Recurrence 復發 – 香港乳癌及乳病治療中心 Hong Kong Breast Cancer And Disease Centre

乳癌復發治療攻略－求生大作戰

HK Breast — Wed, 07 Jun 2017 11:25:29 +0000

上次講到乳癌復發原來分3大類，治愈率同治療方法都好唔同，究竟乳癌復發仲有冇得醫？為咗生存，你可以去到幾盡？「乳癌復發治療攻略－求生大作戰」開始⋯⋯ 1）曾經有事嗰邊乳房／胸口局部復發個名太長，以下我地簡稱為「局部復發」，即係上次局部割／保留咗嘅乳房，甚至重建出黎嘅乳房，又再生乳癌。或者，上次全乳房切除冇重建嘅，就喺個胸口復發。呢個仲係有得醫嘅，不過會因應你之前做過嘅治療而有所微調：局部復發乳癌手術篇 1）之前局部割嘅，而家一定要全乳房割。因為事實證明保留乳房失敗，同埋以前電過唔可以同一部位電2次。 2）之前全乳房割嘅，而家要睇吓仲可唔可以再割，有可能要植皮／皮瓣先可以刪得埋個傷口。 3）之前有做乳房重建嘅，仲割到嘅就就咁割，但要有心理準備可能要拆咗個重建乳房去。局部復發乳癌化療篇 1）之前有化療嘅，喺化療嘅藥物選擇上，要就住以往用過嘅劑量／種類調節一下，可能用其他第一線化療，或者第二線，甚至第三線化療。另外有D化療藥（例如紅魔鬼）係有劑量頂點嘅（呢D我地叫cumulative dose），你身體呢一生可以打幾多其實係有限制。 2）之前冇化療嘅，而家就要化療返。局部復發乳癌標靶治療篇要睇返之前做過未，同埋復發腫瘤嘅特性（標靶受體陽性定陰性），先可以決定點做。呢個十分複雜，因為人人唔同，一定要問返自己醫生，2015年大方向就好似以下個表咁（注：醫學發展太快，下一刻可能就更新／變／錯，記緊問返自己醫生最update最貼身嘅方案）：局部復發乳癌電療篇 1）之前電過嘅，而家冇得再電。 2）之前冇電療嘅，而家要電返，藉以加強局部控制。局部復發乳癌荷爾蒙治療篇同標靶治療一樣，要睇返之前做過未，同埋復發腫瘤嘅特性（荷爾蒙受體陽性定陰性），先可以決定點做。呢個十分複雜，因為人人唔同，一定要問返自己醫生，2015年大方向就好似以下個表咁（注：醫學發展太快，下一刻可能就更新／變／錯，記緊問返自己醫生最update最貼身嘅方案）： 2）另一邊冇事嗰邊乳房生乳癌呢個係最簡單嘅，就係所有野回帶咁黎多次，又係乳癌治療5寶（手術／化療／標靶治療／電療／荷爾蒙治療）出動嘅時候。唯一有少少分別： 1）如果手術上次原本有事嗰邊，係全乳切除而又冇重整嘅話，咁呢次新呢邊都傾向全乳切除，因為對稱D。除非特別原因，如果唔係嘅話，大部分病友好少可話想／揀保留單邊乳房。 2）之前有化療嘅，就好似上面咁，就住以往用過嘅劑量／種類調節一下化療嘅藥物選擇。 3）標靶治療同荷爾蒙治療：大方向就好似以上兩個表咁。 3）遠端復發（即係擴散／轉移）呢個係最唔開心嘅，去睇睇「乳癌四期治療－末期仲有冇得醫？」乳癌復發治療攻略結論清楚晒乳癌復發應該點面對，心裡嘅不安雖不至一掃而空，但我地可以做嘅已經盡晒力，剩落黎嘅就安然交返比個天啦。下次我地轉轉話題，講下生BB沖喜吓：「乳癌康復後懷孕－我想生BB！」有唔明？係下面寫低佢，我會盡量解釋你聽⋯⋯ 封面圖片來源：互聯網分段圖片來源：改篇自互聯網

The post 乳癌復發治療攻略－求生大作戰 appeared first on 香港乳癌及乳病治療中心 Hong Kong Breast Cancer And Disease Centre.

