乳癌手術 2 － 保留乳房手術 ，我做唔做得？
好多女性一聽到乳癌都好驚，佢地最驚嘅唔係死，佢地最驚嘅係冇咗個乳房。「究竟切除乳癌時，我做唔做得保留乳房手術呢？」
現實情況未必咁壞
好多女性一聽到乳癌都好驚，佢地最驚嘅唔係死，佢地最驚嘅係冇咗個乳房。
冇咗乳房等同冇咗性徵、自己唔再靚、唔再係女人。
隔離陪你睇醫生嘅朋友試圖安慰你「冇咗一邊姐，仲有另一邊吖⋯⋯」
佢地唔明白「冇咗一半（乳房），等如冇咗另一半（老公）。」喺病患者嘅世界等如老公唔再掂我，等如佢會出面搵女人，等如成個家庭就散，做人冇晒意義，死左去好過⋯⋯ 現實情況未必咁壞，不過心裡境況已經最壞。
保留乳房？唔保留乳房？
「醫生，請你開刀時，無論如何都要幫我局部割，我一定要保留乳房。」
喺咪人人都合適局部割？有冇條件限制？
另一極端，一聽到乳癌兩個字，已經周身唔聚財，希望醫生快D割，最好即日即場喺診所就割咗去，成個乳房割晒，甚至冇事嗰邊都割埋，因為見大明星安祖蓮娜祖莉都係咁做，希望咁樣一了百了最安全。
現實成個乳房割晒喺咪最好選擇？最安全呢？一定唔會復發呢？
保留乳房手術 vs 全乳房切除手術
假設你兩樣都有得揀，以上兩個開刀方案有咩分別呢？我地首先重溫「乳癌手術 1 － 我有咩可以揀？」重點三嗰幅比較圖表：
迷思一：全個乳房割安全D？
錯！ 好多女性一聽到乳癌，直覺就會以為全個乳房割晒，一定最清／最安全。事實並唔係咁樣！ 你冇聽錯，局部割嘅治療效果（存活率／局部復發率）同全個乳房割嘅係一樣。不過要建基於兩個基礎之上：
1）手術要割清，即係邊緣唔可以有癌細胞。
2）一定要撘電療 即係如果手術做唔清／你唔肯電療，局部割嘅復發率係會高好多。
重點一：如果手術割得清，術後有電療，局部割同全個乳房割嘅治療效果喺一樣咁清／咁安全！
迷思二：全個乳房割唔洗電療？
「我明喇，即係局部割一定要電療，全個乳房割就唔洗電療。」⋯⋯
啱一半錯一半！ 局部割一定要電療，全個割都有可能要電療（即上表所講：選擇性）
「咁全個乳房割，幾時先要電療？」
好問題！答案係當個乳癌惡嘅時候，即係易D復發時，全個乳房割都要電療。有三個可能性：
1）腫瘤大（T3或T4，即係大過5cm，或者蝕咗出皮膚／肌肉時）。唔明就參考返以前文章「乳癌分期 ﹣ 我係早期定末期？」。
2）全個割都仲未割得清時，例如切割出黎嘅標本底床仲有癌細胞。不過呢個要做完手術先知。
3）有四粒或以上嘅腋下淋巴有癌細胞的跡象（即係N2，唔明又係睇返上面篇乳癌分期）。有D醫生進取D，事旦一粒淋巴有癌細胞（即N1）都會建議你電。呢一點可以手術前估到D，不過最終有幾多粒受影響，要做完手術先知。
重點二：如果你臨床／掃描都知自己腫瘤大（T3／T4），腋下淋巴有抗散跡象（N1／N2），即係無論你揀局部割，定全個割，都會建議你電療。
迷思三：全個乳房割唔洗化療／標靶治療／荷爾蒙治療？
「會唔會全個乳房割，割得清D，唔洗化療／標靶治療／荷爾蒙治療？」⋯⋯
冇關係！ 化唔化療／標唔標靶／荷唔荷爾蒙治療，係取決於個乳癌第幾期／有幾惡／有冇標靶受體／有冇荷爾蒙受體，同你揀做咩手術係冇關係，唔存在割多D就可以避免化療／標靶治療／荷爾蒙治療！
重點三：你揀做咩手術係唔會影響到術後洗唔洗化療／標靶治療／荷爾蒙治療。
點樣揀？
「咁局部乳房割同全個乳房割應該點樣揀？」
首先要搞清楚自己有冇得揀／有冇資格揀，如果有得揀，咁你就要平衡唔同開刀方案嘅好處同唔好處（上表最尾兩項）。詳細請睇乳癌手術 3 － 保留乳房手術 ，我揀唔揀好？
我有冇資格揀？
「咩叫有冇資格揀？唔係人人有得揀㗎咩？」
仲記唔記得上面講過局部割要建基於兩個基礎？如果滿足唔到嗰兩個基礎就即係冇得揀囉：
1）如果局部割，割咗好多次，割極都未清，冇得揀，要全個割。
2）唔電療得，又要全個割。
「咩人唔電療得？」
1）孕婦（尤其頭兩階段嘅孕婦，第三階段嘅孕婦唔一定唔電得，做法係先做乳房手術，跟住生BB，再電療）
2）紅斑狼瘡症（ systemic lupus erythematosus）
3）硬皮症（scleroderma）
4）以前同一邊胸腔曾經電療，例如淋巴癌
5）唔能夠日日去醫院電療人士，例如老人家／行動不便人士
「我聽人講如果腫瘤太大／位置唔理想都唔做得局部割，啱唔啱？」
以前啱（開初技術發展時，腫瘤太大／太近乳頭，真係唔建議做，因為做完變晒型，你唔會接受），而家唔啱。 因為有兩大進步：
1）術前化療可以縮細佢先做，割少D／易做D。
2）乳癌手術技術嘅改良：而家外國好流行切除乳癌時，結合整型科技巧（Oncoplastic surgery）去填補缺損，可以將以前難割／易凹嘅位置都做好佢。 因此如果你嗰腫瘤太大／位置難做，而你又想局部割，最好術前先化療（當然唔保證一定縮細），之後搵個擅長oncoplastic surgery 嘅乳腺科外科專科醫生做手術，因為呢D並唔係一般外科專科（甚至婦科）醫生識嘅技術。
下一集詳細講吓如果你有資格揀，唔同方案嘅好處同唔好處⋯⋯
香港乳癌及乳病治療中心
