Investigation 檢查 – 香港乳癌及乳病治療中心 Hong Kong Breast Cancer And Disease Centre

乳房檢查三步曲－幫你分辨良性惡性的利器

HK Breast — Sat, 02 Mar 2019 09:02:18 +0000

一連五篇＜乳癌警號＞為大家介紹了我們要留意的乳癌病徵，那麼如果懷疑自己有問題，該如何是好？如何分辨良性與惡性病變？那便是這篇的主角「乳房檢查三步曲」⋯⋯ 乳腺科醫生如果懷疑自己乳房出了問題，當然最合理的做法便是找醫生檢查清楚。那該找哪一科醫生檢查呢？很多病人也誤以為婦科，原來乳房隸屬乳腺科，是外科專科的其中一個分支，所以找外科便對了。乳房檢查三步曲那找了外科醫生後，他是如何分辨良性與惡性病變的呢？原來依靠的是三個重要的步驟，我們統稱為乳房檢查三步曲，亦即臨床檢查、造影檢查和抽組織檢查。第一步曲：臨床檢查臨床檢查包括問診及檢查兩部分。問診主要讓醫生了解更多關於病徵的詳情，以及有沒有患乳癌的高危因素（例如個人乳房病歴、家族乳癌病史、長期服用避孕藥等等），好使醫生有一個初步印象究竟情況可不可疑。之後醫生便會為你作乳房檢查，先觀察有沒有明顯的腫塊、凹陷、橙皮紋等等。隨之而來的是觸診，檢查清楚有沒有乳房硬塊及淋巴腫脹。但原來即使有硬塊腫瘤，也可以觸診觸不到的，究其原因是有很多因素會影響觸診的靈敏度，包括腫塊大小（越小越難）、深淺度（越深層越遠離皮膚越難）、乳房豐滿度（越豐滿越難）。可見臨床檢查只是開端，並不是終結，下一步便是第二步曲。第二步曲：造影檢查由於觸診的不確定性，乳腺科醫生實在需要一些更穩定的方法，去䆁除病人的疑慮。第一樣可以考慮的東西便是超聲波（內地稱為B超／彩超），我們常打趣道它是乳腺科醫生的第三隻手。它透過沒有輻射的聲波，去一窺乳房的內部，就有如透視眼一樣，看清有沒有成型的腫瘤。但對於未成型的腫瘤（例如原位癌），它們多以鈣化點的形態出現，此時超聲波便顯得力不從心。可幸的是我們還有另一利器：乳房X光造影（內地稱為鉬靶）。原理像是菲林片般，黑底看白點，鈣化點便無所遁形。很多病人問我，我已經照了X光或超聲波，為何醫生還要我照餘下的造影。我們要明白，X光和超聲波不是對立的，互相取長補短，多角度去評估乳房，不是更好嗎！不過即使找到目標或問題所在，也不要過早高興。因為這還是不足的，我們還得要對症下藥才行。單單靠乳房造影還是未能達到斷症的黃金標準，所以有第三步曲的出現。第三步曲：抽組織檢查顧名思義，抽組織意即拿一些組織去顯微鏡底下，放大數千倍至每個細胞看得清清楚楚為止，此乃診斷的黃金標準，到底是癌症還是良性瘤也是以此為依歸。乳房要抽組織，常見簡單的做法為抽針，醫生會依情況建議抽粗針還是幼針。一般來說，如果是可疑的情況，抽粗針，因為如果確診癌症的話，我們還得要分辨原位癌／侵蝕性癌，以及癌症的屬性。如果是水囊或良性情況，抽幼針。有時候在罕見的情況下，抽針也未能確定診斷，那便要做手術移除了。經過以上乳房檢查三步曲的洗禮，我們能正確分辨百分之九十九的乳房情況。認識這利器，以後有任何乳房問題，便不應再胡亂猜測自己情況。及早找乳腺科醫生檢查清楚，免卻終日提心吊膽之苦。馬國權醫生香港乳癌及乳病治療中心外科專科醫生原文刊載於《直通車月刊》2018年5月號

The post 乳房檢查三步曲－幫你分辨良性惡性的利器 appeared first on 香港乳癌及乳病治療中心 Hong Kong Breast Cancer And Disease Centre.

