命長D，所以如果你唔係以上5個類別病友，手術前照乳房磁力共振，可謂多此一舉。
結論
圖片來源：TVB劇集＜皆大歡喜＞
乳房磁力共振唔係皆大歡喜池力共鎮，唔好見人振你又振，做多餘的檢查只會浪費你時間金錢。錢都事小，但如果因為咁搞搞震而阻遲咗乳癌的正式治療，受害嘅只係自己。乎合以上5個類別人士，就先同乳腺科醫生傾傾洗唔洗照MRI。
香港乳癌及乳病治療中心