乳癌復發點算好？

HK Breast — Wed, 07 Jun 2017 11:23:31 +0000

弊喇弊喇，醫生懷疑我乳癌復發呀！點算好？仲有冇得醫？⋯⋯ 「復發呀～弊喇弊喇～死喇死喇～」如果懷疑復發，唔好亂，千其唔好亂，亂係幫唔到件事嘅。「而家復發呀！咁我唔亂又可以做咩？」有兩樣好重要嘅野要做： 1）組織上嘅確診 2）重新評估第幾期 1）組織上確診「醫生都話懷疑復發咯，死梗喇呢次，仲咩仲要拮我一針？」雖然唔係所有復發都可以再抽組織（例如骨），但如果可以再抽組織嘅話，絕對值得再抽，理由如下： 1）百分百確定。因為照掃描／造影話有復發，係可以搞錯嘅。例如話擴散去肺，點知原來係肺勞。如果診斷有誤，而做錯治療，就白白承受咗治療嘅風險。因此可以嘅話，一定要再抽組織確定。 2）睇吓標靶受體／荷爾蒙受體有冇轉（由有變冇／冇變有）。復發嘅乳癌同原來嘅乳癌係可以唔同嘅，咁亦部分解釋得到點解治療失效，情況有如細菌同抗生素嘅「抗藥性」關係咁。如果由冇受體變有受體（即係對治療由冇反應變有反應），咁就有多D藥可以用。另一方面，如果由有受體變冇受體，咁就唔洗晒心機／金錢／時間喺D冇效嘅治療度。當確定咗真係復發同有咩治療夾之後，下一步要做嘅就係重新評估自己第幾期⋯⋯ 2）重新評估第幾期要斷定第幾期，都係好似開初咁，離唔開「電腦掃描加骨掃描」vs「正電子掃描」。呢個時候，已經衰第二次，如果經濟許可嘅話，我會強烈建議照正電子掃描，因為我地真係好需要一個高清掃描去幫我地計劃下一步點做。「Breast HK，我好窮，真係負擔唔起，有冇方法幫幫我？」如果真係好窮（家庭資產大概三萬蚊樓下）／攞綜援／公務員（家屬），記得叫醫生轉介醫療社工，可以政府資助免費去伊利沙伯醫院（住九龍），或者東區醫院（住香港）照正電子掃描。「我照咗正電子掃描喇，之後要點做？」之後就對返自己最新係屬於第幾期：乳癌零期原位癌－我係咪0期？乳癌一期－我係咪第1期？乳癌二期－我係咪第2期？乳癌三期－我係咪第3期？乳癌四期－我係咪第4期？再對號入座，睇返相應嘅攻略，就大概知點做：乳癌零期治療攻略－原位癌有咩咁特別？乳癌一期治療攻略－早期都要做化療？乳癌二期治療攻略－做手術先？做化療先？乳癌三期治療攻略－醫好機會大唔大？乳癌四期治療攻略－末期仲有冇得醫？不過既然今次係復發，即係之前有做過治療啦，以上嘅乳癌治療攻略要再微調一下先得。乳癌復發大作戰仲記唔記得上篇講過嘅乳癌復發3大類： 1）曾經有事嗰邊乳房／胸口局部復發 2）另一邊冇事嗰邊乳房生乳癌 3）遠端復發（即係擴散／轉移）原來3樣野嘅治癒率同處理方法好唔同，下一篇「乳癌復發治療攻略－求生大作戰」就住以上乳癌復發3大類，幫你微調乳癌治療攻略，同你一齊對抗乳癌復發⋯⋯ 有唔明？係下面寫低佢，我會盡量解釋你聽⋯⋯ 封面圖片來源：互聯網

The post 乳癌復發點算好？ appeared first on 香港乳癌及乳病治療中心 Hong Kong Breast Cancer And Disease Centre.