誰是壓死2D乳房X光造影的最後一根稻草？

HK Breast — Tue, 20 Jun 2017 08:51:34 +0000

傳統數十年以來，乳房X光造影有著皇者的領導地位，無非是技術既簡單且普及，多個不同國家數以十萬計的病人，實證它能有效偵測乳癌，減低死亡率，所以多國乳癌普查多以此為依歸。但科技發展一日千里，一直源用數十年前的技術，一本通書看到老，不用多說大家亦感不妥。難道乳房X光造影發展毫無寸進？非也！這次給大家介紹一下乳房X光造影發展史，齊來看看誰是壓死2D乳房X光造影的最後一根稻草⋯⋯ 2D乳房X光造影傳統要看穿乳房?面有沒有問題，簡單的做法便是給它拍個穿透力強的照片，這偵照片便是乳房X光，情況便有如大家耳熟能詳的肺部X光，只是這次是乳房吧了。這張X光能給醫生很多資訊，例如有沒有不正常陰影、不正常的鈣化點等等。但將一個立體器官壓成平面的X光，醫生要準確把不妥當的地方定位，我們便需要有三個軸（X軸、Y軸及Z軸）的座標。因此一般乳房X光造影是需要拍兩個角度的，一個傾斜角度（MedioLateral Oblique view, MLO），一個鳥瞰角度（Cranial Caudal view, CC）。數碼2D乳房X光造影悠久以來，2D乳房X光造影所採用的底片是菲林片，就像傳統菲林相機一樣。現在菲林相機已經被淘汰，新生代可能從來未見過。就像當日數碼相機取締菲林相機，數碼2D乳房X光造影正正取締傳統菲林X光造影。好處是後製空間大，可以調光暗、調對比，感光範圍亦較大，我們正受惠於科技進步的成果，對於偵測乳癌更有把握。 2D乳房X光造影的局限縱然有這些進步，但將立體的器官壓成平面去看，難免有其局限，其中最大的問題便是「重影」。由於不同層次的影像會疊在一起，有兩個問題會產生：1）假陰性（有問題的地方被前後組織遮蓋住，以至造影偵測不到有問題存在）；2）假陽性（明明正常但影像重疊，誤以為出了問題）。兩個情況也是不理想的，一個錯失了及早診治的機會，一個便白白擔驚受怕。如果醫生發現造影有不確定的地方，通常會召回病人覆照，例如Magnification view／spot compression view等等，希望加大些壓力、放大一些、不同角度等等去釐清事實。又或輔以其他方式（例如超聲波、磁力共振），去檢查清楚。無論如何也好，當病人收到醫生／醫院電話要求覆照，三魂必定不見了七魄，以為這次死定了，原來很多時這些覆照源於技術的局限，情況並非想像般壞。為了突破這種局限，醫學界近年發展出一種新技術－3D立體乳房X光造影。何謂3D立體乳房X光造影？隨著醫療科技大躍進，2011年推出了第一代的3D立體乳房造影（Tomosynthesis），它的原理是希望透過不同角度（正負7.5度）去觀察乳房（立體器官用回立體的方式去評估），這樣便可以分辨出不同層次的組織，情況有如一本書，醫生遂頁遂頁看，遂層遂層乳腺組織去檢查清楚，希望解決2D乳房X光造影的假陰性、假陽性問題。第一代3D立體乳房X光造影的局限第一代3D立體乳房X光造影未被大規模採用，源於兩大問題，第一是價錢，因為傳統2D乳房造影醫生只需評估四張X光片，但3D立體乳房造影動輒要評估幾十張片（1mm乳房組織一張片），撰寫報告的人力物力要求大大增加，成本自然很可觀。第二是輻射量，因爲除了要照多角度之外，傳統2D的兩個角度（MLO，CC）也要照，所以輻射量大概為傳統乳房造影的兩倍。因爲它要照一套3D，之後再照一套2D。再加上因為新技術的關係，自然缺乏大量數據支持，所以窒礙了它的迅速發展。新皇者的誕生時代的巨輪是無懼障礙的，有第一代3D立體乳房X光造影，自然有第二代。於2013年推出市場的第二代3D立體乳房X光造影，可謂新的皇者。因為它解決了輻射的問題，現在第二代的輻射量已經與傳統乳房造影相約。它已經不用再分照一套3D一套2D，系統已經進步到只照一套3D，就已經可以透過電腦後製，合成為2D片（C-View）。照多這麼多角度，但輻射量竟然差不多，這是一個驚人的進步。除此之外，電腦合成（C-View）的後製2D片，比直接照的2D片更清晰，世上竟然可以發生這樣的事？其實也不難理解，情況有如手機HDR（high dynamic range）的相片般，影數張相片合成後的色域，比直接影一張相更好一樣。實際成效方面，研究發現它可以減低翻照率（recall rate）達40％，同增加發現侵蝕性癌症率（invasive cancer detection rate）達41％，這實在是乳房造影的大躍進。技術這麼優秀，所費自然不菲，3D比2D的成本高出大約一倍，取締2D乳房造影，價錢成為最後唯一的障礙。壓死2D乳房X光造影的最後一根稻草當天數碼乳房造影取締菲林乳房造影，情況就有如數碼相機取締菲林相機一樣。今天的3D立體乳房造影，就有如連手機也做到高速連拍，要捕捉笑容一刻，怎會比沒有連拍的手機差。假以時日，當技術普及化，成本降低之時，價錢將是壓死2D乳房X光造影的最後一根稻草。馬國權醫生香港乳癌及乳病治療中心外科專科醫生原文刊載於《直通車月刊》2017年6月號

