老人家乳癌治療攻略 － 唔做手術／治療得唔得？
我媽媽有乳癌時已經80歲喇，醫生建議佢做手術，不過我怕佢頂唔順，究竟老人家有乳癌唔做手術／治療得唔得？呢次老人家乳癌治療攻略帶你睇吓做咩治療最唔傷⋯⋯
老人家乳癌
唔知你仲記唔記得／有冇睇過，一個好耐之前講過嘅一個概念：年紀越大越易生乳癌。正正因為呢個原因，好多時病友家屬要面對嘅問題就係「佢已經70／80／甚至90歲喇喎，究竟乳癌可唔可以唔做『治療』？」
你只要將以上句式「治療」兩個字，自由代乳癌五寶「手術／化療／電療／標靶治療／荷爾蒙治療」入去，咁就成為典型問題，就好似「佢已經70／80／甚至90歲喇喎，究竟乳癌可唔可以唔做手術？」咁。
不過喺同你探討呢個典型問題之前，當然要加個警告字句：
警告：乳癌種類繁多，身體體質人人不同，心理取向更加是分秒轉變，乳癌治療方案應與自己醫生商量制定，千萬「不要」因為以下文章而做定唔做某一治療。以下內容僅為分享個人見解，帶有強烈個人色彩，不保證內容中立，敬請留意。
警告完之後終於可以入正題，其實呢個典型問題嘅核心就係「我怕佢頂唔順／怕治療辛苦／都幾廿歲唔好搞咁多野啦」，面對呢個複雜問題，係冇可能一篇文章可以解釋得清楚，不過有幾樣野知道咗係幫到你易D去做決定：
1）什麼治療最傷／最唔傷？（咁你先知佢頂唔頂得順／辛唔辛苦）
2）什麼治療成效最大？（咁你先知值唔值得去做某某治療）
3）仲有／仲想要幾耐命？（咁你先知治療係「搞咁多野」定「唔算搞得多野」）
1）什麼治療最傷／最唔傷？
如果要講治療副作用嘅排名，我會咁排（由最溫和至最多副作用）：食藥＜手術＜電療＜標靶治療＜化療。
以下喺一個圖像化嘅表達，等大家易明D我心目中嘅排名。每個人睇事物嘅方法都唔同，有人關心A副作用，有人看重B副作用，根本唔可能有一個統一客觀量化嘅比較。以下所依據的是我個人嘅知識／觀察同體會，係唔客觀嘅。
食藥（荷爾蒙治療）：呢個係最溫和嘅，日日食一粒藥，可以感覺得到嘅副作用其實有限，同埋有咩唔妥可以隨時轉藥／轉計劃，不過前提係你隻乳癌有荷爾蒙受體（ER＋）先得，好在老人家乳癌通常都係ER＋嘅。
手術：好多人一聽到（老人家）要做手術都怕怕（因為大部分人都未做過手術／冇相關經驗），其實老人家同後生做乳癌手術都係面對同樣問題，分別只係麻醉風險輕微上升（當然講緊本身相對健康嗰D，有長期病患就要個別評估），不過整體黎講都係好安全嘅。
電療：副作用一般，都係皮膚灼傷，不過老人家黎講就麻煩D，因為日日去醫院，如果行動唔方便／要後生日日陪都幾麻煩。
標靶治療：可能會傷心臓，同埋通常撘埋化療一齊做，所以喺老人家身上要小心D，有時就算HER2＋型醫生都未必建議做標靶治療。
化療：呢個就最傷，除咗A針可能會傷心臓之外，仲有一系列副作用。呢個亦都係神棍用黎攻擊西醫嘅常見手法：「化療／西醫好傷身㗎，試吓另類治療先啦⋯⋯」，往往令病友錯過黃金治療機會。化療係傷，不過都唔洗一竹篙打一船人（因為所有治療並唔係捆綁式的），用唔用某某療法嘅決定權其實喺自己手上，呢個係一個平衡完好處同唔好處嘅理性決定。
2）什麼治療成效最大？
呢次個排名，我會咁排（由成效最大至最小）：手術＞食藥、標靶治療、化療＞電療。都係嗰句，純粹個人體會，係唔客觀嘅。
手術：成效一定最大，因為成個腫瘤切左佢，如果冇擴散，手術係根治個病，其他四樣治療係做唔到「根治」呢個效果。
食藥：如果選擇唔做手術，呢個係一個好選擇，因為日日食藥，長期有野控制住乳癌。不過都係嗰句，要ER＋先得。
標靶治療／化療：雖然係全身性治療，不過副作用大，搞到性價比唔高。
電療：局部治療嘅一種，達唔到整體長期控制嘅目標。
綜合以上兩個排名，你可以見到／估到，大部分老人家都係揀手術／食藥，加減電療，好個別情況先會做埋化療／標靶治療。
3）仲有／仲想要幾耐命？
呢個就要睇你第幾期乳癌同埋而家幾多歲，以前D人就話人生七十古來稀，而家70係非常普遍，香港女性人均壽命去到86，當你有癌症打個折80歲先算，70歲病友仲有10年行（申延閱讀：香港乳癌存活率：我仲有幾耐命？），太早放棄主流治療／根治性手術係不智嘅。
話分兩頭，如果你90歲，本身已經長命過人，看破塵世，每過一日都心懷感激「醫生幫你日日賺」，咁你揀一D保守D嘅治療係可以理解嘅。
老人家乳癌治療攻略
如果年紀相對後生，身體相對健壯，仲熱愛生命，治療就揀做乳癌手術，ER＋就食埋藥。個別病情有需要，性格又進取，身體又頂得順，先做埋電療／化療／標靶治療。
如果年紀相對老邁，身體多毛病，樂天知命，ER＋就抗荷爾蒙藥「食住先」，希望可以「食一世」。睇反應／情況，先考慮做唔做手術，至於化療／標靶治療／電療呢D就太遙遠喇。
最後長氣都要講多句，乳癌治療有5寶：手術、荷爾蒙治療、電療、化療同標靶治療，老人家揀咩野治療唔係捆綁式，好似去茶樓飲茶點心紙咁，鍾意嗰樣先剔嗰樣。千祈唔好因為怕「某某」治療，就放棄「全部」治療，走去試D古靈精怪野，我敢講呢D另類治療九成九呃人，最終受害嘅係自己／自己心愛嘅媽媽。
下一次，教你點樣「醫乳癌公私營合作 － 教你點保障自己」⋯⋯
香港乳癌及乳病治療中心