乳癌復發10大病徵－你記緊要留意

HK Breast — Wed, 07 Jun 2017 11:20:43 +0000

乳癌檢查我一定跟足指示去做，但我平時有咩要注意？乳癌復發／轉移有咩病徵㗎？有冇復發先兆？⋯⋯ 喺講乳癌復發病徵前，我地要了解一D基本資料先。原來乳癌復發分3大類，唔同種類有唔同病徵⋯⋯ 乳癌復發3大類乳癌復發分3大類： 1）曾經有事嗰邊乳房／胸口局部復發 2）另一邊冇事嗰邊乳房生乳癌 3）遠端復發（即係擴散／轉移） 1）曾經有事嗰邊乳房／胸口局部復發個名太長，以下我地簡稱為「局部復發」，即係上次局部割／保留咗嘅乳房，甚至重建出黎嘅乳房，又再生乳癌。或者，上次全乳房切除冇重建嘅，就喺個胸口復發。「咁局部復發有咩病徵㗎？」通常就係摸到有舊野（硬塊／腫塊）／有粒粒，呢次病友通常都學精咗，唔會再以為自己唔痛就冇事，或者掉以輕心以為「良性乳房纖維瘤」姐。「咁喺邊度摸到有舊野／粒粒？」如果係局部割嘅，最大機會就係以前手術範圍嗰度。因為我地知道出過事嘅地方係易D再出事嘅（漏過水嘅地方係易D再漏水嘅）。「但我點知邊度係以前手術範圍嗰度呢？」如果第一次有乳癌時喺摸到嘅，就係喺返嗰度。如果第一次有乳癌時喺摸唔到嘅，就要靠條疤痕喺邊度去估。「但我條疤痕唔係直接喺乳房腫瘤之上嘅，我個乳腺科醫生手勢好好，幫我隱藏咗喺乳暈邊，咁我點知要留意邊度？」咁要問返你個乳腺科醫生，睇返D舊記錄先知。「我係全個乳房切晒但冇重整嘅，咁應該摸邊度？」摸成個胸口，因為冇重建乳房，成個胸口都係平嘅，所以有咩硬塊／粒粒野都好易摸。「咁如果有重建乳房又點呢？」呢個就難摸D，雖則都係成個新乳房周圍摸，不過可以集中精力摸「圓型疤痕」嘅外圍，因為嗰度先係真正乳房皮膚／最接近原本乳癌嗰個位。「死啦死啦，我真係摸到舊硬硬地嘅野，點算好？係咪一定係復發？」硬塊唔一定係復發，可以係好多野嘅，例如：疤痕／脂肪硬塊（fat necrosis）。不過你有前科，都係快D去睇乳腺科醫生，做齊乳癌檢查三步曲（等佢又檢查吓／照吓／抽吓組織），睇吓係咪真係出事。「除咗有粒粒，仲有冇其他病徵我要留意？」其實其他病徵（乳頭分泌物／乳頭凹陷）相對乳房有粒粒黎講，可以話相對罕有。唯一要留意嘅係胸口發炎，因為有時乳癌復發未必發現有粒粒，佢可以個胸口紅咗一撻（好似發炎咁），自己唔會退，越來越大撻，其實係癌細胞黎。呢個常見於D好惡／好後期嘅乳癌，例如第三期三陰性乳癌。「都摸唔到野，咁醫生點先知係復發，而唔係普通發炎？」呢樣野又係講醫生嘅經驗，如果醫生有懷疑，佢會叫你喺局部麻醉下，割少少皮膚拎去驗，咁樣就知有事定冇事。 2）另一邊冇事嗰邊乳房生乳癌嚴格黎講，呢個唔算係復發，因為同有事嗰邊係兩個獨立事件（雖則我地知道自己有乳癌病歷，係會增加另一邊乳房生乳癌嘅風險嘅，呢D就可能係傳統智慧所講嘅「黑開有條路」）。不過喺病人角度，當然算係復發，一邊搞掂完另一邊又出事。「咁有咩病徵？」即係所有野回帶黎多一次：乳癌症狀：我係咪生乳癌？乳房硬塊：我係咪生乳癌？1 乳房痛楚：我係咪生乳癌？2 乳頭分泌物：我係咪生乳癌？3 乳頭凹陷：我係咪生乳癌？4 乳房發炎：我係咪生乳癌？5 3）遠端復發（即係擴散／轉移）「成日聽人講乳癌擴散／轉移，我真係好驚呀，其實乳癌會走去邊度㗎？」圖片來源：American Society of Clinical Oncology 乳癌可以擴散去淋巴，或者遠端器官： 1）淋巴轉移（lymph node metastasis）：呢個病徵同乳房復發差不多，都係摸到有舊野／硬塊／腫塊／粒粒。不過位置今次唔再喺乳房／胸口，而喺係腋下／鎖骨對上／頸兩側。 2）骨轉移（bone metastasis）：即係你聽人講嘅「入骨」，病徵就係骨痛，有時嚴重可以痛到訓唔到。（不過唔好見自己周身骨痛就驚定先，可以係普通風濕／食抗荷爾蒙藥AI嘅副作用）。另外如果嚴重嘅骨轉移，係可以壓住脊髓神經（cord compression），搞到下半身癱瘓。 3）肺轉移（lung metastasis）：通常都係肺積水，搞到你覺得條氣唔順，呼吸有困難。通常病友呼吸有問題，都已經一早去咗急症室求診，唔會等到門診覆診話醫生聽。 4）肝轉移（liver metastasis）：通常冇咩病徵，後期右上腹可能痛（因為肝大脹住咗），另外個人可能會黃（黃疸jaundice）。 5）腦轉移（brain metastasis）：慢性病徵就係頭痛同埋無緣無故嘔（因為腦內壓力過高），急少少嘅可能好似有D輕微中風跡象（突然間手腳唔協調／冇力，口齒不清）。乳癌復發10大病徵清楚了解咗乳癌復發3大類，係時候歸納一吓，由你角度要留意嘅「乳癌復發10大病徵」： 1）乳房／胸口有硬塊／腫塊／有粒粒／有舊野 2）胸口紅咗一撻／發炎 3）乳頭分泌物 4）乳頭凹陷 5）淋巴位置（腋下／鎖骨對上／頸兩側）有硬塊／腫塊／有粒粒／有舊野 6）骨痛／下半身癱瘓 7）條氣唔順 8）右上腹痛／個人黃 9）頭痛／無緣無故嘔 10）中風跡象睇到呢度，你實心諗「死喇死喇，我中咗呢樣⋯⋯又中咗嗰樣呀⋯⋯」就算冇中都好，你實會擔心「而家冇姐，第時到我中咁點算好？」下一篇：「乳癌復發點算好？」再見⋯⋯ 有唔明？係下面寫低佢，我會盡量解釋你聽⋯⋯

The post 乳癌復發10大病徵－你記緊要留意 appeared first on 香港乳癌及乳病治療中心 Hong Kong Breast Cancer And Disease Centre.

Recurrence 復發 – 香港乳癌及乳病治療中心 Hong Kong Breast Cancer And Disease Centre

乳癌復發治療攻略 － 求生大作戰

乳癌復發點算好？

乳癌復發10大病徵 － 你記緊要留意

乳癌復發治療攻略－求生大作戰

乳癌復發10大病徵－你記緊要留意