The post 誰是壓死2D乳房X光造影的最後一根稻草？ appeared first on 香港乳癌及乳病治療中心 Hong Kong Breast Cancer And Disease Centre.

3D立體乳房造影－3D？2D？睇真D！

HK Breast — Wed, 07 Jun 2017 12:02:18 +0000

唔知由幾時開始，「3D」呢兩隻字對我地好似有特別魔力咁，所有野加個「3D」就即刻覺得好正好正，頓時升格十倍。細路仔去迪士尼睇電影要3D，後生仔打機又要3D，連普通睇電視都要3D。醫生都係人，所以逃唔出萬有引力，今次乳房造影都加個「3D」比佢，係咪頓時覺得正咗好多先？由於亞視已經執咗笠，今次唔係由大姐明帶你睇真D，而係由breasthk同你睇真D⋯⋯ 2D乳房X光造影未講3D之前，先由淺入深，講咗咩係2D先（拿拿拿，我都話3D對你有特別吸引力㗎啦）：傳統嘅乳房造影就係將一個立體的器官（乳房）壓成平面，再照一張X光睇下裡面有冇問題。「壓」呢個過程就係你成日聽到嘅「夾胸」。圖片來源：互聯網一個立體器官裡面如果有問題，我地要定位，自然要有三個軸（X axis，Y axis同z axis）的座標，所以醫生會幫你夾兩個角度，一個側側地睇（MedioLateral Oblique view, MLO），一個鳥瞰式咁睇（Cranial Caudal view, CC）。圖片來源：slideshare.net 圖片來源：slideshare.net 「明明地，兩個角度定到位咁仲有咩問題？」將立體變成平面咁睇，諗都諗到有問題，就係唔同層次的影像會疊埋曬一齊（即係你個影遮住我個影），之後有兩個問題會發生：一係有事的地方被前後組織遮住咗（即係有事但偵測唔到），一係就調返轉，明明冇事但D影像疊埋一齊誤以為個度有舊野（即係冇事當有事）。兩個情況都係唔理想的，一個就錯失左及早診治的機會，一個就明明冇嘢但嚇餐飽。「咁好大問題喎⋯⋯」傳統醫生如果有懷疑但唔肯定，通常會叫病人返黎翻照，例如Magnification view／spot compression view等等，希望加大D壓力、放大D、唔同角度等等去睇真D。又或者輔以其他方式（例如超聲波、磁力共振），去睇清睇楚。無論用咩方法都好，當病人一收到醫生／醫院電話要翻照，三魂都一定唔見咗七魄，以為自己呢次死喇死喇實出事喇，原來好多時呢D recall只係技術局限照唔清楚，並唔係自己諗到咁灰咁。為咗突破呢種局限，就輪到我地呢集主角出場，登燈登櫈，3D立體乳房造影，等我帶大家睇真D。 3D立體乳房造影「咁3D立體乳房造影又係咩黎呢？洗唔洗帶3D眼鏡睇？」隨著醫療科技大躍進，2011年推出咗第一代的3D立體乳房造影（Tomosynthesis），佢嘅原理係希望用唔同角度（正負7.5度）去望個乳房（立體器官用返立體的方式去評估），咁就可以分辨出唔同層次的組織（原理有如電腦掃描CT scan咁，將乳房每1mm切開一個斷層黎睇，就好似一本書有好多頁，醫生就遂頁遂頁睇，所以係唔洗帶3D眼鏡睇嘅），希望可以解決有病變但被人遮住，或者冇野以為有野的問題。「咁好正喎，點解唔大規模採用嘅？」第一代Tomosynthesis有兩大問題，第一係價錢，因為傳統乳房造影只係睇四張X光片，但3D立體乳房造影動輒要睇成幾十張片（1mm厚一張片），撰寫報告嘅人力物力要求大大增加，成本自然好可觀。第二係輻射量，因爲除左要照多角度之外，傳統2D嗰兩個角度（MLO，CC）都要照，所以輻射量大概係傳統乳房造影的兩倍（因爲佢要照一套3D，之後再照一套2D，廠叫呢個做Combo Mode）。一聽到貴，二聽到輻射，三再加上缺乏大量數據支持（因為新），所以阻礙咗佢大規模嘅發展（其實都叫發展得好迅速㗎喇）。第二代3D立體乳房造影「咁好可惜⋯⋯」又唔洗咁快可惜住，有得第一代自然有第二代（2013年推出），而家輻射嘅問題已經9成獲得解決，3D立體乳房造影的輻射量已經同傳統乳房造影相約。佢已經唔洗再分照一套3D一套2D，個系統已經進步到只照一套3D，就已經可以後製合成做2D片（用一個叫C-View嘅軟件後製，廠叫呢個做TomoHD Mode）。照多咁多角度，但輻射量竟然差不多，呢個係一個好驚人的進步。「咁好，咁公立醫院有冇得照呢？」一間間，有D教學醫院／龍頭醫院有，有D資源冇咁豐富嘅醫院當然暫時未有。「咁如果我自己出去照又幾貴？」如果係私家做3D立體乳房造影加超聲波，大概＄3800，相比起傳統乳房造影加超聲波的＄2200，仲係貴咗一節。「貴咁多，仲有冇其他賣點先？」 3D立體乳房造影仲有標榜冇咁痛，因爲唔洗好似傳統咁夾到扁晒，對於一D怕痛的女士係好吸引嘅。而且佢用電腦合成（C-View）的後製2D片，係仲清過直接照的2D片（真係竟然咁都得），其實都唔難理解，就好似手機HDR（high dynamic range）相咁，影幾張相合成後的色域係好過直接影一張相一樣：圖片來源：lowdose3d.com 上圖FFDM 2D即係傳統2D乳房造影直接照出黎嘅片，C-View 2D即係3D後製合成2D片，你係右上角放大嗰度會見到C-View 2D睇鈣化點仲清淅過傳統直出片，真係要寫個服字。圖片來源：lowdose3d.com 至於呢幅圖呢就顯示指住嗰舊癌，又係C-View完勝。另外D研究仲話可以減低回頭翻照率（recall rate）達40％，同增加發現侵蝕性癌症率（invasive cancer detection rate）達41％，呢個又係好重要嘅賣點。大勢所趨當日數碼乳房造影（digital mammography）取締菲林乳房造影，情況就有如數碼相機取締菲林相機一樣。今日的3D立體乳房造影，就有如連手機都做到高速連拍一樣，要捕捉小朋友笑容一刻，點都好過冇連拍的手機，取締2D乳房造影，實在是大勢所趨，價錢就係最後唯一的障礙。相關醫學專欄：誰是壓死2D乳房X光造影的最後一根稻草？封面圖片來源：亞洲電視＜今日睇真D＞截圖

The post 3D立體乳房造影－3D？2D？睇真D！ appeared first on 香港乳癌及乳病治療中心 Hong Kong Breast Cancer And Disease Centre.

乳房磁力共振（MRI Breast）－我又洗唔洗照吓？

HK Breast — Wed, 07 Jun 2017 11:39:04 +0000

「我見朋友照咗乳房磁力共振（MRI Breast），點解我嗰醫生淨係叫我照乳房X光／超聲波？我洗唔洗自己比錢去照吓？」究竟乳房磁力共振幾時做？有冇用？我地一齊去睇吓⋯⋯ 乳房磁力共振「究竟咩野係乳房磁力共振？」乳房磁力共振其實係乳房造影的其中一種，就好似乳房X光／超聲波咁，用黎照清楚乳房，睇吓有冇生乳癌。原理係咩唔洗理，只要知道佢係用2個重點去分析吓D細胞肉唔肉酸： 1）磁力（唔係輻射） 2）顯影劑（gadolinium contrast）「點解呢2樣野係重點？」因為要利用磁力，所以身體有內置金屬（例如心臟起膊器、骨科手術的螺絲、釘等等）就要小心，輕則影響照出黎的影像，重則直情唔照得。如果真係有內置金屬，問清楚醫生佢係咪照得磁力共振（MRI-compatible），或者上網自己check check（www.MRIsafety.com)。另外因為要打顯影劑，係有可能敏感，或者傷腎（本身腎功能有問題的朋友又要小心）。仲有懷孕就最好唔好照，因為顯影劑係會穿過胎盤去到BB度，有冇問題冇人夠膽寫包單，所以可免則免。「咁實際點樣做？同乳房X光／超聲波有咩分別？」乳房X光同超聲波可以參考返之前文章：乳房造影檢查（乳房X光／超聲波）－乳房檢查三步曲。圖片來源：GE Healthcare 乳房MRI呢，就係扒係張床度，兩邊乳房下垂入個凹位度，跟住進入部MRI機度，一路打顯影劑一路照，其間部機轉動會好嘈嘅，D醫護人員又走清光（因為怕佢地身上的金屬影響你），不過唔洗驚，佢地會喺房外面指導你每一步點做。記著，照就照打顯影劑嘅乳房磁力共振（即係MRI Breast with contrast），千萬唔好貪平照冇顯影劑的MRI Breast without contrast，有野都睇唔到嘅。乳房磁力共振優點與缺點「咁乳房MRI有咩賣點？」賣點就係冇輻射（因為係用磁力），喺搵乳癌方面超級靈敏（high sensitivity），即係有殺錯冇放過。「咁正？咁我而家就去book⋯⋯」唔好咁心急，聽埋我講缺點先⋯⋯ 「係係係，咁有咩缺點？」缺點就係唔準確（low specificity），即係殺錯咗良民，sorry。「仲係唔明？！咩又靈敏又唔準確？你講咩呀？」圖片來源：蘋果日報打個比喻，香港D政客對於政府嘅施政就係好靈敏，咩建議連名稱都未洗聽，反應好多時只有一個，就係「反對／拉布」，即係有殺錯冇放過。咁事實上呢D施政／基建係咪真係唔好要反對呢？好多時都係殺錯咗良民，（政客係唔會say sorry嘅）。乳房MRI對於乳房嘅變化係好靈敏，某變化係咪乳癌黎㗎呢，報告／反應好多時只有一個，就係「唔正常／要切」，即係有殺錯冇放過。咁事實上呢D變化係咪真係乳癌要切呢？好多時都係殺錯咗良民，sorry。「乳房MRI好似咁廢咁嘅？咁仲有咩用？」圖片來源：立場新聞主要用途就係貪佢咩都反對的特性，如果連政客都支持嘅政府政策，呢個一定係派錢，呢個一定係德政。主要用途就係貪佢咩都話唔正常的特性，如果連乳房磁力共振都話正常，呢個一定係良性，呢個一定唔係癌症。［編按：呢度個「一定」係為咗排比句（好似D小學TSA咁）行文通暢，係誇張咗嘅，實際係好大好大機會。呢個世界冇咩野係一定嘅，唔好拿著個正常乳房磁力共振報告，就大安旨意冇事，有D乳癌係磁力共振都捉唔到。所以乳房有咩唔妥，都係問返自己乳腺科醫生。］乳房磁力共振vs抽組織「我乳房X光／超聲波話有可疑陰影，醫生叫我抽針，可唔可以照乳房磁力共振去替代抽針／抽組織？」唔可以，乳房磁力共振並不能替代抽針評估。就算你真係走去照咗MRI，無論報告有野冇野都好，乳房造影有可疑陰影都係會建議抽粗針／抽組織。 5大常見照乳房磁力共振情況「咁實際有咩情況醫生會建議照乳房磁力共振？」通常以下情況會考慮照乳房磁力共振： 1）已確診乳癌，打術前化療／標靶治療，用黎跟進住進展。 2）打過野隆胸，乳房X光造影／超聲波花鬼曬根本睇唔到，就要用磁力共振去睇睇。 3）乳癌基因突變（BRCA1/2），高危復發病人，除咗定期要照乳房X光造影／超聲波之外，仲可以照埋磁力共振去監測。 4）我地高度懷疑乳癌（例如癌指數好高／PET scan著燈／甚至腋下淋巴已經證實有癌細胞擴散），但乳房X光造影／超聲波完全正常，咁就用個超級靈敏嘅磁力共振去睇吓係咪真係冇鬼鼠野。 5）乳房X光／超聲波報告模棱兩可時，例如分唔到手術後陰影係疤痕定復發，可以去照磁力共振攞多D資訊去幫助評估。手術前要照乳房磁力共振？「我唔係以上任何一類，但醫生建議我做手術前做Breast MRI，咁係咩原因呢？」有D醫生覺得MRI可以搵到／排除其他隱藏的乳癌源頭，咁做手術時可以選擇一併割埋／做清D，減低翻手機會／命長D。現階段2016年1月（第時有咩新證據唔敢講／冇得估），我對呢個做法有保留，因為暫時醫學文獻覺得以上論點都係缺乏支持。舉個例，呢個2014年刊登的研究（An Individual Person Data Meta-Analysis of Preoperative Magnetic Resonance Imaging and Breast Cancer Recurrence），發覺3169個乳癌病人手術前照咗同冇照MRI，原來手術8年後局位復發／遠端復發率根本冇分別。 https://ascopubs.org/doi/pdfdirect/10.1200/JCO.2013.52.7515 另外針對係咪照咗MRI就切得清D／少D翻手，可以參考以下研究（The association of preoperative breast magnetic resonance imaging and multiple breast surgeries among older...read more

The post 乳房磁力共振（MRI Breast）－我又洗唔洗照吓？ appeared first on 香港乳癌及乳病治療中心 Hong Kong Breast Cancer And Disease Centre.

乳房抽針檢查－乳房檢查三步曲3

HK Breast — Wed, 07 Jun 2017 08:49:11 +0000

終於黎到乳房檢查三步曲既終章－乳房抽針檢查。你成日上網見呢個話抽粗針化驗，嗰個又話抽幼針化驗，而你個醫生又叫你直接做手術喎，咁邊個先啱？今次同你逐一探討⋯⋯ 乳房抽針檢查醫生同你講：「你生癌呀⋯⋯」都未講完，你已經話：「醫生你肯定？有冇搞錯？」醫生同你講：「割出黎係良性纖維瘤咋⋯⋯」都未講完，你已經話：「吓，唔係癌黎㗎咩？」（唔生癌，都好似好失望咁）「究竟醫生點解可以咁肯定我生癌？」「究竟醫生點解手術前唔預計好啲？」種種心裏嘅問號，印證出抽組織化驗的重要。「咩係抽組織檢查？」喺大部份情況下都係泛指抽幼針／粗針，少部份情況下，可能要動用到手術去達到確診目的。幼針（Fine Needle Aspiration）顧名思義即係支針好幼（約1mm，用平時抽血啲針），因為支針幼，所以係冇局部麻醉藥嘅，因此會少少痛。外科醫生就係透過幼針來來回回吸啜乳房細胞，再由病理科醫生喺顯微鏡底下作出判斷。抽幼針有5個可能性（由C1到C5），詳細係咩黎可以參考乳房水囊／水瘤－有冇危險㗎？，裡面有詳細講。粗針（Core Needle Biopsy）顧名思義即係支針粗啲（約2mm），因為支針粗啲，所以係會比局部麻醉藥嘅。打麻醉藥時少少痛，之後唔痛。粗針既好處就係可以攞多啲組織，等病理科醫生易啲判斷，因此可以分辨出癌細胞有冇侵蝕性，同埋癌細胞對口服藥／標靶藥夾唔夾。伸延閱讀：乳癌治療時間－我需要用咩方法醫？2 直接做手術？「點解唔直接做手術，要抽組織先？」係公立醫院，99.99%情況下都一定要有組織報告先會同你做手術，因為有好嘅術前診斷，醫生先可以幫你諗割幾多／洗唔洗做格勒底淋巴手術／術前洗唔洗化療。你可以睇成醫管局怕你告佢做錯手術，但另一方面，亦都保障咗你唔會做錯手術，做錯咗點賠返個乳房比你。係私家個情況又係點呢？去到私家，樣樣都係錢，幼針要＄3000-4000，粗針要$4000-6000。你係病人，如果冇保險，手頭又唔鬆動，真係想唔抽組織直接手術。私家醫生呢，就會憑經驗決定跳唔跳過呢個步驟，所以仲有私家醫生會同病人做啲「加減手術」。「咩喺加減手術？」即係好似你去餐廳食飯，叫廚師（醫生）發板，食啲咩？自己都唔知。常見嘅加減手術「局部割＋急凍切片＋／－全乳房割＋／－前哨淋巴＋／－全淋巴切除＋／－乳房重整」，你亦都可以叫佢做「扭蛋手術」，因為扭咗隻咩蛋？（做咗咩手術？），扭咗（做咗手術）先知。唔喺人人都承受到訓醒醫生先講比佢聽冇哂成個胸嘅結果（心理上），或者承受到要埋張六位數字賬單嘅痛（荷包上）。我應該抽咩針？「Breast HK，我都係聽你講抽組織檢查先，不過抽幼針定粗針好呢？」 1）後生（30歲以下）／懷疑良性既：幼針就夠 2）上年紀嘅／可疑嘅：直接抽粗針（因為就算幼針話係癌，你都要再抽粗針去確定有冇侵蝕性，同埋同啲藥夾唔夾，所以幼針可免）有晒呢三篇／呢三個環節，醫生可以百分百話你聽你有冇／有咩事，良性惡性都好，之後就進入治療階段。下一篇，未去講乳癌點醫之前，要先補充返乳房檢查三步曲1中提到嘅患乳癌高危因素，想知自己係唔係高危，密切留意⋯⋯ 乳癌成因：我易D生乳癌嗎？相關醫學專欄：乳房檢查三步曲－幫你分辨良性惡性的利器封面圖片來源：改篇自互聯網